Imaxes 2022 - 23

Rematamos o período lectivo do curso 2022-23 e aproveitamos para homenaxear ás nosas compañeiras Margarita García Brea e María Concepción González Iglesias "Maru" e a súa dilatada e vizosa carreira como docentes.

Neste remate de curso, o centro organizou diferentes actividades. O alumnado do grupo de EDUexcelencia, do equipo de Biblioteca e do Club de Ciencias visitou o centro de interpretación das minas de Fontao e realizou  posteriormente  un roteiro histórico-científico  dende  Carboeiro ata a fervenza do Toxa. Mentres, o alumnado de 1º ESO inaugurou a ruta Graba-Santa Mariña resultado do traballo do profesorado e estudantes de CM durante este curso. Ademais de profesorado, acompañaron na motorización o propio alumnado do ciclo. O resto de alumnos e alumnas desfrutaron dunha xornada multi-deporte (brilé, baloncesto, fútbol sala, bicicleta, corda...) no propio centro organizada polo profesorado do departamento de Educación Física. Parabéns a todos eles pola súa implicación!.

Entregáronse os galardóns  do Videoghit 2023. Pode verse un resume do acto na sección de vídeo ou neste enlace. Parabéns a todos e todas!

O pasado 15 de xuño tivo lugar no noso instituto a I Feira de Ciencia. Foi organizada polos departamentos de Física e Química e Tecnoloxía e polo Club de Ciencias. Parabéns a todos eles pola iniciativa.

No pasado mes de abril o noso centro puido participar de xeito experimental na proba da nova aplicación da Real Academia Galega “Ximnasio Léxico” destinada  ao adestramento do léxico. A información sobre a mesma pode examinarse neste enlace. Por outra banda, a nosa ex-alumna  e agora profesora  Lorena Ares impartiu no centro unha charla sobre as minas de Fontao e o seu poboado mineiro. Finalmente, entregáronse os diplomas e premios da I Feira de Ciencia.

Dúas actividades conectaron o noso centro cos colexios de primaria do concello. Como ven sendo habitual nos últimos anos, estudantes que participan no programa de EDUexcelencia acudiron a Bandeira á explicar  o proxecto no que traballaron este ano. Así mesmo, recibimos ao alumnado de primaria que accederá ao noso instituto o vindeiro curso escolar, explicándolle aspectos da organización e amosándolle  as instalacións. Por outra banda, alumnado do programa Erasmus REFUGE acudiu a Radio Lalín.

Varias saídas do alumnado tiveron a natureza e a historia como protagonistas. O alumnado de 2º ESO visitou as Médulas e o lago de Carrucedo na Galiza estremeira, mentres que o de 1º ESO fixo o propio no Parque Arqueolóxico de Campo Lameiro. Por outra banda, tivo lugar a derradeira sesión deste ano do proxecto “Flora Colmérica” coa supervisión, como ven sendo habitual, da bióloga Luz Eyo.

Espectacular xornada do alumnado do Ciclo Medio nas bravas augas do Verdugo en Ponte Candelas. Por outra banda, o alumnado de 3º ESO realizou uns paraugas de cartolina que decoran a nosa entrada. Ditos paraugas conteñen códigos QR que enlaza a vídeos dos propios alumnos sobre a terminoloxía climática en lingua inglesa. Finalmente, sinalamos que celebrouse  no auditorio da Semana Verde o acto de graduación do alumnado de 2º BAC.

Diferentes charlas e obradoiros tiveron lugar no centro nas pasadas xornadas. O alumnado de 2º ESO recibiu varias sesións do programa “Alouminños” impartido polo colectivo “Arraianas”, programa que busca a prevención de conductas aditivas violentas e autolesivas na adolescencia.Ademais, o alumnado de 3º e 1º ESO recibiu por parte do colectivo “Arelas” unha charla sobre a diversidade afectivo-sexual e prevención da LGTBFobia. Noutra orde de cousas, alumnado que participa no proxecto de EDUexcelencia explicou as investigacións levadas a cabo dentro do seu traballo.

A estas alturas xa contamos con varios vídeos candidatos a facerse con algúns dos premios de “O Videghit 2023”. Podedes velos neste enlace do espazo do noso Departamento de Filosofía “Eticolmeiro”: https://sites.google.com/site/eticolmeiro/

Máis información no noso espazo dedicado ao programa: https://proxectoseuropeos.wordpress.com

Entregáronse os premios do concurso de redacción que o Departamento de Inglés convocou en colaboración cos nosos compañeiros do IES de Melide. Noutra orde de cousas, colocáronse os traballos que o alumando estivo a realizar  co gallo do Día Internacional contra a Homofobia. Asemade, con motivo da celebración do Día das Letras Galegas, dispuxéronse carteis sobre a vida do escritor homenaxeado, Francisco Fernández del Riego, os cales tamén serviron para un uso didáctico dos seus contidos. Completouse a celebración das Letras co traballo “Vento XVII” do alumnado de música de 4º ESO e que podedes ver na nosa sección de vídeo.

Enmarcadas dentro do noso Plan Dixital, tiveron lugar varias charlas sobre ciberseguridade a cargo do noso ex-alumno Alejandro Cangas. Por outra banda, un grupo de estudantes acudiu ao Museo de Ciencia e Tecnoloxía na cidade de A Coruña, mentres  que o alumnado que participa no plan proxecta “MeteoEscolas” visitou o centro de MeteoGalicia en Santiago de Compostela. Podedes ver máis información sobre este programa no enlace ao blogue: https://meteocolmeiro2223.blogspot.com/

Departamentos de Lingua Española, Lingua Galega, Lingua Inglesa, Física e Química, e equipos de Biblioteca e Dinamización. Linguística puxeron en marcha diferentes actividades co gallo da Semana do Libro. Pódese ver a información completa neste enlace do xornal Faro de Vigo ou na nosa sección de Comunidade.

Alumnado de Latín de 4º ESO asistiu en Santiago de Compostela aos Ludi Compostellani organizados pola Facultade de Fioloxía. Por outra banda, o equipo de Biblioteca, EDL e o departamento de Lingua Galego organizaron a conmemoración do 25 de abril, día da “Revolución dos Cravos”. Os carteis do programa  R.E.F.U.G.E (stRategic alliancE For encoUraginG intEgration) resultado do traballo do alumnado no noso centro e dos compañeiros participantes no programa, foron enviados a diversos centros de  Galicia. Aquí están algúns exemplos de Arzúa, Viveiro, Ponteareas e Bertamiráns.

Seguen en marcha os proxectos “Flora Colmérica” e “Reciclhorta “. No primeiro, dirixido por Norma Rodríguez (coordinadora de Biblioteca) en colaboración con Marta Aguirre (coordinadora do Club de Ciencia), participa o alumnado de 1ºESO A, o cal participou no primeiro obradoiro de xoves tarde con Luz Eyo, bióloga e intérprete de patrimonio. No segundo, voltamos ter vista do mestre Rosendo Estévez  que esta vez nos explicou como preparar ben a terra dos bancais para poder plantar. Xa estamos a agardar as primeiras leitugas. Por outra banda e como o ano pasado, contamos coa visita de  Beatriz Crujeiras, licenciada en química e doutora en Didáctica das Ciencias. Deste xeito, o alumnado de 4º ESO puido realizar prácticas de laboratorio experimentais pola USC. 

O alumnado de 2º ESO realizou unha saída de divulgación científica visitando a depuradora ETAP Tambre e ao Museo de Historia Natural en Santiago de Compostela.

Culminando a actividade do EpdLab, tivo lugar en A Bandeira a xornada de traballo e convivencia cós outros institutos participantes de Boiro, Bueu, Brión e Viana do Bolo. Máis información na nosa sección de Comunidade (premer).

Incluída dentro dun programa de divulgación da Deputación de Pontevedra, tivo lugar no noso centro a actividade titulada “Fontán, o primeiro rostro de Galicia”. Comprendeu unha charla a cargo do arquitecto Manuel Fernández e do topógrafo Manuel Amigo, a proxección do documentario “Fontán 360. O primeiro rostro de Galicia”, e unha mostra de teodolitos e do mapa do cartógrafo, xeógrafo, e matemático autor da “Carta planimétrica de Galicia”.

Unha vez superada a pandemia, puido retomarse a tradicional viaxe de estudos de final de etapa. O alumnado de 4º ESO, acompañado polos profesores María Patiño e Pablo Cuñarro e o monitor Alex Abalesei visitou Barcelona, PorAventura e Tarragona, con parada en Burgos no regreso.

Alumnado de 1º BAC realizou unha viaxe ás cidades de Roma e Florencia organizada polo departamento de Relixión, sendo acompañados polos mestre Xoán Carlos García Porral e Xosé Barreiro Tato.

O departamento de francés realizou unha viaxe a Portugal. O equipo de biblioteca está a organizar unha exposición sobre mulleres do Deza recabando fotos antigas da bisbarra. Por outra banda, recibimos a visita e posterior charla dos ex-parlamentarios Xesús Manuel Veiga Buxán e Juan Manuel Fajardo Recouso dentro da programación de divulgación e coñecemento do parlamento da Galiza.

Alumando de FPB e Ciclo Medio acudiu á Cidade da Cultura ao congreso FP Innova Galicia 2023. Así mesmo, tamén alumnos de Ciclo Medio acudiron á Mostra de Orientación de A Estrada para publicitar os contidos do seu programa de estudos. Pódese ver máis información na nova da sección Comunidade. Por outra banda, déronse a coñecer as gañadoras do concurso de tarxetas identificadoras de sección das biblioteca. Todo o alumnado fixo un estupendo traballo creativo como pode apreciarse na nosa sección de Vídeo.

Moitos parabéns para o alumnado e ao profesor. Máis información nas noticias premendo aquí en  Comunidade. Pódese ver o vídeo premiado premendo aquí.

Moitos parabéns ás alumnas e a profesora. Máis información nas noticias premendo aquí en  Comunidade.

Entregamos ao concello os pósters do programa  R.E.F.U.G.E (stRategic alliancE For encoUraginG intEgration). Estes materiais son o resultado do traballo no noso centro durante o encontro de outubro do alumnado internacional que participa en devandito programa. Estas láminas que nos advirten sobre os bulos e novas falsas encol da emigración que circulan polas redes, tamén serán enviadas a outros centros educativos de Galicia. Parabéns polo traballo.

Co gallo do día oito de marzo, Día Internacional da Muller, orixinalmente coñecido como Día Internacional da Muller Traballadora, tiveron lugar no centro diversas iniciativas. O departamento de Educación física realizou unha exposición sobre a muller no deporte, mentres que o equipo de biblioteca puxo en marcha un “photocall” onde todos e todas puidemos poñernos as nosas “gafas violetas”. Ademais, por iniciativa do concello, plasmouse nun dos nosos muros unha frase da activista Angela Davis. Parabéns a todas e todos.

O alumnado de segundo ano do Ciclo medio de guía no medio natural e do tempo libre continúa coa súa formación descendendo esta vez polas augas bravas do Ulla. Podes ver un espectacular vídeo na nosa sección de vídeo pinchando neste enlace: vídeo-Vida no Colmeiro.

O noso centro foi seleccionado para asistir á masterclass do IGFAE: "Física de partículas coas mans". Os alumnos participantes, acompañados pola nosa compañeira Marta Aguirre, foron Iris Pérez Rodríguez e Miguel Sánchez Bomtempo de 2º BAC. Pola mañá desfrutaron tanto das dúas charlas como da sesión práctica na que puideron detectar quarks cun simulador. Así, foron quen de realizar as súas propias medidas dentro da mostra de datos do experimento CMS no Gran Colisionador de Hadróns do CERN (LHC). Pola tarde, asistiron á unha videoconferencia con científicos do CERN e do laboratorio Fermilab. Parabéns polo seu traballo e interese.

Continúa o proxecto de horta escolar “Reciclhorta”, agora mesmo xa “sobre o terreo”. Ademais, alumnado de 4º ESO realizou unha saída á cidade de A Coruña onde puido visitar os museos científicos da cidade herculina.

Recibimos a visita de Silvia López e Estefanía Fernández, presidenta e secretaria respectivamente de ECOS (Asociación de Empresarios e Comerciantes de Silleda) que nos deron unha pequena charla sobre comercio local. Por outra parte, o alumnado de latín acudiu a Ourense onde puido visitar o Centro de Interpretación das Burgas e asistir ás obras de teatro Agamenón de Esquilo, e O Persa de Plauto. dentro do Festival de Teatro Grecolatino. O alumnado de programa de EDUexcelencia que dirixe o noso compañeiro Xoán Carlos García Porral acudiu a Radio Estrada para falar da súa labor co patrimonio inmaterial do Trasdeza nos eidos da microtoponimia, lendas ou o calendario lúar en relación con diversas tradicións e traballos tradicionais. Non perdas a súa entrevista que podes escoitar neste enlace: O recuncho da lingua.

Xa temos as propostas para os identificadores das seccións da biblioteca. Independentemente dos que sexan elixidos finalmente, todos merecen un aplauso!

O sempre activo e dinámico Club de Ciencias comandado pola nosa compañeira Marta Aguirre levou a cabo co alumnado de1 BAC de física e química e de FPB un mural sobre as científicas galegas co gallo do 11 de novembro, Día da Muller e a Nena na Ciencia. Por se non fose abondo, o club reciclou porexpán para facer corazóns polo Día de San Valentín: “o amor é química”.

Máis información no noso espazo dedicado ao programa: https://proxectoseuropeos.wordpress.com

O clube de ciencias pon en marcha a horta do centro. E xa ten nome:  RECICLHORTA!

 Nunha primeira sesión, Rosendo Estévez, técnico en explotacións agrícolas intensivas, docente e fundador de Trasdeza Natur,  ensinou os distintos modelos de hortas e explicou que o primeiro que hai que facer é unha análise do solo para ver as súas característica, arxilosa ou areosa. En segundo lugar, deseñar os bancais da horta e decidir que se quere sementar tendo. Toca ir recollendo residuos orgánicos para a compostaxe.

Recibimos a visita do noso ex-alumno Asier López que falounos do seu traballo no mundo da fotografía. O blog “Capture the Atlas” seleccionou unha das fotos de Asier como unha das mellores fotos de auroras boreais do ano. 

A actividade organizada co gallo do Día da Paz polos equipos de Biblioteca e EDL focalizouse na temática dos desastres, xenocidios e masacres propiciados polos conflitos bélicos. Alumnado de 3º e 4º de ESO explicou aos seus compañeiros de segundo nivel diversas traxedias relacionadas cos feitos abordados. A devandita actividade remataba cun traballo dedutivo  que conducía á reconstrución da imaxe do afamado Guernika de Pablo Picasso, servindo así ademais para homenaxear ao pintor malagueño no cincuentenario do seu pasamento.

O alumnado de 2º curso de Ciclo Medio asistiu durante dúas xornadas a Portosín como parte da súa formación No módulo Socorrismo no medio natural. Tamén realizou unha ruta de montaña no Faro aproveitando as nevaradas das últimas semanas. Pódese ver unha boa mostra  na nosa sección de vídeo. Por outra banda, impartíronse  charlas correspondente s ao Plan director no que un axente de garda civil falou daqueles aspectos sobre o uso de redes que poden axudar na mellora na convivencia nos centros. Houbo sesións para o alumnado e tamén unha dirixida a pais e nais fora de horario escolar.  Noutra orde de asuntos, o alumnado de 2º FPB visitou as instalacións de SOTEGA no polígono industrial de Silleda.

Continúa a activade no noso centro cun novo ciclo de cine, neste caso dedicado ao cine español, co club de ciencias, clases de bachata nos recreos ou o concurso de deseño “A biblioteca que soño”. Algunhas iniciativas parten do noso alumnado, como o club de programación e o club de escritura.

Dentro da nosa participación destacaron as alumnas Ainhoa, Iris Micaela e Valeria que se clasificaron entre as primeiras cinco prazas dentro da súa categoría. Parabéns!    

Comezou o VI Taller de motivación “Encantado de conocerme” con alumnado de FPB a cargo da asociación “Acode” de Silleda. Alumnado de 1º BAC participou na primeira fase da X Olimpíada filosófica de Galicia en Santiago de Compostela coa nosa compañeira e profesora da materia María Álvarez Fabeiro. A nosa compañeira e profesora de FOL Tamara Camino relatounos a súa experiencia no a Escola Superior de Desporto e Laze do Instituto Politécnico de Viana do Castelo sita en Melgaço, e dentro do programa Erasmus DEPO.

Ao principio deste curso, o instituto en colaboración coa empresa local Nudesa puxo en marcha un concurso de debuxo de cara a ilustrar os calendarios da compañía para o vindeiro ano 2023. O pasado día 16 de decembro procedeuse á entrega dos premios ás estudantes premiadas. Parabéns a todas!

O alumnado de FPB2 realizou a decoración de Nadal na entrada do noso centro. Ademais, como noutros anos, colaboramos co concello no programa Agasalla no Nadal ideado para que os nenos e nenas de familias desfavorecidas tamén teña o seu regalo nestas datas. A recadación feita entre o persoal do instituto foi destinada á compra de xoguetes e outros obxectos. Alumnado e profesorado de FPB2 levaron a cabo o empaquetado. Parabéns a todos e todas por esta actividade solidaria!

Continúan as charlas no noso instituto. Como noutros anos acudiron ao centro membros da fundación Baiuca Verdescente para falar de voluntariado e do programa Quérote+, estes últimos coa temática de educación afectivo-sexual.

Noutra orde de cousas, instaláronse dúas fontes de auga potable de acceso libre para alumnado e persoal: unha no pavillón e outra na entrada do centro, xusto enfronte das ventás de secretaría. Buscamos así a posibilidade dunha reutilización de recipientes e/ou botellas en aras de favorecer boas prácticas de reciclaxe e consumo.

Coa colaboración do Concello de Silleda, tivo lugar a xornada de de Ciencia e Movemento para o alumnado de 3º ESO. Ademais,  o Club de Ciencias organizou unha xincana científica dirixida e coordinada polos nosos compañeiros Marta Aguirre de física e química e Ángel Pazos de matemáticas. Alumando de 1º BAC, ESO e FPB exerceu de monitor dos diferentes experimentos e xogos matemáticos que culminaron cunha busca do tesouro a través da táboa periódica.