Croeso

Diolch am ddangos diddordeb yn Chweched Dosbarth Ysgol y Strade.

Cymunedol, croesawgar, cynhwysol a chyfeillgar yw ymysg yr ansoddair gorau i ddisgrifio’r Chweched Dosbarth yn Ysgol y Strade. Rydym yn ymfalchïo’n fawr yn ein myfyrwyr ôl-16 sy’n ymuno â ni yn y Chweched Dosbarth cyn iddynt gychwyn ar eu cam nesaf ym mywyd. Braint unigryw yw’r Chweched Dosbarth, nid yn unig i serennu'n academaidd ond i ddatblygu fel model rôl a dinasyddion moesol ac egwyddorol sy’n barod i gyfrannu’n llawn tuag at gymuned yr ysgol ac ehangach.

Cynigir y Chweched Dosbarth y cyfle unigryw i allu parhau gydag addysg mewn awyrgylch cynnes Cymraeg lle’r anogir ein myfyrwyr i gyrraedd eu llawn botensial trwy amryw o bynciau traddodiadol a galwedigaethol mewn amgylchedd strwythuredig a diogel gydag elfennau o ryddid a chyfrifoldeb personol. Ceir ystod o bynciau amrywiol gan ein hadrannau, a golygir bydd llwybr pob myfyrwyr yn addas ac yn berthnasol iddynt hwy.

Fel pwnc statudol yn y Chweched Dosbarth, mae’r Fagloriaeth Gymraeg yn cynnig llu o gyfleoedd i fyfyrwyr i ddatblygu sgiliau blaenllaw sy’n ddeniadol i unrhyw sefydliad addysg bellach neu yrfa.

Mae ein darpariaeth academaidd yn gyfoethog ac o ganlyniad mae ein canlyniadau Lefel A ymysg yr uchaf yn y Sir yn flynyddol. Pleser yw gweld nifer o’n myfyrwyr yn ennill mynediad i amryw o gyrsiau brifysgol ledled y Deyrnas Unedig.

Hefyd, rydym yn ffodus iawn ein bod yn gallu cynnig ardal benodol o’r ysgol ar gyfer y Chweched Dosbarth yn unig; yno ceir y Lolfa er mwyn cymdeithasu a’r Ystafell Waith gydag adnoddau penodol megis dyfeisiau digidol er mwyn iddynt astudio’n annibynnol.

Diolch.

Manteision Chweched Dosbarth y Strade

Daw'r Chweched Dosbarth â nifer o fanteision megis;

Teimlad o berthyn i gymuned glos a gofalgar yr ysgol
Athrawon brwdfrydig sy’n ysgogi myfyrwyr i gyrraedd eu potensial
Arweiniad ynglŷn â chamau nesaf ym mywyd
Cyngor gan athrawon cyfarwydd sy’n adnabod anghenion eu myfyrwyr
Ymweliadau gan asiantaethau allanol sy’n hysbysu am gyfleoedd ychwanegol o fudd i fyfyrwyr
Cyfleoedd am brofiad gwaith a phrofiadau gwirfoddol.

Yn ogystal, ceir amryw o brofiadau bendigedig er enghraifft;

Tiwtor personol sy’n adnabod pob un myfyriwr ar lefel personol
Ystod eang o gyfleoedd allgyrsiol gan adrannau amrywiol
System mentora i ddisgyblion blwyddyn 7
Swyddogion a chynrychiolwyr blwyddyn i arwain eu cyfoedion
Pwyllgorau amrywiol i gyfrannu tuag at yr ysgol a’r gymuned ehangach
Mynediad i wasanaeth gyrfa Cymru
Sefydlu ac arwain clybiau a gweithgareddau amrywiol i ddisgyblion mwy iau’r ysgol
Cyfleoedd i leisio barn er mwyn datblygu’r Chweched Dosbarth ymhellach er y gwell
Teithiau addysgol i brifysgolion a diwrnodau blasu.

Manteision addysg Gymraeg a dwyieithrwydd

Myfyrwyr dwyieithog yn fwy galluog na rhai sydd ag ond un iaith (ymchwil dros y blynyddoedd wedi profi hyn)
Myfyrwyr dwyieithog yn ei chael hi’n haws dysgu ieithoedd eraill
Medru cyfrannu at, ac elwa o, gymdeithas ddwyieithog fel Llanelli
Mae mantais gan bobl ddwyieithog wrth chwilio am swyddi
Mae'r Coleg Cymraeg Cenedlaethol yn cynnig grantiau hyd at £3,000 i barhau i astudio drwy gyfrwng y Gymraeg yn y Brifysgol

Neges gan y Pennaeth - Mr Adam Powell

Annwyl ddarpar-fyfyriwr y Chweched Dosbarth a rhieni.

Mae’n bleser mawr gen i gyflwyno Prospectws y Chweched Dosbarth i chi. Mae’r ffaith eich bod yn darllen y neges yma yn arwydd bod carreg filltir bwysig addysgol yn agosáu.

Mae’n gyfnod cyffrous i chi gyda nifer o benderfyniadau pwysig i’w gwneud a chyfleoedd eang ar gael. Rydym yn falch iawn o’n Chweched Dosbarth yn Y Strade, nid yn unig oherwydd y canlyniadau academaidd sy’n dangos tuedd gref at i fyny ond hefyd oherwydd y cyfraniad allweddol i gymuned glos, fywiog yr ysgol.

Pwrpas y wefan hwn yw i nodi’r rhesymau pam mai Chweched Dosbarth Y Strade yw’r lle gorau i chi barhau eich addysg ôl-16 ac mae’r dewis o bynciau yn

fwy nac erioed.

Yn ystod eich cyfnod yn y Chweched byddwch yn elwa o’r gefnogaeth bugeiliol ac academaidd gorau posib gan sicrhau bod eich astudiaethau o fudd ac yn

cynnig sialens. Yn ogystal â rhoi’r cyfle i gamu ymlaen at brifysgol neu at swydd, bydd Y Strade yn rhoi’r cyfle unigryw i chi gymdeithasu gyda ffrindiau, hen a newydd, ac i fanteisio ar gyfoeth o weithgareddau y tu allan i’r ystafell ddosbarth.

Ond yn fwy na hynny, cewch gyfle i barhau gyda’ch astudiaethau trwy gyfrwng y Gymraeg ac i elwa wrth gyfrannu at gymuned ddwyieithog Llanelli a thu hwnt.

Pwrpas y wefan hwn yw i gynnig blas ar fywyd yn Y Strade ac i sicrhau mai ni yw eich dewis naturiol ar gyfer eich addysg Chweched Dosbarth.

Gobeithio y byddwch yn barod i fanteisio ar y cyfleoedd fydd ar gael ac i chwarae eich rhan yn hanes a llwyddiant Y Strade.

Diolch,

Mr. Adam Powell

Pennaeth.

Neges gan Bennaeth y Chweched - Mrs Eleri Poolman

Croeso i Chweched Dosbarth Y Strade – Eich Cam Nesaf, Ein Dyfodol Gyda'n Gilydd

Mae'n bleser ac yn anrhydedd i mi gyflwyno fy hun fel Pennaeth y Chweched Dosbarth eleni. Rwy'n edrych ymlaen yn fawr at y cyfle i'ch cefnogi ac i'ch annog i barhau â'ch taith addysgol yma yn Y Strade, gan gamu ymlaen i'r Chweched Dosbarth lle gallwch barhau i dyfu, datblygu a chyflawni eich uchelgeisiau.

Mae dychwelyd i'r Strade yn gyfle i adeiladu ar y perthnasoedd, y profiadau a'r llwyddiannau rydych eisoes wedi'u sefydlu, ond mewn amgylchedd newydd sy'n cynnig mwy o annibyniaeth, cyfrifoldeb a chyfleoedd sydd yn paratoi chi i fod yn oedolion ifanc yn barod am eich camau nesaf. Fy uchelgais yw sicrhau bod pob un ohonoch yn teimlo eich bod yn perthyn, yn cael eich gwerthfawrogi ac yn cael eich cefnogi i gyrraedd eich potensial llawn.

Mae'r Chweched yn gyfnod cyffrous sy'n gynnig llawer mwy na chymwysterau academaidd yn unig. Mae'n gyfle i ddatblygu eich hyder, eich annibyniaeth, eich sgiliau arwain a'ch gallu i wynebu heriau newydd.

Rydym yn ymwybodol bod y byd gwaith a'r cyfleoedd sydd o'ch blaen yn newid yn gyson. Boed eich uchelgais yn mynd â chi i'r brifysgol, i brentisiaeth, i fyd gwaith neu ar lwybr gwahanol, ein rôl ni yw eich paratoi, eich arwain a'ch cefnogi i wneud y dewisiadau gorau ar gyfer eich dyfodol.

Rwy'n falch o'r gymuned rydym yn ei meithrin yn Chweched Y Strade – cymuned sy'n seiliedig ar barch, cynhwysiant, uchelgais a chefnogaeth. Edrychaf ymlaen yn fawr i’ch croesawu yn ôl i barhau a’ch addysg yn y Chweched Dosbarth. Os hoffwch drafod elfen o’r chweched Dosbarth yn y misoedd i ddod, peidiwch oedi i gysylltu.

Diolch,

Eleri Poolman

Cyswllt - eleri.poolman@ysgolystrade.org

Page updated

Report abuse