Sobre a ANPA

Moito antes de que o voluntariado se convertese en tendencia e as siglas invadisen as nosas vidas, estaban as Asociacións  de Pais de Alumnos, as APA.

En Asemblea Xeral celebrada o día 9 de abril de 1983 constituíuse a Asociación de Pais de Alumnos do Colexio Nacional As Covas de Meaño, sendo aprobados os Estatutos e elixida a Xunta Directiva, resultando como primeiro Presidente Marcelino Cores Meis.

A súa finalidade era “cooperar co Centro na consecución do máis alto nivel cultural, social, moral, deportivo e recreativo dos seus alumnos na súa dobre faceta escolar e extraescolar”.

Desde entón a asociación foi evolucionando en paralelo a unha sociedade na que o interese dos pais e as nais pola escola dos seus fillos e fillas aumenta e na que cambiaron moito os modelos de familia.

Trabállase para lograr melloras materiais para o Colexio, para resolver conflitos, para organizar actividades, para informar as familias e para representalas no Consello Escolar e ante as Administracións.

No ano 2004, mercé aos cambios na normativa de asociacións, promóvese pola APA a adaptación dos seus estatutos á Lei Orgánica 1/2002 e apróbanse novos estatutos nunha Asemblea Extraordinaria do 26 de abril, procedéndose a cambiar a denominación por ANPA A Toxa do CEIP As Covas de Meaño, falándose de Asociación de Nais e Pais de Alumnos (ANPA).

Os fins da asociación amplíanse, ao falar de promover a participación das nais e os pais na xestión do centro, ao estimular a participación das nais e os pais na programación xeral do centro de ensino, ao requirir atención ás Administracións para a educación e ao promover as reunións de colaboración entre pais e profesores.

Queremos agradecer a todos os pais e as nais que dende 1983 ata agora puxeron o seu traballo e a súa dedicación en prol da asociación e da mellora das condicións dos nenos e nenas do CEIP As Covas de Meaño.

Compoñen a actual Xunta Directiva:

Presidenta: Dna. Ana María Coejo González.

Vicepresidente: D. José Manuel Parada Maroño.

Secretario: D. Enrique José Ortigueira Valcárcel.

Tesoureiro: D. Santiago González Otero.

1º Vocal: D. José Carlos Otero García.

2º Vocal: Dna. Berta Pérez Padín.

3º Vocal: Iria María Vidal Sobral 

4º Vocal: Vanessa Dopazo Méndez

5º Vocal: Dna. Marta Aragunde Conde.