"Na punta do pé" (Pesdelán, 2010)
"Na punta do pé" é un libro-CD editado por Kalandraka no ano 2010. Fai unha recolla de cantigas, danzas e xogos musicais tradicionais galegos.
Nós, para este proxecto, facemos uso dunha cantiga recopilada neste álbum, chamada "A pulga na palla", para a que Pesdelán fai un arranxo musical e crea unha coreografía en forma de roda que mestura a mímica e a danza.
A melodía da cantiga foi recollida do arquivo de Mini e Mero, dispoñible para consulta grazas ao Arquivo do Patrimonio Oral da Identidade, iniciativa do Museo do Pobo Galego.
Letra de "A pulga na palla"
A pulga na palla
quíxose casar,
faltáballe o pan,
onde o foi buscar?...
Saíu o raposo
detrás do toxeiro.
Chamádeme a min,
que eu son panadeiro.
Imos todos aprender
os oficios a facer.
Agora, "mi vida",
panciño xa temos,
fáltanos a roupa,
onde atoparemos?...
Saíu, ai! a araña
da súa arañeira.
Chamádeme a min,
que eu son tecedeira.
Imos todos aprender
os oficios a facer.
Agora, "mi vida",
roupiña xa temos.
Fáltannos gaiteiros,
onde os buscaremos?...
E saíu o grilo
ai! do seu grileiro.
Chamádeme a min,
que eu serei gaiteiro.
Imos todos aprender
os oficios a facer.
Agora, "mi vida",
gaiteiro xa temos.
Fáltannos danzantes,
onde os buscaremos?...
E saíu o raposo
por moi abundante.
Chamádeme a min,
que eu serei danzante.
"o piollo e a pulga" pablo díaz
No seu disco "Toc Toc" (Galaxia, 2014), Pablo Díaz fai unha versión semellante á cantiga "A pulga na palla", titulada "O piollo e a pulga". Entre as dúas, hai variacións no léxico e na melodía, mais comparten esencia. Esta canción está dispoñible na lista de Spotify do proxecto "Oficios en Miúdo".
Letra de "O piollo e a pulga"
O piollo e a pulga
querían casar.
Non tiñan panciño
para escomezar.
Saíu a formiga
do seu formigueiro.
Mandaime recado
que eu son panadeiro.
Instrumental
Ai, miña vidiña,
panciño xa temos,
fáltanos carniña,
onde a atoparemos?...
E saíu o lobo
detrás dun outeiro.
Mandaime recado
que eu son carniceiro.
Instrumental
Ai, miña vidiña,
carniña xa temos,
fáltanos os manteis,
onde os atoparemos?...
E saíu a araña
da súa arañeira.
Sígase a voda
que eu son tecedeira.
Instrumental
Ai, miña vidiña,
manteis xa temos,
fáltanos gaiteiro,
onde o atoparemos?...
E saíu o grilo
dende o seu fuxeiro.
Por iso non quede
que eu son gaiteiro.
Instrumental
Ai, miña vidiña,
gaiteiro xa temos,
fáltanos madriña,
onde a atoparemos?...
E saíu a rá
da poza veciña.
Sígase esa voda
que eu son a madriña.
Instrumental
Ai, miña vidiña,
madriña xa temos,
fáltanos padriño,
onde o atoparemos?...
E saíu o rato
do seu buraquiño.
Se prenden ao gato
eu serei padriño.
Instrumental
No medio da voda
con tanto ruído
espertou o gato
e comeu ao padriño.