كلية الإقتصاد والعلوم السياسية

كلية الاقتصاد و العلوم السياسية : تعريف عام : الكلية موجودة في كل المدن و متوفرة وين ما تمشي و قديمة و دكاترها خبرة غالبا و أقسامها بين 5 و 8 حسب الجامعة . التسجيل و نسبة القبول: تطلب الإدارة بناء على قرار الجامعة ضرورة حصول الطالب على نسبة 65% فما فوق ( معدل جيد ) لقبوله بالكلية، أما بالنسبة للقسم فيختلف باختلاف الجامعة جامعة طرابلس مثلا ( ناصر ) تقبل الطلاب من القسمين العلمي و الأدبي ، أما جامعة مصراتة فتقبل الطلبة من القسم العلمي فقط لأقسام الاقتصاد ، و تقبل الأدبي في قسم العلوم السياسية فقط، ويتم التسجيل عبر احضار المستندات المطلوبة, و اجراء امتحان المفاضلة ( القبول ) بمقر الكلية . مواصفات مطلوبة لطالب هذه الكلية : الكلية الحق تمشي مع اغلب الناس متبيش صفات واجد لأن المقررات اللي بتقراها يفهمها أي حد مش معقدة " هذا ما يعنيش إنها تافهة طبعا كل شيء يبي قرايا " و ممكن نعطوكم شوية صفات لو راغبينها : - معرفة و حب للرياضيات و الاحصاء خاصة للناس اللي بتقرا محاسبة أ تمويل ضروري ( و ممكن تعوضهم بدورات لو انك ضعيف فيهم ) - قدرة على الاستنتاج و التحليل و الصبر و التروي ( باعتبار المنهج يحتوي على مسائل طويلة جدا في الحل و حساب ميزانيات و كذا ) . - التمتع شخصية قيادية و محبة للتطوير و تنمية المجتمع . - و مرة اخرى نقولولكم الكلية متبيش قدرات واجد بس انك تحب ( العمل و عندك نية في وظيفة حكومية مستقرة أو حاب تفتح مشروع خاص و تبي تستفيد لنفسك ) . نظام الدراسة : تعتمد الكلية نظام الفصول ( السيمستر ) بمعدل 4 سنوات ( 8 فصول ), بواقع أشهر لكل فصل بعدد 12 اسبوع دراسي و بعده تبدأ الامتحانات النهائية تستغرق 3 اسابيع عادة. _ الاقسام : زيها زي باقي الكليات اول سيمسترين ( اول سنة ) تقرا المواد العامة و بعدين تختار التخصص و تعتمد عليك طبعا لو نزلت مواد شوية أو رسبت بيطول التخصص ، و الأقسام ما تقدرش تقرر توا أي واحد تخشله لين تقرا المواد العامة تخالط طلبة و مدرسين و تفهم أكثر . بس للمعلومة و الدقة نعطوكم شن هي و تختلف شوية بين الكليات بس اختلاف طفيف حنوضحوه : _ المحاسبة : غني عن التعريف أهم و أقوى قسم في الكلية ديما زحمة و صعب شوي طبعا لأن معتمد ع الحسابات اكثر و فرص العمل فيه جميلة جدا سواء شاب او بنت . - التمويل ( تمويل و مصارف ) : يشبه المحاسبة شوي بس حسب اراء الطلبة اسهل منها . - الاقتصاد : و اللي مسميه عليه الكلية، يهتم بالحاجات العامة العملة و الأسعار و اللي تعتمد عليه الدولة في اقتصادها و كيف نتعاملوا مع الازمات الاقتصادية و هكذا . - العلوم السياسية : مختلف شوي عن البقية لأن يعتبر نوعا ما حفظ اكثر يفترض إن يخرج دبلوماسيين و سياسيين يشتغلوا في مؤسسات المجتمع المدني و الأحزاب أو حتى وظائف ادارية . - التسويق : يشبه شوي لقسم العلاقات العامة في الاعلام، و ساهل جدا حتى هو مواده نظرية اكثر من العملية . - ادارة الاعمال ( في جامعة بنغازي مش موجود ) : تخصص قوي جدا جدا يجمع بين النظري و العملي و ممكن تخدم بيه في أي مكان و يختص بإدارة المشاريع و المؤسسات الصغيرة أو الشخصية غالبا . - الادارة العامة : قسم قديم و ديما زحمة لأن ساهل نوعا ما و يختص بإدارة المؤسسات العامة غالبا ( مش قصدنا هنا المدير العام! إنما الوظائف الحكومية العادية ). - قسم التجارة الدولية : قسم فقير نوعا ما للطلبة ما يتجهولاش واجد بس هذا مش سبب ينفرك منه على العكس لو عندك نية فيه و حتى لو طلعت بمعدل ضعيف يقبلوك كمعيد لأن مفيش طلبة واجد . - تقسيم الدرجات و الامتحانات : يختلف بين كلية و أخرى و يختلف حسب أستاذ المادة و هل هي عامة أو تخصصية و هكذا ولكن بالغالب يكون توزيع الدرجات كالتالي : الدرجة النهائية لكل مادة هي 100 درجة مقسمة كالآتي : 10 درجات للحضور . 30 درجة للامتحان النصفي . 60 درجة للامتحان النهائي . ملاحظة : احيانا و في غالب الكليات يتم توزيع درجة الحضور على البحوث ( كثيرة تكون في الاقتصاد الواجبات ) او الاختبارات السريعة ( Quiz) . - مشروع التخرج : يعتبر مادة تنزلها في اخر سيمستر أو اللي قبله تختار مشرف يتابع معاك و تختاروا موضوع تبي ادير فيه بحثك و ياخذ منك شغل جو 3 شهور أو اكثر حسب خدمتك و قرايتك و درجته ممكن ترفع معدلك واجد و ممكن تنزلها لوطاا ليش ؟ لأن المشرف اللي هو كأن استاذ يقري فيك بيشوف خدمتك شني تتعب ولا لا تمشي بنصائحه ولا تفوت و هكذا ، و حتتعرف على تفاصيل اكثر بخصوصه في الكلية . - المنهج و المواد : 90% الأستاذ أو الدكتور يكتب منهجه في شيت و يقول للطلبة يصوروه و اللي عادة يكونوا بين 6 و 8 شيتات و في المواد الصعبة توصل لأكثر ... و نادر ما حد يعطيهم كتب يقروا منها إلا لو هو الأستاذ مألف كتاب أو هكي .. و مصادرك في البحوث و كذا متوفرة بشكل كبير في المكتبات سواء متع الكلية أو العامة . - المواد العامة : تختلف شوي حتى هي بين المدن في المسميات بس بالعموم بتقرا زيك زي باقي الكليات ( لغة عربية 1 و 2 و انجليزي 1 و 2 و ثقافة اسلامية ( دراسات اسلامية ) و برمجة ( حاسب آلي ) و احصاء و رياضيات و محاسبة 1 و 2 و مواد في الادارة و الاقتصاد . أما المواد التخصصية تختلف بين الاقسام ، و لازم تعرف إن مرات في مواد اجبارية ( الزامية ) لازم تصفيهم عشان تنفتحلك المادة الثانية و في اللي عادي تخليهم لأخر سيمستر زي الانجليزي 2 مثلا و هكذا .. - فرص العمل : عاد هذا اكثر تخصص فيه اعمال وين ما تمشي يخدموك تقريبا : - في المصارف و الوزارات و القطاعات الحكومية باختلافها . - ديوان المحاسبة و وزارة المالية على وجه الخصوص . - المصانع و الشركات الخاصة ( شركة استيراد ، مصنع منتجات غذائية ، شركة سياحة و سفر ، و غيرها) . - العيادات و المستشفيات عامة أو خاصة كمحاسب أو اداري . - العمل في الكليات حتى لو مش كليتك كموظف أو تقدم على امتحان المعيدين أو العمل في الجامعة نفسها يكون أفضلك ، و كذلك الجامعات و المدارس الخاصة مرتباتهم كويسة بالذات لو عندك لغة . - - الأسواق التجارية الكبيرة أو مجموعة محلات صغيرة . - أخيرا طبعا تكمل دراسات عليا سواء في الكلية أو في الأكاديمية في ليبيا أو برا و تكون عضو هيئة تدريس بعد التخرج تعطي مواد و تشرف على مشاريع تخرج و هكذا . باختصار في ستين مكان ممكن تخدم حتى في القضاء و الشرطة أو في تتجه إنك تخدم عمل خاص بيك شبه مضمون العمل بشهادة الاقتصاد . دعوة طيبة نطلبوها منكم و موفقين يا رب .