旅客乞人憎行為

唔俾影相係要影

去外地行博物館或者睇show，好自然會影相留念，不過影之前有冇睇清楚指示先？好多都唔俾影相或者錄影㗎！就算俾，都唔可以用閃光燈。我見識過有團友話唔夠光，快快手落flash影兩張，然後即閃，佢以為冇人發現，其實我變咗代罪羔羊，俾食蕉捉住檢查相機，真係靠害。

Complain、Complain、Complain！

投訴呢家嘢，你懂的！等check-in等得耐要投訴，侍應打爛碟要投訴，就連廁所唔夠香都要投訴。大家都係打份工啫，咪當人哋妹仔先得㗎！

周圍亂坐

去旅行搭車又搭船的確好攰，但都不至於要周圍坐啩？明明大大隻字寫住「禁止坐立」，你就偏偏要坐落去。喺香港見人坐巴士放對腳喺對面位，就識影相擺上網等公審，點解去到其他國家，就唔識愛護人哋嘅公物呢？

嘈嘈閉

遊客成日以為自己有特權，諗住去人哋國家消費，就等於促進當地旅遊業(甚至會好自豪咁話：冇我哋你連水都冇得飲)。於是會大條道理喺博物館或廟宇等嚴禁喧嘩嘅地方嘈嘈閉。俾幾千蚊去旅行都係想開開心心啫，搞到當場俾人鬧，又或者俾人趕走，你話幾肉酸呢！

冇口齒

唔使多講啦！早前先至有日本民宿投訴啲人訂咗房唔出現，多謝「Wong」幫港人揚威海外。民宿係自律嘅交易，最慘係好多人驚死冇得揀，死book爛book霸住啲位，唔去又唔取消，咪缺德囉！整臭自己人個朵之餘，遲早逼到人哋取消方便遊客嘅民宿傳統，要落訂作實就累街坊啦！

霸行李櫃

「阿邊個邊個(空姐)，幫我搬件行李上行李櫃，細力啲，爛咗你賠唔起！仲有，放埋呢十袋duty free上去，唔夠位就放後面嗰格，人哋唔夠位擺嘢？I don’t care！」用俾人啤足一程機去換個行李位，呢啲咪霸氣囉！

唔守時

愈多團友，愈多人遲到，無他嘅！都係屋企冇教守時嘅重要性，一個人唔守時，累全部人都要等，行程就跟住延遲，最終可能搞到唔夠時間參觀或者玩，所以自由行咁受歡迎囉！不過唔好以為人少少就冇呢啲問題，搵著個遲到大王做伴，隨時成日嘅行程冇晒，聽講過最誇張係因為瞓過龍走咗班機添……

未降落已開電話

「每秒幾千萬上落，我日理萬機，一入境緊係要開定電話處理business啦！影響導航？邊有咁易啊？」well……真係咁日理萬機，搭私人飛機、搵一兩打秘書幫你處理事務吖嘛！使乜自己做呢！

講價講到底

Shopping當然開心，有啲人唔係冇錢㗎！只係好鍾意講價，殺到一頸血就最滿意，但係有啲人見好唔識收，睇住個老闆由笑容滿面，熱情招呼，最後搞到黑晒面，咀藐藐，甚至耍手唔做佢生意，咁又何苦呢？去玩之前睇下攻略，一般都有殺價指引，殺到咁上下就收手啦！搞到不歡而散又何苦呢？

唔聽書

導遊講解行程嗰陣就掛住瞓覺同吹水，去到景點睇唔明又問餐懵，再衰啲，叫你唔好做嗰啲就全部做齊，俾人鬧嘅時候又怪導遊唔早單聲你聽！阿老闆，有冇難服侍啲呀？