108本土語言兒歌
逐家好(小康軒)
逐家好,我今年三歲,
愛笑愛講話,
阿母叫我心肝寶貝。
嬰仔謠(傳統念謠改編)
嬰仔嬰嬰睏,一暝大一寸;
嬰仔嬰嬰惜,一暝大一尺。
來換衫(傳統念謠)
一兩三,來換衫,
黃衫、紅衫配青褲,
看來看去攏好看,
你上佮意佗幾領?
掩咯雞(陳淑萍)
掩咯雞,真好耍,
桌跤、門後四界鑽。
我覕佗位你免問,
家己揣著才有算。
十二生肖歌(傳統念謠)
一鼠賊仔名,二牛駛犁兄,
三虎爬山坪,四兔遊東京,
五龍皇帝命,六蛇予人驚,
七馬走兵營,八羊食草嶺,
九猴爬樹頭,十雞啼三聲,
十一狗仔顧門埕,
十二豬是菜刀命。
歡喜聖誕節(王金選)
北風呼呼吹,啥人對遮過,
聖誕老阿伯,禮物揹一大袋;
也有運動鞋,也有尪仔冊,也有糖仔佮番麥,
實在有夠濟。
緊來提,緊來提,一人有一個;
樓頂樓跤厝邊頭尾,逐家歡喜做伙,
也唱歌,也泡茶,也有講笑詼;
上重要的著愛感謝~~~聖誕老阿伯。
甜粿過年(傳統念謠)
甜粿過年,發粿發錢,
包仔包金,
菜頭粿食點心。
----------------------------------------
健康檢查(世一)
來來來,來排隊,
看喙齒,喙開開,
看目睭,
左蕊、正蕊擘予金。
狗蟻搬山(小翰林)
一粒糖仔一粒山,
一陣狗蟻做伙搬,
搬啊搬,搬啊搬,
搬走一粒糖仔山。
多謝媽媽(小翰林)
教我行路,一步一步行;
照顧我穿食,一暝一暝大。
真幸福,有你陪我,
多謝你,媽媽,
我欲永遠做你的囝。
鬥陣來耍球(小翰林)
你共球,擲予我,
落落來,彈到我身邊,
用跤踢,踢予遠,踢予懸,
一霎仔久就無看。
讀國小(鄭楷寶)
讀國小,真趣味,
有時學臺語,
有時學寫字,
有時踢毽子,
逐工歡喜笑微微。