Isang mapanghamong solusyon dito ay ang paggamit ng nuclear power plant bilang kapalit ng mga planta ng uling. Ang nuclear power plant ay may sari-saring naidudulot na benepisyo sa kalikasan, ekonomiya, at pati na rin sa ating praktikal na pamumuhay. Ang nuclear power plant ay hindi gumagamit ng proseso ng pagsusunog ng mga fossil fuel dahil ito ay gumagamit ng isang prosesong tinatawag na fission. Kumpara sa planta ng uling, hindi nagbubuga ng carbon dioxide ang nuclear power plant (base sa eia.gov). Kung madadagdagan ang mga bansang gagamit ng nuclear power plant, mas mabilis nating makakamit ang Net-Zero Emission na magbibigay daan upang maibsan ang abnormal na pagbabago ng klima.

Marami nang mga bansa ang gumagamit ng nuclear power plant bilang pinagkukunan ng elektrisidad. Ilan sa mga bansang ito ay ang United States, China, France, South Korea, at Canada (base sa nei.org). Mapapansin na ang mga bansang ito ay mabilis ang pag-unlad at mga tinaguriang first world countries. Ang mga benepisyong hatid ng paggamit ng nuclear power plant ay makikita sa link na ito: Pros ng Nuclear Power Plant.

Bagaman maganda ang magiging epekto ng paggamit ng nuclear power plant sa ating kalikasan, marami pa rin ang salungat sa paggamit nito dahil sa panganib na maaaring maidulot kapag ito ay nasira. Nasaksihan ang peligrong hatid ng nuclear power plant sa ilang bansa, tulad ng Russia kung saan naganap ang “Chernobyl Accident ng 1986”. Dahil sa pangyayaring ito, nagdulot ng matinding pagkatakot sa paggamit ng nuclear power plant hanggang sa nakaligtaan na ng marami ang magagandang epekto nito sa kalikasan pati na rin sa ekonomiya.

Hindi madali at mabilis ang paraang ito, subalit panahon na para bigyan ng tama at radikal na pagpapahalaga ang ating kalikasan. Kung ang ating pag-iisip ay naparalisa na sa takot at negatibong pag-iisip, hindi na tayo uusad sa iba’t ibang pamamaraan upang mapangalagaan ang ating kalikasan at umunlad ang ating pamumuhay.

Ang ating kalikasan ay matagal nang naghihingalo para lang umalalay sa ating mga pangangailangan. Oras na para lakasan ang ating loob at maging matapang na harapin ang mapanghamon ngunit maunlad na kinabukasan.