予我上感動的一句話
予我上感動的一句話
a: (a&b上台徛好勢)兩人徛遮愛勇敢,毋通驚驚喙來合(ha̍p)。
b: 代先著愛來行禮,咱來雙跤徛予齊。
a: xxx。
b: ooo。
a&b: 上台徛齊來行禮(行禮)。
b: 今仔日咱欲講啥?
a: 啊就予我上感動的一句話。
b: (語調牽予長長長)hannh----!這我抑有法度。我抑無予我上感動的一句話,是欲按怎話。
a: 我是講予我上感動的一句話,抑毋是講予你上感動的一句話。是講我,毋是講你。
b: 按呢無我代,我欲來落台。(越頭欲落台)
a: (共b搝轉來) 咱來遮是欲答喙鼓,放我一人欲食孤。
b: 你就愛有話講,毋通予我變悾悾。請你這馬較緊講,道理就愛講會通。
a: (b做動作) 請你跤馬徙(suá)予在,倒拳拍出去,正拳拍出去。
b: (收回動作) 毋著!你是共我當做是拍拳欲賣膏藥喔!
a: (做動作) 歹勢!我是欲講請你耳空挖予厲(lāi)。
b: 叫我聽你烏白屁(phuì)。
a: 好矣啦!痟話莫閣練矣啦!請你斟酌聽。
b: 來閣!做你講分明。
a: 因為這句話,我的人生才會毋驚風,毋驚雨。
b: (套林強向前行的調) 喔喔喔----,啥物攏毋驚,會當透雨泅。
a: 因為這句話,我的人生才會遐爾仔美麗。
b: (套廣告的氣口) 肝若顧予好,人生是彩色的。
a: 因為這句話,我人生的路才會行了順順順。
b: 誠讚!按呢才袂「雙跤踏雙船,心頭亂紛紛。」
a: 因為這句話,我才會毋驚失敗,毋驚跋倒,勇敢的向前行。
b: (唱林強向前行) 趁我猶少年,趕緊來拍拚(換唱) 愛拚才會贏。
a: 這句話是啥?
b: 你無講我哪會知?!
a: 伊是予我上感動的一句話。
b: 彼句話是啥?你毋就趕緊講予人知,你真正是「慢牛厚屎尿」。
a: 人我是「大隻雞慢啼」。
b: 抑無彼句話是啥啦!
a: (b做動作)跋倒。喂!抑無你是按怎?「無風無搖倒大樹。」
b: 你毋是叫我跋倒?
a: 我是講予我上感動的一句話是「跋倒,家己起來!」
b: 這个時陣,外口透大風落大雨。老師當咧按第一名開始報成績。一路報到第二十三名xxx。
a: 你哪會攏知?
b: 連續劇攏嘛按呢做的。
a: (唱) 心事若無講出來,有啥人會知。
b: 雄雄雷公khenn9一下足大聲。後壁有人就(大聲):「哇哈哈!爽啦!xxx竟然輸我!連這款題目也袂曉!」
a: 哪會予你講甲對同仔對同(tâng)!我的心肝有夠凝,目屎擋袂牢。放學時,我沿路行閣沿路吼。目屎佮雨水膏膏(kô)做一伙。
b: 我知,我知。閣來你就覕(bih)佇房間內,哭甲房間內做大水。風聲雷聲,一陣一陣,配合你的吼雞聲。
a: 「規欉好好--無剉(錯)。」我想講,我永遠嘛袂起來矣。
b: 這个時陣,金光閃閃,瑞氣千條,救星出現。
a: 彼就是阮阿爸,我成績講予伊聽,伊干焦問我講:「阿x啊!你有看過蜘蛛經(kenn)絲無?風共吹破,雨共淋破,嘛是一直拚,共食苦當做食補。
b: 恁阿爸有學問喔!共你講五箍的故事。
a: 啥是五箍?
b: 就是一暝煩惱甲規个白頭鬃彼个人。春秋時代伍子胥(Gōo Tsú-su)。姓伍名員(uân),講伍箍較好記。
a: 著啦,就是伊覕山洞看蜘蛛經絲的故事,你無講我攏無想著。
b: 到今你才知,無講你毋捌。
a: 阮阿爸紲咧講:「對伊來講,失敗是成功的前一站。咱人嘛仝款,無人一遍就成功。」
b: 無毋著。做人袂使「一日討海,三日曝網」;就愛「一步棋,一步著」。
a: 「驚驚袂著等,無行袂出名。」
a&b:(唱)「愛拚才會贏。」
a: 生活確實無簡單,一步一步心才安。
b: 跋倒,著愛家己起來。時間到矣好落台。
a: 愛會記喔!跋倒,家己起來。
b: ooo.
a: xxx.
a&b: 落台行禮(行禮)。再會(擛手),多謝,勞力。(落台)