『震』撼人生

『震』撼人生

阿風、圓仔花（合）：請收看尚新電視台頭條新聞－『震』撼人生。

阿風：逐家好，我是秦順風。

圓仔花：逐家好，我是圓仔花。

阿風、圓仔花（合）「上台行禮」

圓仔花：阿風a，你今仔日哪會面色青筍筍？

阿風：我喔？毋但按呢咧，我猶雙跤雙手咇咇掣(phi̍h-phi̍h-tsuah)。

圓仔花：今仔日是答喙鼓比賽，莫(mài)遐爾(hiah-nī)緊張啦！你就愛「樹頭徛(khiā)予在」，就毋免驚「樹尾做風颱」。

阿風：失禮！失禮！你誤會啦，我有啥物好驚惶的。我有影是「白布沐著打馬膠」----歹勢、歹勢，攏是因為我看著日本發生9級的大地震，實在是太恐怖、太可憐矣。

圓仔花：是按怎？

阿風：我佇電視頂看著日本發生地震的災區，厝攏倒甲無半間，汽車佇水底泅水（海漲[tiòng]），核電廠佇咧衝(tshìng)煙（火災），實在是有夠慘。

圓仔花：咱台灣嘛定定地震，所以地震毋但厝會倒，嘛會引起火災，咱佇平常時就愛做好『走路』的準備，啊！毋是，是『逃走』的準備。

阿風：啊是愛做啥物款的準備？

圓仔花：地震若來，就愛揹(phāinn)你的防震包，牽恁某，抱恁囝，載恁爸爸、媽媽、阿公、阿媽，紲(suà)落去，「跤底抹油－緊旋(suan)喔」。

阿風：喂(eh)喂喂，小等一下，轉來、轉來，莫講耍笑矣，咱是小學生呢！哪有可能有某囝（妻兒）。

圓仔花：好~這馬圓仔花來教逐家，恁愛斟酌聽？聽了（1234）！

地震欲來無人知，保持鎮定免驚惶，大門毋通關緊緊，

切斷電源關瓦斯，較免引起大火災，大樓電梯袂當坐，

走到空地上安全，地震包愛準備好，地震演習認真做，

地牛翻身免緊張啊，免緊張。

阿風：啊！地震矣！（身體搖晃）無搖矣，咱緊來走。走樓梯傷過慢，來去坐電梯較緊啦。

圓仔花：小等一下，你若無坐無代誌，坐電梯，地震若搖，厝若倒，電梯變形，這聲，你目屎就撥袂離。

阿風：抑無，我走樓梯落去覕(bih)佇咧阮爸爸的順風1號車內，按呢較安全。

圓仔花：仝款是「龜笑鱉無尾，鱉笑龜頭短短」攏袂使，好啦！緊落去再閣講。

阿風：啥物？原來袂當烏白走，按呢是欲如何是好？

圓仔花：咱平常時就愛揣(tshuē)好安全的路線，地震若來毋通徛佇窗仔邊，頭殼愛顧好，較緊走去空地，才袂收著天頂落落來的禮物。猶有、猶有，地震包內底愛準備：水、手機、手電筒、觱(pi)仔、收音機、醫藥箱、食的物件……等。（從地震包拿出物品示範）。

阿風：這學校敢若（好像）攏有教過呢！人講「趁錢有數，性命愛顧」，地震演練做得好，人生是彩色的，若做毋好，人生就變烏白矣。

圓仔花：無錯！規叢好好，風吹袂倒。

阿風：啊，我閣想著一步矣。地震若來，就愛唱一條上時行的歌。

圓仔花：是佗一條？

阿風：保庇、保庇……（現唱一段＋動作）

圓仔花：啊！哪會又閣咧搖矣？

阿風：緊咧、緊唱！有唱有保庇！

阿風、圓仔花：保庇、保庇、保庇、保庇、保庇、保庇、保庇啊！（唱歌）逐家緊來逃生喔！

阿風：阿風。

圓仔花：圓仔花。

阿風、圓仔花：「落台行禮，感謝逐家，勞力！」