ПРОБЛЕМИ СО КОМШИИ

ШТЕТА ПРЕДИЗВИКАНА ОД КОМШИИ

Во зградата вертикалните инсталации (главните цевки за водовод и канализација, главните кабли за струја и друго) се заеднички делови, заедничка сопственост, а хоризонталните инсталации кои одат од вертикалната инсталација до станот и инсталациите низ станот, се приватна сопственост. Кај дуќаните има некои разлики, но принципот е ист – главната цевка е заедничка, приклучната цевка е приватна.

1.Секој сопственик на стан или дуќан кому му тече вода од таванот треба да утврди од каде протекува водата. Значи да стапи во контакт со сопственикот на горниот стан (или станови), по потреба да ангажира водоводџија или парнаџија, да се направи увид и да се утврди локацијата на кварот. Сопствениците на становите над станот каде протекува по закон се обврзани да дозволат влез и увид во состојбата на инсталациите. Ако нe се дозволува влез и увид, се обраќате до инспекторот за домување во вашата општина.

2.Доколку кварот е на хоризонталните инсталации и инсталациите низ станот проблемот се решава меѓу станарите. Тоа значи дека сопственикот на станот од кој протекува по закон е обврзан веднаш да го сопре истекувањето, да ја санира инсталацијата и да ја надомести направената штета. Заедницата на сопственици не е надлежна за овој дел на процесот бидејќи се работи за приватна сопственост и облигациони односи меѓу двајца сопственици.

3.Доколку пак се утврди дека кварот е на заедничката инсталација (вертикалата), дури тогаш се повикува претседателот, а поправката ќе ја изврши и плати Заедницата на сопственици.

4. Надоместување на штетата.

4.1. Надоместувањето на штетата треба спогодбено да се реши.

4.2. Ако не се најде заеднички јазик со предизвикувачот на штетата, се обраќате до инспекторот за домување во вашата општина. Доколку во општината нема инспектор за домување се обраќате до Државниот комунален инспекторат. Се доставува писмено барање до инспекторот кој мора да излезе на лице место, да изврши увид и да направи записник. Врз основа на вака утврдената состојба тој што ви ја причинил штетата треба истата да ви ја надомести. Оваа постапка е регулирана со законски прописи. За решавање на проблемот во никој случај не е надлежна заедницата на сопственици.

4.3. Доколку ова не помогне поднесувате тужба до соодветниот суд, а записникот ќе ви послужи како доказ во постапката.

Подолу ви се дадени законските основи за секоја од наведените постапки.

Закон за домување

Член 11

(4) Сопственикот на посебен дел, односно закупецот е должен редовно да го одржува станот и да се грижи за одржувањето на станбената зграда со цел да не се предизвика штета или штетни влијанија, како и да се обезбеди непречено користење на посебните делови од страна на другите сопственици.

Член 126

Прекршоци

Глоба во износ од 300 евра во денарска противвредност ќе му се изрече за прекршок на сопственик на стан или деловен простор во станбена зграда, односно закупец, ако:

1) редовно не го одржува станот, односно не се грижи за одржувањето на станбената зграда, согласно со членот 11 став (4) на овој закон;

Член 130

(1) За прекршоците предвидени во членовите 125, 126 и 127 од овој закон пред поднесување на барање за поведување на прекршочна постапка пред надлежен суд, односно пред поднесување на барање за поведување на прекршочна постапка пред надлежниот орган ќе се спроведе постапка за порамнување. Доколку сторителот го признае прекршокот, инспекторот ќе му издаде на сторителот платен налог заради наплата на глобата предвидена за прекршокот, со потписот на платниот налог сторителот на прекршокот се смета дека се согласува да ја плати предвидената глоба.

Член 116

Инспекциски надзор

(1) Инспекцискиот надзор над примената на овој закон и прописите донесени врз основа на овој закон го вршат овластени инспектори за домување во општините и општините во градот Скопје во рамките на надлежната инспекциска служба (во натамошниот текст: овластен инспектор за домување).

(2) Доколку општините, односно општините во градот Скопје немаат назначено овластени инспектори за домување, инспекцискиот надзор го вршат инспектори при Државниот комунален инспекторат во име и за сметка на општините, односно општините во градот Скопје.

Закон за сопственост и други стварни права

Член 98

Сопственикот е должен да се грижи за одржувањето на својот дел од зградата.

Ако при користењето на својот дел од зградата сопственикот причинил штета на други делови од зградата што се во сопственост на други лица или со тоа се создаваат други пречки на деловите од зградата што се во нејзина функција како целина или на нејзини делови кои претставуваат посебна целина, тој е должен да ја надомести таа штета, односно да ги отстрани другите пречки кои се создаваат.

Сопственикот не може во својот дел да врши преправки што би можеле да го нарушат архитектонскиот лик на зградата или да ја намалат нејзината сигурност (стабилност), односно стабилноста на некој заеднички дел од зградата или на друг сопственик, како и на тие делови да им нанесе штета.

ВО ПРАКСАТА ИНСПЕКТОРИТЕ ТОПКАТА ЈА ПРЕФРЛААТ НА ОШТЕТЕНИОТ СОПСТВЕНИК КОЈ МОРА ДА БАРА ВЕШТАК. ВЕШТАКОТ ЌЕ НАПРАВИ ЗАПИСНИК, А ПОТОА ОШТЕТЕНИОТ ДА СЕ ОБРАТЕЛ ДО ИНСПЕКЦИЈАТА? ПА ШТО ЌЕ ВИ Е ТОГАШ ИНСПЕКЦИЈАТА, ОДЕТЕ ПРАВО НА СУД!

администратор - звонко

Copyright © sites.google.com/site/vic28skopje/ 2010 . Сите права се заштитени