ESKORIATZA-URKULUKO URTEGIA

(2026-11-04an, asteazkena)

Eskoriatzatik irtenda, Zaraia (berria.eus) mendilerrotik igaro eta Urkulu (turismoa.euskadi) urtegian amaitzen da gure gaurkoa. Hurrengo etapetan Aizkorri-Aratz (gipuzkoa.eus) Parke Naturala zeharkatuko dugu.

Landa-bidetik irtengo gara Eskoriatzatik Bolibar (eskoriatza.eus) auzorantz, nahiz eta  ez garen haraino iritsiko; Agirino baserriaren parean, pinudien arteko pistatik aurrera, tontorrean Gurutze Santuaren ermita eta XII. mendeko gaztelu zahar baten aztarnak dituen (baita harkaitzean ur-zisterna handi bat ere) Aitzorrotz (Atxorrotz 736 m)(mendikat) gailurrera iritsiko gara. Atxorrotz (youtube) lehendabizi nafar gaztelua izan zen, Gasteiztik kostaldera zihoan bidea babestu eta zaintzeko egina. Gero Gaztelak ermita bihurtuko zuen. Bertatik Leintz bailarako goi-ibarra eta aurreko etapetan igaro ditugun mendi ederrak ikusiko ditugu (Gorbeia, Anboto, Oriol).

Gailurretik aurrera, lehen aipatutako mendiak begi bistan ditugula jarraituko dugu, eta, hegoalderantz, Arriurdin (mendiak.eus) mendia ikusiko dugu antena eta guzti; haren aurreko lepoan, Arabako Barrundia herria eta Gipuzkoako Eskoriatza eta Leintz Gatzaga udalerriak mugatzen dituen Hirumugarrieta parajea dago.

Lehen iparraldetik hegoalderantz etorri bagara, orain bira hartu eta mendebaldetik ekialdera joko dugu, Elgea mendilerrorantz joateko. Mugarriluze gailurra eta 78 haize-errota izango ditugu aurrean parean. Gu, Pagobedeinkatu (1.017 m)(mendiak.eus) tontorra eta hango postontzia bisitatu eta berehala, Leizargarateko lepoan behera jaitsi eta Mugarriluzera doan bidea utziz, Bizkarlatzako (mendiak.eus) mendi zabaletik Degurixako (kronika.eus) paraje zoragarrira jaitsiko gara.

Geologia aldetik berezia da. Haran itxi bat da, inguruko kareharrizko gailurrez babestua. Urak lur azpian zulatutako leize eta dolinei esker, paisaia berde eta laua sortzen da mendien erdi-erdian. Bertan, artzaintza izan da tradizioa. Euskal Herriko txabola-gune eta larre zaharrenetakoak dira han. Udaberrian eta udan ardiak bertan larratzen dira, eta antzinako borda ugari ikus daitezke. Debagoienan "Urbia txiki" (berria.eus) esaten zaio.

Inguru bukoliko hori zeharkatu ondoren, Kontrasteko lepora igoko gara, Andartoren (berria.eus) magalean, eta zementatutako pista batetik, pago artean, Ugastegiko (wklcdn) baserrirantz jaitsi eta gasbidea gurutzatuko dugu. Handik gertu, orain arte jaitsi dugun pista utzi eta Urkulu errekaren parean jaisten den bidezidorretik desbideratuko gara. Ur-emariaren arabera, agian ur-jauzi (wklcdn) txikiren ikusteko aukera izango dugu. Laster Urkulu (youtube) urtegia inguratzen duen bidegorrian (wklcdn) izango gara eta bertatik autobusera iritsiko gara.

Gehiago/Más