كلية الفنون والإعلام

كلية الفنون و الإعلام الكلية مقسومة جانبين و كل جانب فيه أقسام ح نتعرفوا عليها بس قبل هذا في ملاحظتين مهمات : أولا: لازم تسأل نفسك سؤال و تجاوب عليه بعد ما تقرا النبذة كاملة وهو ( ليش نبي نخش الكلية هذي ؟ ) . ثانيا : الكلية موجودة في طرابلس و مصراتة و بنغازي و باقي المدن تلقى قسم الاعلام في كلية الاداب ( نفس المواد و المنهج ) و الفنون يكون قسم في كلية التربية ( يركزوا ع التدريس اكثر من انواع الفنون الاخرى ) , لذلك حنكتبوا الاقسام متع كلية مصراتة و نوضحوا معلومات عن كل قسم أما جامعة طرابلس لأن اقسامها عديدة حنكتفوا بذكر معلومات بسيطة و الباقي هو نفسه و نفس المنهج و المواد اللي يقروا فيها ف مصراتة . لو تبي تعرف اكثر عن الكلية و فرص العمل المناسبة و معلومات اكثر تابع البوست الجاي .. و متنساش المنشن و الشير و موفقين . - تعريف عام : تخصص يعتبر الى حد ما جديد بين الكليات, موجود في طرابلسو في بنغازي من قبل الثورة و في مصراتة من 2014 ككلية مستقلة, أما الباقي زي في سرت و البيضاء موجود كقسم داخل كلية الاداب . التسجيل و نسبة القبول: بخلاف باقي الكليات فإن كلية الفنون و الاعلام بالاضافة لكلية التربية البدنية ما يطلبوش في نسبة معينة لأنهم يعتمدوا على نجاحك في امتحان المفاضلة ( القبول ) , أما بالنسبة للمدن اللي موجود فيها القسم في الاداب بتكون 65 و فوق . و تقبل الكلية القسمين أدبي و علمي سواء اعلام أو فنون . _ مواصفات مطلوبة في طالب هذه الكلية : حب للمجال , قدرة على الكتابة و التعبير و تنسيق النصوص , صوت مميز , قدرة على الالقاء, حب للتصوير و اعمال المونتاج أو الرسم و النحت و الاشغال اليدوية , ثقافة واسعة ( قراءة كتب متنوعة مش روايات بس ! و مشاهدة برامج حوارية و علمية ) , التحلي بالشجاعة و ضبط النفس ( الشخص الخجول جدا ما يناسباش ) حب للحوار و النقاشات الطويلة و المناظرة . _ ملاحظة : لازم تتوفر فيك اثنين على الاقل من هذه الصفات عشان تتفوق ف المجال و تمشي فيه ممكن جدا شخص متكونش فيه و ينجح ! لكن النجاح هنا مش درجات و بس النجاح في كم العلم اللي يكون في دماغك و تقدر تستخدمه في عملك . نظام الدراسة : تعتمد الكلية نظام الفصول ( السيمستر ) بمعدل 4 سنوات ( 8 فصول ), بواقع أشهر لكل فصل بعدد 12 اسبوع دراسي و بعده تبدأ الامتحانات النهائية تستغرق 3 اسابيع عادة. بالنسبة لجامعة مصراتة منقسمة فنون بروحها و اعلام بروحها أولا الاعلام : - قسم الصحافة : و هذا يعتبر أقوى و أصعب قسم من ناحية الدراسة ح تتعلم فيه كيف ادير حوار صحفي لقاء تلفزيوني او اذاعي كيف تدير مؤسسة صحفية مجلة جريدة كيف تكتب الاخبار و تحررها شن يعني اتصال و اساسيات في التصوير و كتابة المقالات و تحرير الصحف و غيرها العديد , و اللي يميز التخصص هذا إنك في ليبيا بالذات تقدر تخدم بيه ف اكثر من مجال و تتعلم حاجات يقروا فيها الاقسام الثانية . المواد : في مواد خاصة بالصحافة و في منها متعلقة ب الاعلام بشكل عام منها: تحرير اخباري صحفي اذاعي تلفزيوني مهارات اعلامية اعلام دولي اعلام و تنمية نظريات الاتصال فن الالقاء ادارة المؤسسات الصحفية اخلاقيات العمل الاعلامي حوار و قضايا . - قسم الاذاعة و التلفزيون : قسم ما يقلش اهمية عن الصحافة و خاصة في سوق العمل مطلوب بكثرة و تقدر تشتغل و انت طالب زي الصحافة .. ح تتعلم فيه حاجات اساسية ف الاعلام بالاضافة لاعمال المونتاج ( تحرير فيديو ) و الميكساج ( تحرير الصوت ) و تقديم و تنفيذ و تحرير البرامج الاذاعية و التلفزيونية الاخراج و الاعداد و السينما و غيرها كيف يديروا فيلم ؟ كيف يوصلك البث المباشر شن في ورا الكاميرا و قدام الكاميرا ؟ كل هذه التفاصيل هي علم بحد ذاته و عندها اساسيات . المواد : مقدمة في السينما و المسرح التقديم الاذاعي التقديم التلفزيوني هندسة الصوت تصوير ضوئي اعلام الكتروني دعاية و اعلان مؤثرات بصرية و غيرها .. - قسم العلاقات العامة و الاعلان : يعتبر ابسط و اسهل قسم بس حسب اراء طلبة الكلية فرص العمل فيه اقل شوية و هو يتبع العمل في المؤسسات و تنسيق المهرجانات و الحفلات و المعارض او العمل الاداري و تصميم و اخراج الاعلانات و التسويق . المواد : مدخل في العلاقات العامة تنظيم و ادارة العلاقات العامة نظم ادارية نظم سياسية الرأي العام التسويق ادارة الازمات وكالات عامة بحوث العلاقات العامة و غيرها .. المواد العامة ( اللي تقراها اول سنة ) تشمل : اللغة العربية, مصطلحات اعلامية, ترجمة, علم النفس العام, علم الاجتماع الاعلام, ثقافة اسلامية تطبيقات الحاسوب , برمجة ,الاحصاء و غيرها . ثانيا الفنون : زي الاعلام اول سيمسترين عام و في السنة الثانية يكون التخصص في القسمين هما : - قسم الفنون التشكيلية : تخصص التربية الفنية و ساهل تخشله طول من غير امتحان , جميل جدا و ممتع التعب اللي فيه انك بتشري الوان و ادوات بروحك و تكون غالية شوي . مواد القسم : اشغال خشب, رسم , اشغال معادن , طباعة منسوجات , معارض , النحت , الخزف , اشغال فنية و غيرها .. و كل مادة تتفرع لفروع اخرى كل سيمستر تقرا فيها مادة على مراحل يعني تصفي واحدة تمشي للي بعدها منها : تصوير بالالوان الزيتية , تصميم خلفيات , الالوان المائية , الكولاج و غيرها . قسم الهندسة التصميم الداخلي : هذا يديرولك فيه امتحان قبول عشان تخشله قبل و اغلب موادهم رسم في منها تشبه لمواد الهندسة المعمارية و تخصص حلو و عنده فرص خدمة اكثر من الفنون . أما بالنسبة لجامعة طرابلس تتكون من عدة أقسام منها : _ قسم الفنون الجميلة و التطبيقية : يتفرع داخله لفنون جميلة و لخزف و نحت و رسم و تصوير و حفر و طباعة و تصميم داخلي يعني " هندسة الديكور " و تربية فنية " كتدريس " و تصميم إعلاني الاخير هذا حلو جدا . _ قسم الفنون المرئية : يتفرع داخله لسيناريو و الاخراج , تصوير و مونتاج , الرسوم المتحركة. _ قسم الفنون الموسيقية : يتفرع داخله العزف الالي ( البيانو العود الكمان القيثارة ) و قسم هندسة الصوت جميل جدا الاخير . قسم المسرح : تمثيل . قسم الاعلام : اذاعة و تلفزيون و صحافة و علاقات عامة .