105上
手指頭仔(節錄自侑巧文化)
兄弟五個無仝款，
小弟有較瘦，
三兄生做上界懸，
大兄第一讚。
目睭(節錄自侑巧文化)
一爿有一蕊，
生做真古錐，
笑會變瞇瞇，
哭會做大水。
露螺(節錄自侑巧文化)
頭殼頂，兩支角，
軟軟袂相觸，
尻脊骿，揹厝殼，
上驚日頭曝。
105下
阿爸愛唱歌(節錄自愛智圖書)
阿爸阿爸愛唱歌，
透早到晚唱袂煞，
唱甲蹺腳，唱甲嘴闊，
唱甲煮飯臭火焦。
阿姨欲嫁翁(節錄自愛智圖書)
阿姨欲嫁翁，
抹粉、做頭鬃，
指甲擦紅紅，
妝甲媠噹噹。
種菜瓜(節錄自愛智圖書)
阿公阿公種菜瓜，
菜瓜棚頂開黃花，
尾蝶仔颺颺飛，
菜瓜穎仔生足濟，
等大條，割來賣。
賣水果(節錄自愛智圖書)
水果伯仔賣水果，
王梨、西瓜佮蘋果，
柑仔、柳丁、水蜜桃，
逐項甜，逐項好，
食好請恁鬥相報。
嬰嬰睏(節錄自愛智圖書)
嬰嬰睏，嬰嬰睏，
一暝大一寸。
嬰嬰惜，嬰嬰惜，
一暝大一尺。