頭先，我欲先來感謝楊允言教授佇我設計的過程當中，予我真濟指導佮建議，予我會當順利完成；我嘛欲感謝我的朋友參我做伙激頭腦，提供我無仝角度的想法；最後，我欲感謝我的爸母佮我分享𪜶對這片土地的了解和故事、陪我四界行踏。有逐家鬥相共，我才有法度完成這本手冊。

製作這本手冊，除了想欲引起逐家對彰化的興趣，嘛向望會當透過我的分享，鼓勵逐家了解家己的家鄉。另外，真濟鄉鎮攏有行讀的活動，歡迎逐家報名參加！除了會當了解這片土地過去佮這馬的變化，嘛會當聽著各種在地的故事。來一逝深度旅遊，無的確會對遮的所在產生無仝款的情感喔！

我佇咧搜揣資料、制作這本手冊的過程當中，其實足感動的，因為看逐家鬥陣拍拚、推捒地方創生，為著地方的發展佮觀光盡心盡力，嘛為這个足濟人認為無聊閣老的所在，帶來一點一滴新的活力。期待幾若冬以後，逐家對彰化的印象會當改觀，嘛希望有無仝款的種子佇這片土地沓沓仔發穎、生湠。

因為手冊會當囥的資訊有限，所以若是有對彰化旅遊有興趣的朋友，會使閣起去網站揣較深入的資料、規劃行程，非常歡迎你做伙來彰化𨑨迌、遊覽！