《一目了然》是一部書寫形式，攏總用白話字寫的聖冊，1910年佇臺灣的羅厝庄出版。主要的目的是欲共臺灣人傳教，內容是用問答的方式來向臺灣人解說，是按怎咱人應該入天主教、信天主教會有啥物利益等等。

      會當完成這篇論文，我上感謝的就是我的指導老師—程俊源老師。是老師予我佇咧寫論文的過程中閣較了解佮台語相關的智識，猶閣有台語是偌爾仔趣味的語言。感謝老師予我有機會會當去做對台語有意義的代誌，我感覺足歡喜嘛誠驕傲。若是無俊源老師予我的指導佮建議，我就袂有遮爾大的成長。足感謝老師願意用遮爾濟時間解答我的疑問，費神對我的論文提出建議。今仔日我會當完成這篇論文，是俊源老師付出誠濟精神佮氣力共我指導的成果，感謝俊源老師！我未來會繼續拍拚！

   我嘛愛感謝阮厝裡的人，佇咧我拄著困難、感覺壓力真大的時陣，因為有恁陪伴佇我的身軀邊，我才有法度沓沓仔解決問題，一步一步共論文完成。感謝恁對我的付出猶閣有支持！