الكليات الطبية

الكليات الطبية : في التعريف هذا بنعطوكم معلومات عامة بخصوص كل الكليات الطبية باعتبارها متشابهة نوعا ما و بينقسم ع جزأين ، اقروه قدام كل فقرة كاتبين الكلية انت شوف الكلية المهتم بيها و اقراها .. منشن ياريت و شير عشان تعم الفائدة : - صفات مطلوبة لطالب هذه الكليات : بما إنهم تخصصات متشابهة بتكون المواصفات اللي تأهلك تخشلها متشابهة أيضا : - أول و أهم شيء الطبيات كلها خشلهم لرغبة نبيلة و هدف واضح خلي هدفك انك تساعد الناس و تخفف ألمهم مش إن ( يقولوا عليك دكتور أو عشان العيلة يبوك دكتور وو ) مش حينفع بيك الكلام هذا ولا ربي يوفقك لما يكون هدفك الشهرة و الفلوس و بس . - تحب الأحياء و تهتم بالجسم البشري أو حتى الحيوان لو بيطري و الكيمياء لو صيدلة أو قسم أدوية تقنية طبية و عندك جو في دراسة الأمراض و العلاج . - تكون انجليزيتك كويسة و عندك استعداد لتطويرها لأن المناهج كلها انجليزي . ( في كورسات خاصة بالمصطلحات الطبية تقدر تخشلها تفيدك ) . - شيء بديهي طبعا تكون عندك شجاعة و متخافش من الدم أو الحروق و تتعامل مع نساء و رجال و أطفال و الجو عندك تمام لو ان شخصيتك ما تتحملش الاحتكاك بالناس واجد ( مش شرط تكون اجتماعي ) فنصيحة ما تضيعش وقتك . - وسعة بال كبييييرة لأن الطبيات ديما نظام سنة و حتى لو سيمستر مفرقتش واجد المنهج طويل و يبي جهد لو انك تبي تتخرج بسرعة عندك سفرة او تبي تشتغل أي شيء .. خش كلية 4 سنين خيرلك . أولا : الطب البشري + طب و جراحة الفم و الأسنان + الصيدلة + الطب البيطري : - التسجيل و نسبة القبول: تطلب الإدارة بناء على قرار الجامعة ضرورة حصول الطالب على نسبة 85% ( معدل ممتاز ) فما فوق لقبوله بهذه الكليات و أن يكون طالبا بالقسم العلمي, و يختلف معدل القبول بالنسبة للجامعات الخاصة . ويتم التسجيل عبر احضار المستندات المطلوبة, و اجراء امتحان المفاضلة ( القبول ) بمقر الكلية . - و بخصوص مفاضلة الطب : في جامعات يديروا في سنة إعداد طب و عحسب النسبة اللي تجيبها في هذه السنة ينسبوك لكليات مثلا لو جبت ممتاز انت تختار بس لو جبت جيد معندكش خيار طب بشري لأ صيدلة و هكذا ( في جامعة مصراتة العام اللي فات صارت ) .. أما في جامعات ثانية مش ديما يديروا في إعداد طب و الموضوع يفرق في المنطقة الشرقية أيضا . - نظام الدراسة : - بالنسبة لجامعة طرابلس الطب بشري و أسنان و صيدلة نظام فصول ( سيمستر) وهنا انت بتقرا المنهج مقسوم ع اثنين ، أما في سرت بنغازي البيضاء سبها مصراتة الزاوية و غيرها تعتمد نظام السنة يعني تقرا المنهج كامل و تمتحن فيه امتحان نهائي كامل زي ما قريت ف الشهادة ، و حسب اراء الطلبة مفيش فرق هو نفسه يعني لا السيمستر أريح ولا السنة أريح كله يعتمد عليك ، و تكون السنوات مقسمة كالتالي : - البشري أول سنة عامة و بعدين تبدا تتدرج في الاقسام و المواد لين توصل سنة خامسة و تبدا تدريب في المستشفى و آخر سنة الامتيازاللي هي السابعة مفيهاش قرايا و كتابات كلها تدريب شهرين في كل قسم لين تتخرج . و هذا فيديو للدكتور وسام خلف الله تابعوه في الفيسبوك و اليوتيوب يفيد كل طالب طب بجد : https://www.youtube.com/watch?v=7NPwVnddutw - الأسنان أول سنة عامة و بعدين تتدرج في المواد نفس الشيء لين توصل سنة رابعة تبدا تدريب و سنة خامسة اللي هي الامتياز تدريب بس و تتخرج بعدها . - الصيدلة نفس النظام و حتى هي خمس سنوات ، و هذا فيديو لصيدلانية أردنية مفيد ليكم : - https://www.youtube.com/watch?v=NJjrIyXvd14 - ملاحظة ( التدريب لطلاب الطبيات مهم جدا يبدي قبل ما توصل لسنة التدريب متع الجامعة يعني تشوفلك صيدلة تخدم فيها او عيادة لو كنت اسنان حتى ممرض اسنان تتعلم منهم واجد واجد و عن تجربة خريجين! + دخل مادي يساعدك على مصاريف الكلية و الشيتات ) . - الطب البيطري : تخصص جميل جدا و مهمل للأسف و لكن! نصيحة لو تبي تتميز ف حاجة فكر فيه لأن طلابه شوية و فكك من كلام دكتور حيوانات و واحد .. البشر ما يقدروش يعيشوا بلا حيوانات و مش بس تحط ف بالك عيادة و تشخيص في مجالات عمل ثانية في المزارع و المصانع و المؤسسات الصحية سواء ف ليبيا ولا برا، لذلك فرصة العمل فيه مليحة، واجهنا صعوبة في تجميع معلومات عليه، لذلك جبنالكم اثنين فيديوهات فيهم معلومات ممتازة - الفيديو الأول معلومات مختصرة : https://www.youtube.com/watch?v=lrWNQv8OzQ0 - الفيديو الثاني محاضرة 18 دقيقة جميلة جدا : https://www.youtube.com/watch?v=CqE_wi2sp7M . الأقسام و المواد : الكليات هذه مفيهاش قسم معين تتخصص فيه إنما اقسام كل سنة تقرا منهم اثنين ثلاثة و تنتقل للسنة اللي بعدها، و المواد غالبيتها تشمل ( علم الأسنجة علم التشريح علم الطفيليات علم الأدوية و مصطلحات طبية ) هذا يشمل كل الطبيات تقريبا و الباقي بيتفرع .. _ فرص العمل مفيش داعي نذكروها لأنها معروفة بس نعطوكم نصائح عامة مهمة كانك تبي تقرا طب لازم تفهم حاجتين : الأولى : متصدقش اللي يقولك عذاب و صعب و يتم عمرك و ما يكملش انسى الطلوع و طول الوقت قرايا وو .. لأن نشوفوا قدامنا ف طلبة متفوقين و يطلعوا و يجوا و حياتهم عادي لأنهم ببساطة منظمين وقتهم كويس و لأنهم يسعوا لحلمهم وهدفهم بجد . الحاجة الثانية : ما تعتمدش ع منهج الدكاترة وبس! اقرا بروحك و تعلم عندك النت مليااان يوتيوبرز يعلموا و مواقع و صفحات فالفيسبوك خوذ كورسات شارك ف مؤتمرات هذا كله يفيدك لما تجي تخدم . ثانيا: التقنية الطبية + الصحة العامة : التقنية الطبية ولأن عليها طلبات هلبا منكم باختصار هكي : القبول : تبي نسبة ما بين 70% و 75% حسب الجامعة، أول سنة عام و بعدين تتخصص و لمدة 4 سنين .. المنهج بالانجليزي بس مش صعب حسب آراء الطلبة ف الكلية . كرأي للتجمع، الكلية بدت زي الموضة كلهم يبوا يخشولها و خلاص! متخليكش ماشي ورا راي الناس كان شايف لروحك فيها مستقبل تمام، أما لو الخيارات الثانية ناسبوك خشلهم أفضلك لأن الكلية لما تكون زحمة تكون متعبة شوي .. - الأقسام : الكلية فيها أقسام تخصصية مش زي باقي الطبيات يعني تختار مجال معين تكمل فيه من الاقسام هذه، و نصيحة ما تحددش حاجة من توا لين تقرا سنة أولى قبل و تفهم أكثر : - قسم الأشعة و هذا مطلوب في المستشفيات و العيادات الخاصة . - قسم العلاج الطبيعي : جميل جدا و فرص عمل فيه للبنات و الاولاد ( جلسة العلاج الطبيعي ب 50 دينار و مرات اكثر ) بالاضافة للعمل ف المصحات و الاسعافات و غيره و هذا فيديو مفصل عن التخصص يعجبكم : https://www.youtube.com/watch?v=UPTkZbMuWQQ - قسم علم الأدوية : القسم هذا بنتكلموا عليه بتفصيل أكثر لأن يشبه الصيدلة و ف ليبيا مفيش بينهم هذاك الفرق فالعمل صراحة غير ان الصيدلي يعطوه رخصة يفتح صيدلية خاصة و خريج التقنية لا .. بس يخدم ف أي صيدلية عادي جدا فلو إنت معندكش جو لخمس سنوات صيدلة اقراه عادي . - قسم التخدير ( أو تخدير و عناية فائقة ) : هذا ما يفرقش واجد عن الموجود ف التمريض تكلمنا عليه سابقا جميل و مطلوب ف العمل . - قسم الأغذية : و هنا يصير للناس تلخبيط يحسابوه تغذية في جامعة مصراتة التغذية اللي تخليك أخصائي موجودة ف التمريض و التغذية اللي تخليك طبيب تغذية ( حتى الطب النفسي ) لازم تقرا بشري قبل .. أما ف طرابلس و باقي المناطق الموضوع يختلف .. الاغذية حسب كلام خريجة من القسم ف مصراتة تعلمك حاجات عن الأكل و جسم الانسان صح بس ما يخلوكش تخدم ف المستشفيات و نرد نقول الموضوع يفرق من كلية و من منطقة لأخرى . - قسم المختبرات : مفيش عليه كلام يعني يخدمك ف اكثر من مكان و مطلوب و جميل بس عيوب الاقسام المشهورة انها زحمة و صعب تبان و تتفوق فيها بيكون عندك منافسين . - قسم تقنية الأسنان : تشتغل في معامل الاسنان ادير تركيبات و اطقم و ما إلى ذلك .. أو ممرض أسنان جميل التخصص هذا و برا يهتموا بيه اكثر . بالنسبة للمنطقة الغربية اغلب المدن قسم الصحة العامة أو البيئة يكون ف التقنية الطبية يهتم بالتوعية الصحية و الجو هذا .. أما في بنغازي في كلية خاصة بالعلوم الصحية هذي و نسبة القبول جيد ، اول سنة عام و بعدها تختار تخصص من ثلاثة ( تغذية / إدارة صحية / بيئة ) و أي معلومات قاعدة ف الرابط هذا : http://phealth.uob.edu.ly باقي الأقسام في التقنية بعض منها مش مفعلة زي البصريات مثلاً، أو موجود ف جامعة مش موجود ف الثانية، عطيناكم المعلومات مختصرة عشان تستفيدوا و تقروه مش لايكات بلا فايدة ! دعوة طيبة منكم لمجهوداتنا و بالتوفيق ليكم طلبتنا و ربي يفتح عليكم <3 .