KATA ALUAN

Assalamualaikum wbt…Kopisanangan..

Tabi korikatan id liwang Repositori Boros Kadazandusun. Pounsikou do au ogiigina kumaa toinsanan i nakaampai do minomonsoi om pinopoturidong do liwang repositori diti. Koponuridangan do liwang diti nopo nga manahak do liwang koponimungan koilaan kokomoi Boros Kadazandusun sabaagi impohon do popotongkop asil ponoriukan om suusuai aktiviti di kaanu popoilang kinoburuon boros tinaru tokou. Maganu oku kosiwatan diti do mongunsikou om monongkotoluod kumaa toinsanan ii kiangkab do monguhup om monokodung do komogoton liwang repositori diti.

Miagal di noilaan tokou okuri po kopio o liwang id internet di popointalang kokomoi do Boros Kadazandusun. Id liwang diti, kaanu tokou momoloyog do ponoriukan miagal ko artikel, jurnal om program-program di pinoindalan ii kaanu manahak kounalan kumaa koinsanai tinaru Kadazandusun. Alansan do kaanu tokou ngawi mogiuhup-uhup monokodung do koponuridangan liwang diti mooi do ointutunan om osiliu sabaagi sukuon tulun kogumuan id taang pogun, kabansaan om sompomogunan. Mantad di, pokionuon ku sawiawi mokiikinobos om lungkitas Boros Kadazandusun do mampayat id liwang repositori diti mooi kaanu monguhup do monimung, monginggumu om mongulud suang repositori di lobi kirati.

Sabaagi pomolingkuman, kanou tokou mogisoosokodung doid tiso om tiso gisom do koimuntu iti Boros Kadazandusun om kagampot do taang di milo tokou royohon. Okon nopo ko baino nga soira po, okon nopo ko itokou nga isai po! Alansan do osiliu nogi liwang diti sabaagi pongunsub doid koponuridangan liwang suai i kopionit do Boros Kadazandusun.

Pounsikou.

(LINAH BAGU @ SITI NURLINA ABDULLAH)

LUGUAN JABATAN

JABATAN BOROS KADAZANDUSUN

IPG KAMPUS KENT, TUARAN