RECREOS CREATIVOS

Lembrade que a semana pasada desde o EDLG propuxémosvos uns xogos para o recreo que se poden levar a cabo sen tocar material, gardando a distancia, é cuestión de imaxinación, algúns son: Que viches?; debuxando no ar, ... Foron pensados para vós.

De estardes no recreo sen saber qué facer, non vos aqueledes, animádevos e a xogar con sentidiño e coidadiño!

XOGOS PARA OS RECREOS EN GALEGO

 CURSO 2020-2021

EDLG

 IES Ramón Menéndez Pidal

Para poder axudar ao alumnado no seu tempo de lecer nos recreos a desfrutar xogando dentro dos límites que este curso teñen, desde o EDLG propoñemos unha serie de actividades que poden realizar gardando sempre as normas, distancia, ...

Dentro dos espazos, e, en especial no Ximnasio, que é un espazo pechado, intentamos que o alumnado poida, como diciamos, ter un intre de lecer, por iso achegamos nesta proposta sobre todo xogos memorísticos, de adiviñas, movemento e ritmo, de reflexos, etc.

Ademais intentamos realizar inmersión lingüística co alumnado que procede doutros lugares.

Xogos que permitan crecer xogando en galego.

1.   QUE VICHES ...?                           EN GALEGO

1.   Gardando as normas de distanciamento e de hixiene, segundo as normas e o protocolo COVID-19 unha persoa pensa nun obxecto que haxa no espazo do recreo, dille que obxecto é ao profesorado de garda, e segundo as persoas que participen ergan a man para realizar preguntas comezarán a preguntar.

2.   A maneira de comezar a preguntar será: Que viches ...?; a persoa que pensou no obxecto vai respondendo, quen acerte vai adiantando un posto cara á persoa que sabe o obxecto.

3.   Haberá unha persoa moderadora para dar as quendas. Só terá esta función.

4.   De non comezar a preguntar dese xeito, pasarase á seguinte persoa en orde e perde a quenda quen non comezou a pregunta do xeito correcto.

Por exemplo:   Que viches un obxecto de cor verde?

                       *O obxecto é de cor verde (sería incorrecta)

5.   Non se poden repetir preguntas, co cal hai que facer un exercicio de memoria.

6.   Gaña quen acerte e pasa a preguntar.

2. XOGOS MEMORÍSTICOS                           EN GALEGO

1.   Gardando o protocolo COVID-19.

2.   Unha persoa do alumnado voluntariamente dirá ao chou unha suma ou unha resta de dúas cantidades que sexan de dúas cifras.

3.   Quen acerte primeiro gaña e pasa a preguntar.

4.   E así sucesivamente.

5.   Se quere seguirán facéndose con outro tipo de operacións, restas, divisións, ...

3. RITMOS DE IMITACIÓN                   EN GALEGO

1. Unha persoa reproduce un movemento, paso de baile, ..., e as demais persoas teñen que imitala, e á vez indica unha palabra en galego que teña que ver co movemento.

Por exemplo:

Se o movemento ten que ver co movemento das ondas do mar diremos ONDA.

2. Pouco a pouco vai engadindo novos movementos e palabras ata formar unha coreografía de 5 pasos e/ou movementos diferentes con 5 palabras que se reproducirán xunto co paso.

3. O xogo consiste en reproducir todos os movementos e palabras en orde xuntos e aquelas persoas que o consigan gañan.

4. Quen o consiga realiza os pasos para que a imiten e, de seren varias persoas, con distancia, cada unha realizará un movemento ata 6, inventando sobre a marcha, para o cal non terán que poñerse de acordo.

5. E así sucesivamente.

OLLO!!! Evitarase tocar o material do espazo en que se xogue.

4. ADIVIÑAS, CHISTES, REGUEIFAS, CONTOS ENCADEADOS, ...          EN GALEGO

1.   As persoas que saiban adiviñas, chistes, que queiran elaborar contos encadeados, regueifar (sempre con decoro, con palabras correctas e con respecto no que se diga ás demais persoas) organizaranse en quendas.

2.   Formarase unha roda, a persoa que propoña (adiviña, chiste, ...) colocarase no medio.

3.   O resto de participantes atenderán e responderán, se for o caso.

5. DEBUXANDO NO AIRE                          EN GALEGO

1.   Unha persoa simula trazar coas mans no aire algo.

2.   Hai que adiviñar de qué se trata.

3.   Dicir a palabra en galego.

4.   Logo alguén pode dicir o nome noutros idiomas (mesmo o alumnado que procede doutros lugares, se está participando, é interesante que diga a palabra no seu idioma).

5.   Quen adiviñe traza despois a seguinte.

6.   E así sucesivamente.

ROTEIRO DA MULLER NA CIDADE DA CORUÑA

O curso pasado puxemos a andar esta actividade que consiste en buscar os nomes de rúas da cidade da Coruña que teñen nome de muller e logo realizar un roteiro, o da muller na cidade da Coruña. O curso pasado comezouse a buscar información e este curso démoslle cor a esas imaxes de rúas, monumentos, casas, edificios, que teñen que ver con elas. Comezamos desde o 8 e marzo este traballo e mirade o resultado. Rematamos algunhas pezas do quebracabezas que elaboraremos cando o roteiro estea rematado, faremos pins, xincanas, pegatinas, e máis material que leve representado o noso roteiro.

É, como dixemos un traballo proposto xa na programación do curso pasado, e pouco a pouco, iremos construíndo.

Velaquí o vídeo co traballo deste curso:

https://drive.google.com/file/d/1ZOs7e5L87W1G6TbKEcDL4y66tTHhSMg6/view?usp=sharing

Iniciamos este curso cunha presentación nos primeiros da ESO do EDLG, e a verdade é que houbo moito ánimo en formar parte do equipo e en participar en actividades do equipo, tanto por parte do alumnado como por parte do profesorado.

Durante os recreos no primeiro trimestre deste curso a coordinadora do EDLG, quedou coas persoas do alumnado de primeiro da ESO cando o recreo coincidía no patio descuberto, debido á situación sanitaria considerouse así, e no recuncho onde a árbore, un lugar agradable que pensamos pintar este curso durante o mes de xuño, de podermos, e se as circunstancias nolo permiten e amañalo para que sexa acolledor e poida seguir sendo un espazo de reunión ao aire libre e para podermos gardar as distancias, ademais de ser un espazo de lecer onde poder sentarse a falar, merendar, xogar, ... Este será o espazo de reunión durante algún recreo ao longo do curso para poder cumprirmos o protocolo e poder ter saúde, gozamos ademais do aire da árbore que nos axuda a relaxarnos nese tempo de lecer.

25N CONCURSO TIK-TOC

En colaboración coa Biblioteca convocamos o concurso de Tik-Toc, relacionado co 25N, tedes que crear vídeos que teñan que ver co tema.

Ligazón:

25 N EXPOSICIÓN MULLER E MÚSICA. LAURA ROMERO

Iniciamos a exposición das ilustracións de Laura Romero que estará no centro ata xaneiro e que amosan ilustracións que ela realizou de mulleres que teñen que ver coa música galega. Graciñas Laura!

Ligazón:

POSTAIS DE NADAL

ESTAMOS CONTIGO

Este curso continuamos coa iniciativa que comezamos no curso pasado, no Nadal, que consiste en dicirlle á xente que o está a pasar mal nestas datas que ESTAMOS CONTIGO. Na caixa do correo que está situada na entrada do centro todo o persoal do centro e o alumnado pode deixar a súa postal de Nadal no sobre correspondente e cos datos completos da persoa, institución ou colectivo, a quen vaia destinada a postal e o centro enviaraa. Ademais o EDLG colocará en cada postal que se envíe unha tarxetiña achegada a ela que indicará ESTAMOS CONTIGO.

Este curso en especial enviaranse postais ás residencias da terceira idade da nosa cidade. O alumnado traballa con moito agarimo nestas postais que faremos chegar a todas as persoas maiores que viven nas residencias da nosa contorna para poder animalas.

Graciñas por participar!

Feliz ano!

Ligazón:

E seguimos preparando actividades:

as da exposición de Mulleres e música, o Día da Poesía, as nosas Letras Galegas, ...

NOVEMBRO

DECORACIÓN DE SAMAÍN

Nos recreos desta semana preparamos os ÓSOS ILUSTRES DE SANTO AMARO, o alumnado recortou os ósos do corpo humano para compartir actividade cos grupos de 4º da ESO.

Ademais decoramos a entrada do instituto, o carriño e a caixa do correo, a temática era o SAMAÍN.

Esta semana celebraremos o outono con cancións, decoración, que será moi orixinal ...

Anímate a participar nos Recreos creativos.

NOVEMBRO

DECORACIÓN DE OUTONO-INVERNO

Nos recreos creativos, luns e martes, do EDLG decoramos o corredor con creacións realizadas polo alumnado nos 20 minutos de lecer.

Graciñas por participar!!!

FEBREIRO

ENTROIDO

En varios recreos creativos, antes do Entroido, no horario do EDLG, o alumnado realizou máscaras de cigarrón.

Aquí vemos unha foto do proceso inicial, antes de rematala, realizámola en cartolinas e demos renda solta ás cores ...

MARZO

CARTAS ENVIADAS AO CEIP de ATIOS, VALDOVIÑO (4 DE MARZO DE 2023) 

(ACTIVIDADE REALIZADA CON OUTRO CENTRO)

Esta semana enviamos as cartas que o alumnado de 1º da ESO (todos os cursos de primeiro) realizaron para comunicarse co alumnado de 1º da ESO do CEIP de ATIOS, de Valdoviño.

As semanas anteriores o alumnado, nas aulas de Lingua galega e literatura, coa profesora Vanessa, realizaron as cartas para enviárllelas a persoas do seu mesmo nivel do centro de Valdoviño. A verdade é que o entusiasmo era moito, así o transmite a profesora e o alumnado; cando asistín como coordinadora a algunha das aulas, para poder axudar na actividade, emocionoume ver a alegría coa que escribían as cartas e cantas preguntas tiñan, ademais estaban desexando envialas e que as recibisen.

O alumnado realizou as cartas e os sobres e, de certo, que van decorados. Todo feito con moito agarimo.

O día 9 de marzo confirmáronnos que CHEGARON AS CARTAS, e que as recibiron co mesmo entusiasmo que nós puxemos desde aquí.

Parabéns a todas as persoas que teñen que ver con esta actividade.

Cómpre dicir que o feito de escribila e de enviala xa case parece que é un feito que pasou á historia, porque agora imos perdendo ese bonito tipo de comunicarnos, na que había que ter paciencia e agardar a que chegase a contestación da outra persoa; amais A SORPRESA, como neste caso, que procuramos que ese factor fose importante.

Graciñas CEIP de Atios, por colaborar con nós nesta fermosa actividade.

Estamos desexando recibir as vosas cartas!

Saudiños

De aquí seguimos ao antigo cárcere, á casa de Rosalía, á rúa Sinagoga, á praza da Fariña, á rúa Franxa, e rematamos á beira da casa onde viviu Murguía lendo as cartas que escribiu a Rosalía, ademais das respostas de Rosalía.

E seguimos traballando polo galego...: estamos agora mesmo cos roteiros e preparando actividades para vós.

Animádevos a participar na promoción da nosa lingua e cultura!

Día do Libro

Nos recreos creativos alumnado realizou traballos simulando libros con frases célebres sobre o libro.

LETRAS GALEGAS 2023

XINCANA DAS LETRAS GALEGAS

Celebramos as Letras Galegas realizando a Xincana das Letras, como en cursos anteriores, este curso tiña que ver co autora homenaxeado, Francisco Fernández del Riego. O alumnado tiña que buscar pistas nos paneis do expositor da entrada do centro e polo corredor da entrada, nas paredes, nas columnas, escaleiras...

Abofé que o alumnado se preocupou en ser o primeiro en rematar a xincana e ata houbo quen rematou a primeira pregunta, que era realizar un roteiro sobre o autor.

CELEBRACIÓN DE FIN DE CURSO

No recreo creativo na aula A-B, de Polos creativos, celebramos o remate do curso desde o Equipo de Dinamización da Lingua Galega.

O alumnado que forma parte do EDLG leva unha mochila de agasallo polo seu traballo este curso. Ben merecida! Graciñas pola vosa colaboración. 

Feliz verán!!!!

SETEMBRO

INICIAMOS O CURSO CUNHA MERENDA NA QUE COMPARTIMOS LECER E MERENDA NUN DOS RECREOS CREATIVOS

E... comezamos as xuntanzas nos Recreos creativos na aula de Polos creativos, ao lado da Biblioteca. Lembrade que é un espazo pensado para o alumnado, aínda que non pertenzas ao EDLG podes achegarte e participar das actividades do equipo, as actividades intentan tratar temas diversos de interese do alumnado, mais sobre todo formamos un equipo nos que coñecemos a persoas doutros cursos, realizamos obradoiros, organizamos actividades e o alumnado do EDLG colabora no desenvolvemento das ditas actividades ou, polo menos, dalgunhas, o elo sempre é o galego. Intentamos desfrutar e favorecemos sempre a integración de todas as persoas, a convivencia, así como a fraternidade, de certo que nas sesións de cursos anteriores a experiencia foi boa. O alumnado ademais ten unha función primordial. As actividades son propostas para axudar ao alumnado como persoas e promocionamos o galego.

Os horarios dos RECREOS CREATIVOS deste curso son:

LUNS 2º RECREO 12:10-12:30 horas

MARTES 2º RECREO 12:10-12:30 horas

Comezamos organizando actividades ...

E dámoslles a benvida a todas as persoas do equipo, amais comeza alumnado novo de varios cursos da ESO e a primeira persoa do alumnado de Ciclos formativos ...

OUTUBRO

O alumnado propón celebrar o Magosto e en varios recreos organizamos actividades relacionadas: escoitamos a canción do Magosto de Paco Nogueiras, organizamos un vídeo explicativo sobre como realizar un COLAR DE ZONCHOS, costume galego para celebrar o magosto, para guiar ao alumnado nas aulas. A palabra Zoncho xa a usaba Rosalía nos Cantares Gallegos:

Has de cantar 

que che hei de dar zonchos

has de cantar

que che hei de dar moitos

Rosalía de Castro

Ademais preparamos o Samaín, proposta de alumnado do EDLG dos Recreos creativos.

E celebramos o SAMAÍN á última hora da mañá do día 31 de outubro e o MAGOSTO pola tarde o 31 de outubro.

Pola mañá un grupo de persoas do EDLG  de 3º de ESO e de 3º de PDC levaron a Santa Compaña ás clases.

Pola tarde, alumnado de 1º de Bacharelato participou na organización dos equipos e persoas de 3º da ESO que veñen aos Recreos creativos colaboraron na segunda hora da tarde na organización dos XOGOS. Houbo ademais moito profesorado implicado na actividade. Graciñas a todas as persoas que axudaron a que esta dinámica de celebración tivera un bo termo.

Celebramos o Magosto con diversos xogos en que cada equipo ía cambiando cada 7 minutos, aproximadamente, por un dos espazos en que se realizaban os xogos, as persoas do equipo azul competía coas do equipo branco.

Parabéns a todo equipo colaborador!!!!

Aquí quedan algunhas fotos da actividade:

COLAR DE ZONCHOS

RECREOS CREATIVOS

Comezamos coas actividades nos recreos creativos, seguimos coa actividade Iogando en galego. Paseniño, en que realizamos actividades de ioga unha vez ao mes para colaborar coa Comisión de Convivencia para que grazas ao ioga respiratorio acompañado de música galega de cada etapa histórica, todo o centro poida ter a oportunidade de relaxarse e desconectar un pouquiño para conseguir benestar e beneficios que repercuten en todas as persoas do centro.

FOTOS DIANTE DA ESCULTURA NAS MERENDAS CON ISABEL ZENDAL

Alumnado do EDLG que participa nos Recreos creativos teatralizou de xeito sinxelo a vida de Isabel Zendal e máis tarde realizamos un xogo coas persoas que asistiron ao acto acompañadas coa Cruz Vermella.

MERENDAS CON ISABEL ZENDAL CO CEIP ZALAETA DA CORUÑA

 11 de marzo de 2024

O 11 de marzo realizamos a seguinte merenda con Isabel Zendal, esta vez co alumnado de 4º de primaria do CEIP de Zalaeta e abofé que foi un éxito, realizamos a presentación da figura de Isabel Zendal, cando o alumnado teatralizou a súa historia, a continuación o alumnado do CEIP Zalaeta forumou dous equipos para o XOGO DE TARXETAS DE ISABEL ZENDAL, DÍXOME-DÍXOLLE, e a verdade é que estiveron atentísimas todas as persoas cunha participación activa, levaron de agasallo unha merenda que celebramos na cafetería do noso centro e na que gozamos dunha xornada de convivencia con auga, un pequeno bocadillo e comida saudable, unha mazá que levaron.

As fotos correspondentes atópanse antes.

Agasallamos ao CEIP Zalaeta cun marcapáxinas que Águeda de Lorenzo Izquierdo decorou co gallo das Merendas con Isabel Zendal.

ROTEIRO DÍA DA POESÍA 

PASEANDO COS VERSOS

REPORTAXE FOTOGRÁFICA

DÍA DAS LETRAS GALEGAS 2024

IES RAMÓN MENÉNDEZ PIDAL

EQUIPO DE DINAMIZACIÓN DA LINGUA GALEGA

XINCANA DAS LETRAS GALEGAS LUÍSA VILLALTA

L- Onde cursou os seus estudos primarios?

U- Cando naceu?

Í- Con que asociación participou?

S- Cando comezou a súa primeira paixón pola música?

A-Como se chama a súa obra de 1999?

V- Cando publicou Concerto para un home só?

I-Obra de Luísa Villalta que comeza por S?

L-Que obra ten no seu título a palabra “chaves”?

L-Na biblioteca anotade tres versos dun poema da autora e ao final da Xincana recitarédelos en grupos de dúas persoas diante da exposición.

A-Pregúntalle a alguén que pase polo corredor: Onde foi profesora? De que materia?

L-Nome do premio da Universidade da Coruña que leva o seu nome.

T- Cal é o tema central da obra En Concreto? Realiza un debuxo dese tema e colócao no cristal da exposición da entrada. Hai unha pista nalgún lugar preto da exposición.

A-Que dúas cousas defendeu sempre? As dúas palabras atópanse escritas xuntas nalgún lugar da entrada do centro.

ACTIVIDADE S8 na Domus, sesión de cinema 20 de maio

Hoxe, luns 20 de maio un grupo de alumnado de 3º de ESO dos Recreos creativos do EDLG asistiron á sesión S8 de Cinema na Domus, á actividade invitounos o Club de Lectura, en premio ao alumnado que colabora constantemente no EDLG e nos Recreos creativos. Agradecementos ao Club de Lectura.

FINS DE MAIO-XUÑO

E seguimos promocionando Fálame galego, Aquí tamén se fala; preparando no coro cancións de noso; Iogando en galego; realizando a Xincana das Letras Galegas; ... PROMOCIONANDO O NOSO IDIOMA, DESDE OS RECREOS CREATIVOS. Seguimos pedindo que nos falen en galego no centro, que nos conten historias, contos ...

GRACIÑAS A TODO O ALUMNADO QUE SE SEGUE A IMPLICAR EN CADA SESIÓN E ACTIVIDADE E A TODO AQUEL QUE NON PERDE UN DÍA.

E non esquezades que a lingua galega serve para falar de todo!!!! 

É de noso lembrar estes últimos días: FÁLAME GALEGO!!!!

Graciñas pola vosa colaboración ao longo deste curso, e para o curso que vén continuaremos fomentando actividades a prol da nosa lingua.

FELIZ VERÁN, SEGUIMOS PROMOCIONANDO O NOSO LEMA: FÁLAME GALEGO.