జనమే జయ మహారాజు ( అర్జునుని మనవడు ) చే ప్రతిష్టమైన గణపతి అంశ సంభూతులైన గోపాలదాసుల వారిచే స్థుతించి, సేవించబడిన ధన్వంతరి వేంకటేశ్వర స్వామి భక్తుల పాలిట కొంగు బంగారంగా విరాజిల్లుతున్నాడు. ఉత్తనూరు క్షేత్రం భక్తుల ఇలవేల్పుగా పేరుగాంచింది. తెలంగాణ రాష్ట్రంలోని, జోగుళాంబ గద్వాల జిల్లా, అయిజ మండలంలోని ఉత్తనూరు గ్రామంలో ధన్వంతరి వేంకటేశ్వరస్వామి బ్రహ్మోత్సవాలను ప్రతి ఏటా మాఘశుద్ధ తదియ నుంచి మాఘ శుద్ధ సప్తమి వరకు దేవస్థాన కమిటీ కనుల పండువగా నిర్వహిస్తోంది. 

శ్రీశ్రీశ్రీ ధన్వంతరి వేంకటేశ్వర స్వామి వారి ఆలయ ప్రాశస్త్యం..

                      ధన్వంతరి వేంకటేశ్వర స్వామి ఆలయాన్ని 5000 ఏళ్ల కిందట అర్జునుడి ముని మనవడు జనమేజయ మహారాజు నిర్మించినట్లు పురావస్తు శాఖ ఆధారాలు ఉన్నాయి. ఈ ఆలయంలోని మూల విరాట్కు ధన్వంతరి వేంకటేశ్వర స్వామి అనగా వైద్యులు అని అర్ధం. చరిత్ర ఆధారాలను బట్టి జనమేజయ మహారాజు తండ్రి పరిక్షిత్ మహారాజు శాప విమోచన కోసం ఈ ఆలయం నిర్మించారనే ఆధారాలు ఉన్నాయి. పరిక్షిత్ మహారాజు ఒక రోజు వేటకు వెళ్లిన సమయంలో దాహం తీర్చుకొనుటకు శమేక రుషి తపస్సు చేస్తున్న ప్రదేశానికి చేరుకుని దాహం తీర్చుకోవడానికి ప్రయత్నించాడు. అక్కడ మహారుషి ద్యానంలో ఉండగా పరిక్షిత్ మహారాజు రాకను గమనించలేదు. దీంతో కోపోద్రిక్తులైన మహారాజు ఆ ప్రాంతంలో సచ్చిపడి ఉన్న పామును తపస్సు చేస్తున్న రుషి మెడలో వేశాడట. అది తెలుసుకున్న చుట్టు ప్రక్కల వారు రుషి కుమారుడైన శృంగినికి తెలిపారట. దీంతో ఆ ప్రదేశానికి చేరుకున్న శృంగి తండ్రికి చేసిన అవమానికి పరిక్షిత్ మహారాజును శపిస్తాడట. 

              తపస్సు నుండి మేలుకున్న రుషి జరిగిన విషయాన్ని తెలుసుకుని పరిక్షితుడికి క్షమాపణ చెప్పాడట. పరిక్షిత్ మహారాజు రాకను గమనించకపోవడం మంచిది కాదని ఇంత మాత్రానికి శపించడం సబబుకాదని కుమారుడితో రుషి అన్నాడట. శాప విమోచనం కోసం రుషి భగవతాశ్రవణం చేస్తాడట. ఆయన ఏడు రోజులలో సర్పకాటుకు గురై మరణిస్తాడు. తండ్రికి జరిగిన కీడుకు జనమే జయుడు సృష్టిలో ఉన్న సర్పాలన్నీ అంతరించిపోవడానికి సర్పయాగం చేస్తాడట. దీంతో సృష్టిలో ఉన్న సర్పాలన్నీ యాగంలో వచ్చిపడి చనిపోతుండగా విషయం గమనించిన దేవతలు, రుషులు, సృష్టి వ్యతిరేక చర్యలు ఆపాలని జనమే జయుడును కోరతారట. దీంతో జ్ఞానోదయం కలిగిన తానింత వరకు చేసిన సర్పయాగ దోష నివారణకు రుషుల ఆదేశానుసారం అక్కడక్కడ వేంకటేశ్వర స్వామి ఆలయాలను నిర్మించి, విగ్రహాలను ప్రతిష్టించాలని కోరడంతో జనమే జయుడు వేంకటేశ్వరస్వామి ఆలయాలను నిర్మించాడట. అందులో భాగంగానే ఉత్తనూరులో శ్రీ ధన్వంతరి వేంకటేశ్వర స్వామి ఆలయాన్ని నిర్మించి పూజలు చేశాడనే చరిత్ర ఆధారాలు ఉన్నాయి..

              మరో చరిత్ర ఏమంటే గణపతి అంశ సంభూతులైన శ్రీ గోపాలదాసులు ఈ ఆలయంలో భజన చేస్తుండగా సాక్షాత్తు ఆ వేంకటేశ్వర స్వామి నాట్యం చేసినట్లు పురాణాల ద్వారా తెలుస్తోంది. ఇంతటి చరిత్ర కలిగిన ఈ ఆలయం నేడు దినదినాభివృద్ధి చెందుతూ జిల్లాలో ఒక పుణ్య క్షేత్రంగా వెలుగొందుతోంది..