◎校園歌鄉土情no.4-青山國中小2014學生廣播介紹台灣歌謠【望春風】--廖崇仁20141021
◎【望春風】歌謠介紹—口白編製/音訊剪接：廖崇仁20141013
作曲：鄧雨賢 作詞：李臨秋
資料來源：http://zh.wikipedia.org/wiki/%E6%9C%9B%E6%98%A5%E9%A2%A8
（兩人同齊念）：
阮是五年二班的黃偉翔（ng2-ui-siŏng）佮蔡孟霖（cùa-bhing-lĭm），今仔日阮欲介紹的台灣歌謠，是由歌手鳳飛飛所演唱的，歌名叫做「望春風」，是一條好聽閣好唱的歌。
（黃偉翔）：
1933年日本時代發表的「望春風」，這條歌曲猶原是由鄧雨賢作曲，李臨秋作詞的，是日本人開的哥倫比亞唱片公司所出品的。
（蔡孟霖）：
哥倫比亞公司相當重視這條歌，特別共伊交予新文學運動的陳君玉負責宣傳，由公司的歌手藝名叫做純純的劉清香小姐演唱灌錄的。
（黃偉翔）：
「望春風」的刻盤（今稱唱片）賣了真好，一直到戰後猶閣是台灣上蓋受歡迎的流行歌謠。2000年的時，台灣官方佮民間媒體舉辦《歌謠百年台灣》的活動，有超過二十二萬人參加票選，這條歌得著上受歡迎的老歌第一名。
（蔡孟霖）：
值得提出來講的是，「望春風」的曲調結合傳統五聲的音階所作曲的，伊的旋律優美特殊，真濟國家普遍攏認為伊有「台灣調」的特色。
【望春風】--鳳飛飛
作詞：李臨秋
作曲：鄧雨賢
獨夜無伴守燈下春風對面吹
十七八歲袂出嫁想著少年家
果然漂緻面肉白誰家人子弟
想欲問伊驚歹勢心內彈琵琶
想欲郎君做尪婿意愛在心內
等待何時君來採青春花當開
聽見外面有人來開門甲看覓
月娘笑阮戇大呆予風騙毋知
◎校園歌鄉土情no.5-青山國中小2014學生廣播介紹台灣歌謠【安平追想曲】--廖崇仁20141021
《安平追想曲》歌謠介紹--口白編製/音訊剪接：廖崇仁20141021
今仔日我欲介紹的這條台灣歌謠，是鄧麗君所演唱的，歌名叫做「安平追想曲」，由著許石作曲，陳達儒作詞的。
《安平追想曲》這條臺灣歌謠，是1951年作曲家許石佮作詞家陳達儒，兩個人的作品。這條歌是描寫十九世紀尾，滿清時代臺南安平港一個生理人的查某囝，佮一個負心郎荷蘭醫師戀愛，生一個金頭毛的查某囡仔，落尾，這個查某囡仔嘛佮老母仝款，去予的愛人仔放捨。
彼當時，許石先生用跳舞的旋律譜一條歌曲，伊請臺北艋舺的陳達儒先生填詞。陳達儒拄好佇過年的時，陪某轉去後頭厝臺南市蹉跎，伊佮朋友去西門圓環寶美樓啉酒，聽著服務生講起安平金小姐的故事，伊隨時去安平探聽這層代誌，轉來了後伊就照許石的曲調，寫出這段兩代查某人悲情的歌詞，這條歌流行幾十年，成做人人愛唱的台灣歌謠。
台南市的奇美文化基金會，委託雕刻家陳正雄先生創作「安平金小姐」母仔囝的雕刻像，送予臺南市政府，這馬徛踮東興洋行厝面前來紀錄這個故事，順紲促進觀光。