UNANU-LIZARRAGAKO MENDATEA

(2026-05-20an, astezkena)

Aurreko etapan, Uharte Arakiletik igaro eta Unanura iritsi ginen. Segur aski Martin Berrobik Ergoiena harana zeharkatu eta zuzenean Andia mendilerrorantz (mendiak.eus) igoko zen Lizarraga herritik pasatuz; han erretoreak esan omen zion: “Andia mendilerroko garaienera iritsitakoan aske ibil zaitezke”.

Guk ere “penitentzia” egin beharko dugu, Andia mendilerrora sartuko baikara, Beriaingo tontorrera igota. Ez dakit askeagoak izango garen, baina Unanutik abiatuta izerdia bota beharko dugu 852 metroko desnibela gainditzeko; hasieran, 4,4 kilometrotan, pagadian zehar sigi-saga Iñaki Otxoa de Olza (wikipedia) mendizalearen omenezko monolito batetik igaro, eta aldapa malkartsu batera iritsiko gara. Aldapa horrek lautada batean utziko  gaitu San Donato ermitara (bing.eus) iristeko; atzean mendiko postontzia dago. Hemen hasiko dugu Lizarragako mendatera (berria.com) eramango gaituen La Herradura (navarra360.com) izeneko ibilbidea. Jaitsiera azkar batean Uharteko atakara (wklcdn.com) iritsiko gara, Uharte Arakiletik zuzenean igotzen den bidera. Belazeetan behera jarraituko dugu, Euskal Herriko erdigune geografikora (sakana.eus) iristeko. Laster, beherantz, aztarna megalitiko ugari dituen Irunsarioko eremu karstikotik igaroko gara. Azken 7 kilometroak pista zabal batean egin eta Lizarragako mendatera (berria.eus) iritsiko gara.

Zailtasun handi samarreko (96) ibilaldi honek 19 kilometro pasatxo ditu; igoeratan mila metrotik gora pilatuko ditugu eta jaitsieratan, berriz, 650 metro inguru. Hasierako “kalbarioa” igarota, goialdeko inguruek eta ikuspegiek gozatuko dute, ondo gozatu ere, gure nekaldia. 

Gehiago/Más