Tarefas

Primeira parte: facer as fotografías

Vas realizar sete fotografías nas que aparezan unha ou varias persoas, atendendo ao seguinte guión :

1. Un gran plano xeral (GPX)
2. Un plano xeral (PX)
3. Un plano enteiro (PE)
4. Un plano americano (PA) dunha persoa ou varias persoas
5. Un plano medio (PM) dunha persoa ou varias persoas
6. Un primeiro plano (PP) dunha persoa
7. Un plano de detalle (PD)

Organizados en parellas, cada alumna/o tomará fotos da/o compañeira/o.

Individualmente, realizarás nove fotografías sen persoas, coas seguintes características:

1. Un picado
2. Un contrapicado
3. Unha fotografía onde predominen as liñas verticais
4. Unha fotografía onde predominen as liñas horizontais
5. Unha fotografía onde predominen as liñas diagonais
6. Unha fotografía onde predominen as liñas curvas.
7. Unha fotografía onde predomine a gama cálida (vermellos, ocres, laranxas)
8. Unha fotografía onde predomine a gama fría (azuis, verdes, violetas)
9. Unha fotografía "artística" de temática e técnica libre.

NOTA: As fotografías poden realizarse indistintamente en branco e negro ou cor (excepto a 7 e a 8 do segundo grupo). Isto déixoo á túa elección persoal.

Segunda parte: a Presentación

Coas fotografías anteriores e no mesmo orde do guion, vas realizar unha Presentación en Google Drive ou Impress, que logo subirás á Aula Virtual, na Entrega da Tarefa. A portada incluirá o teu nome e apelidos, nome da asignatura (EPVA), curso, e o título que ti queiras poñerlle.

Cada diapositiva terá un título: "Primeiro plano", "Liñas curvas", etc.

Terceira parte: o Diario, parte primeira

Crea un Documento de Texto chamado "Diario fotográfico de ______" (e o teu nome).

Visita á galería de grandes fotógrafos/as que se propón como recurso na páxina «Axuda e mais info». Estuda TRES fotografías, cada unha dun fotógrafo diferente. No teu Diario fotográfico, engade unha páxina que se chame «Un gran fotógrafo» (ou fotógrafa). Cita os nomes, lugar de nacemento, e anos entre os que viviron os tres fotógrafos ou fotógrafas que estudiaches, e termina o documento razoando a elección da fotografía que máis che gustou das estudadas. Inclúe a foto no teu Diario, e fai un comentario sobre a foto escollida: que se ve nela, e por que a escolliches.

Cuarta parte: o Diario, parte segunda

Fala no Diario das fotos que presentaches, e da túa valoración desta tarefa, nos seguintes apartados:

• modelo de cámara/móbil que utilizaches,
• breve descrición de cada fotografía que realizaches,
• dificultades atopadas,
• satisfacción co resultado,
• que aprendiches sobre fotografía.

En resumo:

• Entregaranse dous documentos: unha Presentación e un Diario fotográfico.
• Liga a túa presentación dende Google Drive.
• Sube o teu Diario como arquivo adxunto polo procedemento de entrega na Aula Virtual.