Embedded Files
態度改變懸度
阿美:(精神敏醒走出來)
阿婷: (頭髮蓬亂、睡眼惺忪走出來)
阿美：(看到鬼似的，手摸胸前)一 二 三 四，一 二 三 四，囡仔人驚著無代誌！
阿婷:稍等咧！稍等咧！七早八早佇咧創啥碗糕？
阿美:哇矣！日頭欲由西邊出來，平常時攏看你日頭曬尻川再起床的，罕得看汝遐早起‥來唉！
阿婷:唉，你看我到今擱眠眠，現在才五、六點唉，七早八早當咧好睏(哈唏)，起來咧哈唏矣！定定嘛聽阮阿母咧怨嘆講：「五更早若睏會著，較好九斗換一石」。
阿美:(摸2的額頭)
阿婷:抑無你是按怎
阿美:摸看你有發燒無？怪怪哦！今仔日你是食毋著藥仔是否？若會遮早，真正是烏矸仔貯醬油。毋過，看你懶屍、懶屍，若像蟲出來咧蟯蟯(ngiauh8 ngiauh8）趖( so5)，蓋成無睏飽的款。
阿婷:煞毋知阮阿母，攑(gia5)煎匙共我挖起‥來講：逐日睏甲日頭曝尻川；天若落落‥來金條，嘛無通著你抾(khioh4)。
阿美:恁阿母講嘛無錯－規欉好好
阿婷:啊！你講啥？
阿美:敢有毋對？你看起‥來，無像日頭當咧出的少年家仔？
阿婷:是啦！是啦！彼我嘛知，毋過仙改嘛改袂來。
阿美:hennh8啦，豬牽去北京嘛是豬。
阿婷:一句講也不會話。人是講:牛牽到北京嘛是牛。
阿美:(笑一下)你遮爾愛睏，敢毋是豬(大笑)
阿婷:蛤~~~，按呢講嘛無毋著。
阿美:無要緊，免驚。天下無難事(有信心狀)
阿婷:只怕有心人(有信心狀)
阿美:有心扑石石成穿(有信心狀)
阿婷:無心做穡穡拋荒。(有信心狀)
阿婷:按呢對了閣真順，遮的話哪會佮阮阿母講的相仝(kang5)，伊講少年若毋熨（ut4），大漢就熨袂出。
阿美:就是講毋，來、來我報你看樹仔頂彼隻鳥仔，是毋是啄（tok4）蟲咧食，食甲誠歡喜。
阿婷:我聽你咧講廢話！鳥仔當然食蟲仔，抑無你欲叫伊食啥物？
阿美:你莫看in1食蟲食甲足歡喜，彼是in 1比別隻鳥仔較早，等‥一下，日頭若是出‥來，遐的蟲就走去覕(bih4)矣，較晏咧，食水嘛『沒有』。
阿婷:hennh8毋，早起的鳥仔有蟲食，貧惰就吞瀾。
阿美:你著會曉講咧！跤手若無猛醒，慢in1鳥仔伴一步，就目睭(tsiu1)金金鳥仔傷重囉！
阿婷:阿無就棕蓑胡蠅，食毛。
阿美:講甲對同(dang3)對同(dang)
阿婷:定定聽阮阿母攏講in1細漢四（su3）常三个早起當一日。
阿美:著啦！著啦！往過咱的前輩無分日暝，骨力拍拚，毋才會有今仔日咱臺灣的奇蹟。
阿婷:福氣啦! (手握拳頭)遮的無名英雄，足感心的。
阿美:就是講毋。
阿婷:聽你講煞我了解，無骨力，是無天落落‥來的錢財。
阿美:到今(dan)你才知。老師毋是定定咧講「一年之計在於春，一日之計在於晨」(it-liân tsi kè tsài îtshun it-jit tsi kètsài î sîn)…
阿婷:是、是、是…我知影你欲講：「一寸光陰一寸金；寸金難買寸光陰」(it-tshùn kong-im it tshùn kim; tshùn kim lân mài tshùn kong-im )，彼老甲牙強欲落去唉句讀，我嘛知。
阿美:獅、獅在深山林內咧，獅。你無聽人講「坐而言，不如起而行。」(tso jîgiân, put jû khíjî hîng)所以知無夠，愛做。
阿婷:今仔日你講的話，逐句都刺入我的心肝穎仔。由今仔日起，我欲改變阮老師看衰我：『朽木不可雕也』的批評。
阿美:事在人為，只要汝有堅心；烏鐵嘛會變黃金。
阿婷:早起‥來有影空氣誠好，精神嘛敢若食著『千百力』。我‥我今仔看起‥來敢無像少年家仔！
阿美:有、有、有，你金光閃閃，瑞氣千條。
阿婷:拄則才講我無像少年家仔，今也就變金光閃閃、瑞氣千條。阿！阿我欲捎哪會無半條，你嘛抝了傷硬。好矣啦!莫閣佇遮互相漏氣矣。
阿美、阿婷:咦~~
阿美:早起精神有夠好。
阿婷:珍惜時間攏是寶。
阿美:空喙哺舌做事僫(oh)。
阿婷:堅心去做人呵咾。
阿美:今日開始認真做。
阿婷:態度懸度攏總好啊~~攏總好
阿美、阿婷:咦！真正是態度會當改變懸度，讚喔！下台行禮
註：『千百力』＝日語唸tshian0 pa lah4
Report abuse