一共四次訓練同活動既「手望相助」視障關愛計劃已經係25/1完滿結束。好多謝黎自九間院校既ex-co同義工朋友，當然唔少得勞苦功高、五旬節聖潔靈光白普理失明人士中心既歐姑娘啦！

今次計劃由UST, BU, LINGU擔任PIC同OC，活動以視障人士為服務對象，希望義工朋友透過同視障人士既互動，學習點同佢地相處、瞭解同關心佢地既需要。成個計劃四次活動，每次都唔同，非常豐富，包括「義工訓練日」、「製作食物工作坊」、「遊科大、樂無窮」、「廣播劇表演」。而家，就由我同大家講反呢幾次精彩活動既詳細內容啦！

[3/1 星期五] 義工訓練日

由於今次計劃三次活動都同視障朋友一齊進行，當中仲有室外活動，所以義工訓練當然唔少得啦。當日訓練由下晝兩點直到五點，係五旬節聖潔靈光白普理失明人中心進行。辛苦哂姑娘同我地分享佢既經驗，教我地同視障人士相處既時候有咩需要注意。義工朋友同各位ex-co就好似上堂咁，手拎住一張notes，聽住姑娘講重點。

聽完唔等於可以做得好，所以姑娘就叫我地兩個人一組，輪流矇眼，冇矇眼既人帶住另一個人行一段路。成個路線包括平地、空隙、上落樓梯、行窄路。經過實習，矇過眼既大家都知道多啲帶領視障人士既時候有啲咩要注意，同埋視障人士既心境同傾計內容，真係學到唔少，大家都收穫豐富！活動完左後，有啲自願既義工朋友送視障朋友去搭車，佢地係之後既活動都有幫手接送視障朋友架，好多謝佢地！

[6/1 星期六] 製作食物工作坊

當日活動一點半開始之前，已經有好多視障朋友到左五旬節聖潔靈光白普理失明人中心，大家都好準時。為左方便活動進行，所有義工同視障朋友都分成三組，平均每組十個義工同十個視障朋友，加上組爸組媽同兩位EX-CO，場面都幾熱鬧架。今次MC係BU 既Yolanda 同Stepanie，佢地為大家主持當日活動同遊戲，大家玩遊戲既時候好活躍，現場氣氛好開心架！

一開始既熱身遊戲係猜猜我是誰，視障朋友要估中邊位係MC，而估中左既組可以揀自己想要既食材先。跟住有觸物生情、細聽每聲、聞所未聞同聽出歌喉，考下大家既聽覺、觸覺、臭覺，唔落力都唔得啊！每個遊戲既食材獎勵都唔同，人人有份、永不落空！成個活動三個鐘，但遊戲豐富，一啲都唔悶。最後，義工、視障朋友們一齊整三文治，組同組之間更加交換食材，齊齊分享，好有愛啊！

[18/1 星期六] 遊科大、樂無窮

呢一個活動可以話係今次計畫既主打活動，大家可以出去行下啦！ 姑娘、義工、視障朋友、組爸組媽、EX-CO 十一點一齊係中心出發去搭巴士，中途有講又笑，好快就到左科大。義工同視障朋友一齊跟住大隊行，而我地既領隊就係UST既SAMUEL！SAMUEL拎住大聲公，帶住大家遊科大的各個地標，好有耐心咁講下地標既歷史同故事，真係辛苦了！之後，我地去到靚靚既海邊，分組坐係燒烤爐邊，係義工既協助下，視障人士都好順利咁BBQ！

[25/1 星期六] 廣播劇表演

LINGU既EX-CO一早寫好三篇廣播劇既開頭，三組既義工就分別為呢一日表演，係一個禮拜內落足力寫溫馨又搞笑既劇本。當日，大家十點又係五旬節聖潔靈光白普理失明人中心見面了，呢日既司儀係成日當眾打情罵悄的LINGU Alicia同HKU Peter，佢哋帶領大家玩過幾個破冰遊戲後，就開始廣播劇的演出喇！

三組輪流介紹自己真名同廣播劇入面既名，再好有感情咁表演三套劇，分別係「愛回家」、「聲劇」同「新春故事」，聽到各位視障人士笑得好開心、好滿足。每個廣播劇完左都有一個小小的問答遊戲，視障人士都好踴躍，義工都好滿足。