Vurderingsverktøy for kartlegging av språkferdigheiter hos minoritetsspråklege elevar
Vestland fylkeskommune har saman med Høgskulen på Vestlandet og lærarar med norsk som andrespråk i Vestland, utvikla eit vurderingsverktøy for kartlegging av språkferdigheitene til minoritetsspråklege elevar.
Verktøyet er utvikla for å støtte skulane i arbeidet med å kartlegge elevane sin dugleik i norsk og engelsk, som er eit viktig grunnlag for det pedagogiske arbeidet med språk og tilrettelegging i klasserommet. Norskprøva kan brukast som grunnlag for å gjere vedtak om rett særskilt språkopplæring.
Verktøyet består av ei skriftleg og ei munnleg prøve. Prøvene finst på både nynorsk og bokmål, og er tilpassa elevar i aldersgruppa 16-19 år. Den skriftlege prøva finnst også på engelsk.
Til prøvene er det utvikla vurderingsskjema og rettleiing for vurdering. Verktøyet inkluderer også eksempelsvar med vurdering av munnleg og skriftleg produksjon.
Oppgåver, vurderingsskjema og eksempelsvar ligg på ein passordbeskytta nettstad. Lærarar får tilgang til nettstaden etter at dei har vore på kurs i bruk av verktøyet.
Verktøyet nyttar nivåskalaen i Det felles europeiske rammeveket for språk (Europarådet, 2001, omsett til norsk ved Udir, 2011). Munnleg og skriftleg prøve måler på nivåa A1, A2, B1 og B1+.
Vestland fylkeskommune
Vestlandfylke.no