Spurningaspil um átthaga

Hugmyndin að búa til spurningaspil um átthaga kviknaði þegar ég flutti á Snæfellsnes. Ég er leik- og grunnskólakennari og hef alltaf leitað eftir hugmyndum sem ég gæti ekki bara notað með mínum eigin börnum heldur líka með börnunum „mínum“ í skólanum. Heimatilbúið spil sem ég setti saman upp á eigin spýtur vakti mikla athygli á Fjölmenningarhátíð á Rifi fyrir nokkrum árum og ég fékk hvatningu til að halda áfram. Þar sem ég kenni átthagafræði og hef mikinn áhuga á spilamennsku ákvað ég að blanda þessu saman í lokaverkefninu mínu í sérkennslufræði við Háskóla Íslands. Ég ákvað að búa til átthagafræðispil og kennsluleiðbeiningar fyrir kennara sem vilja búa til sambærileg spil með sínum nemendum.

Átthagafræði er skilgreind í íslenskri orðabók sem „námsgrein í barnaskóla þar sem nemendur læra um nánasta umhverfi sitt“ (snara.is). Í skólanámskrá Grunnskóla Snæfellsbæjar (Grunnskóli Snæfellsbæjar, 2010) er átthagafræði skilgreind sem kennsla um átthaga þar sem nemendum er gefið tækifæri til að fræðast um heimaslóðir sínar með upplifun og reynslu. Kennslan í átthagafræði snýst um að nemendur takist á við raunveruleg viðfangsefni og geti tengt nýja þekkingu og færni hugmyndum um veröld sem þeir þekkja.