內文：華語大略八萬二千外字，分做八章。

摘要：台語大略七千兩百外字說明，分做八點。

    荷婆崙霖肇宮若是拄著相龍彼年(咱年號講辰年)攏會來舉辦聯庄接天香的科儀，對咱南彰化這搭七十二庄的聯庄信仰有濟濟的影響力，這篇論文會對荷婆崙霖肇宮的歷史佮信仰範圍，來分析講荷婆崙五大角頭聯合接天香的歷史，研究客家、潮州族群佮信仰範圍的重疊佮分佈，信仰範圍內底庄頭的參與關係，清朝到國府時代各時期的七十二聯庄研究。

    這篇嘛會來探討三山國王做神的歷史，對大陸廣東揭揚霖田都的發展來研究界石神的發展，對明貺廟記來研究三山國王的歷史，確定三山國王敢是客家族群的共同信仰，會對三山國王的分布地區來說明，接紲研究渡台祖廟荷婆崙霖肇宮的歷史跤跡。

    遮嘛會研究明朝時代渡台的客家族群，佇咧彰化主要的分佈佮年代研究。對荷婆崙的歷史源頭來對應荷婆崙霖肇宮的徛基，清朝時期荷婆崙四大角頭的信仰範圍的建立，猶有思考荷婆崙三山國王廟是當時起造，對歷史事件來比較信仰範圍的遷徙，才閣對歷史資料佮日本時代的寺廟臺帳來成做證明。嘛會用傳說佮古文物的記錄來對照歷史現實，分析荷婆崙霖肇宮建廟的歷史，以荷婆崙三山國王的信仰範圍形成猶有分布成做主要研究重點。

    我有用著原始資料來探討荷婆崙五大角頭七十二庄的分佈，分析彰化地區的族群械鬥，接紲來探討荷婆崙聯庄系統。有整理日本時代早前的荷婆崙信仰範圍，猶有荷婆崙五大角頭的歷史分析閣有各角頭廟宇的紹介，會來說明荷婆崙霖肇宮五大角頭的神農大帝角，這个角頭是按怎對械鬥行到族群和解的關係。

    對南彰化這搭的三山國王廟宇接天香的紀錄來分析，接紲荷婆崙霖肇宮接天香的研究，是以甲辰年民國113年(西元2024年)，筆者全程來參與活動記錄現場聯庄的參與程度，研究信仰範圍。筆者嘛會共親身參與接天香活動佮往過接天香的紀錄做比較，成做研究佮分析荷婆崙霖肇宮接天香的特色，思考聯庄接天香的活動對咱南彰化民俗活動傳承的重要性。