4年歲月，tī 時序轉踅 kah 語文世界中間飛過去--ah。阮是國立臺中教育大學台灣語文學系114級 ê 學生，tī 這个母語、文化、歷史 kah 土地中間走揣家己，總算行到這个展現成果 ê 時間。這毋但是一擺 khah 心適 ê 展示， koh-khah 是一段學習旅程 ê 成果寶藏。

　　咱這屆畢業專題成果展包含語言學、文學、文化、教育等等 ê 多元領域專題創作。自詩集、Podcast 網站，到論文、實境解謎，阮用無仝形式書寫、對話、記錄 kah 行動，欲用台灣語文 ê 視角看見「社會」、理解「人群」、思考家己 tī 世界 ê 定位。

　　阮相信「語文」毋但是課堂頂面 ê 智識，koh-khah 是生活 ê 媒介 kah 文化 ê 根。每一組 ê 專題，lóng 是咱 kah 家己對話、kah 社會連結 ê 誠心表達，mā 是阮對這片土地 ê 回應 kah 感謝。

　　這个網站毋但是展覽平台，mā 是咱 kā 青春歲月留落來 ê 所在。歡迎逐家做伙來參觀、收聽 kah 閱讀，做伙見證台灣語文學系114級學生 ê 多元聲音。

　　感謝所有老師、同學 ê 指導 kah 陪伴，mā 感謝 bat 予阮靈感、力量 ê 每一个人。敬祝　

逐工 lóng 歡喜 開喙講台語

國立臺中教育大學台灣語文學系114級畢業作品發表網站建置小組 敬上