童謠 林鳳吟老師提供
（1）ABC狗咬豬
ABC狗咬豬，阿公仔坐飛機，
跋一下冷支支。
叫醫生，來甲伊醫，醫一下跤骨大小支，
醫一下跤骨大小支。
（2）一的抄米香
一的抄米香，二的抄韭菜，三的強強滾，四的抄米粉。
五的五將軍，六的六子孫，七的蚵仔飼麵線，
八的講伊卜分一半，九的九嬸婆，十的撞大鑼。
打你千打你萬，打你一千零五萬，羞羞羞袂見笑，
猜輸唔甘願，玩輸起蝦龜，唔甘願起蝦龜，
我卜來去投老師，投老師。
（3）一年仔倥倥
一年仔倥倥，二年仔孫悟空，三年仔吐劍光，
四年仔愛膨風，五年仔上帝公，六年仔閻羅王，閻羅王。
（4）一歲兩歲手裡抱
一歲兩歲手裡抱，(pho7)
三歲四歲塗跤脞。(so5)
五歲六歲漸漸大，(tua7)
有時頭燒佮耳熱。(juah8)
七歲八歲真爻吵，(chha2)
一日顧伊兩支跤。(kha)
九歲十歲教針黹，(chi2)
驚伊四界去經絲。(si)
十一十二著拍罵，(ma7)
此去著那學做衫。(saN)
十三十四學煮菜，(chhai3)
一塊桌面辦會來。(lai5)
十五十六卜轉大，(tua7)
驚伊綴人去風花。(hua)
十七十八做親情，(chiaN5)
一半歡喜一半驚。(kiaN)
（5）十二生相
一鼠，賊仔名，(mia5)
二牛，駛犁兄，(hiaN)
三虎，爬山崎，(kia7)
四兔，遊東京，(kiaN)
五龍，皇帝命，(mia7)
六蛇，互人驚，(kiaN)
七馬，跑兵營，(iaN5)
八羊，食草嶺，(nia2)
九猴，爬樹頭，(thau5)
十雞，啼三聲，(siaN)
十一狗，吠契兄，(hiaN)
十二豬，菜刀命。(mia7)
（6）人插花．伊插草
人插花，人插花，伊插草。
人抱嬰，人抱嬰，伊抱狗。
人未嫁，人未嫁，伊先走。
人坐轎，人坐轎，伊坐畚斗。
人睏紅眠床，伊睏屎礐口。
人睏紅眠床，伊睏屎礐口。
（7）正月正
正月正(chiaN)，聽見跋繳聲(siaN)。
二月二(ji7)，老土地(ti7)。
三月三(saN)，桃仔李仔雙頭擔(taN)。
四月四(si3)，桃仔來，李仔去(khi3)。
五月五(goo7)，西瓜排甲滿街路(loo7)。
六月六(lak8)，頭家落田拍碌碡(lak8-tak8)。
七月七(chhit4)，龍眼烏，石榴必(pit4)。
八月八(peh4)，牽豆藤，挽豆莢(ngeh4)。
九月九(kau2)，風吹滿天吼(hau2)。
十月十，人收冬(tang)，頭家倩長工(kang)。
十一月，年兜邊(piN)，家家戶戶人搓圓(iN5)。
十二月，換新衫，來過年(niN5)
（8）大箍呆
大箍呆哎喲白目眉，無人請你就家己來。
來來大箍呆炒韭菜，燒燒一碗來，冷冷阮無愛。
大箍呆炒韭菜，燒燒一碗來，冷冷阮無愛。
大箍呆，到今你才知，到今你才知。
（9）大頭旺仔一粒珠
大頭旺仔伊都一粒珠，相打唔認輸。
夯竹篙托金龜，金龜一下飛。
哎喲大頭旺放風吹，風吹斷了線。
大頭旺仔傢伙，哎喲去一半。
（10）火金姑
火金姑來食茶，茶燒燒，食根蕉。
根蕉冷冷，食龍眼。
龍眼愛撥殼，換來食藍菝仔，藍菝仔全全籽，
害阮食一下落喙齒，害阮食一下落喙齒。