Verkefnið

Verkefnið er á íslensku í Osmo library og heitir 1-3 bekkur. Nemendur vinna verkefnið á sínum hraða og snýst hvert borð um að safna 100 stigum, að því loknu getur nemandinn byrjað aftur. Að safna 100 stigum gæti tekið frá 20 mínútum og jafnvel upp í 80 mínútur eða lengur. Um er að ræða 70 orð sem hafa verið sett inn í albúmið og með hverju orði fylgir mynd sem fengnar eru í Unsplash myndasafni sem er tengt við Osmo.

Verkefnið snýst um að nemendur átti sig á hver fyrsti stafurinn er í hverju orði, í fáeinum orðum skulu þau finna út hverjir fyrstu tveir stafirnir eru. Þau fá nokkrar tilraunir til þess að finna réttan staf. Börnin leggja valdan bókstaf fyrir framan spjaldtölvuna sem er á Osmo standinum og á sama tíma nemur myndavélin í tækinu hver bókstafurinn er og lætur samstundis vita hvort barnið hafi valið réttan eða rangan bókstaf. Ef um er að ræða rangan bókstaf þá fær barnið allt frá 5 og upp í 8 tilraunir til þess að finna réttan bókstaf. Þegar réttur bókstafur er settur kemst barnið á næsta orð.

Allir kennarar geta búið til Íslenskt orðasafn inn á Osmo, en það er gert í tölvu og þarf að bíða í nokkra daga til þess að fá það samþykkt eða ekki. Einn af mögum kostum við að vinna þetta verkefni með nemendum í Osmo er sá að verkefnið er í sjálfu sér ekki klárað og er því engin samkeppni á milli nemanda. Námsefnið er því einstaklingsmiðað og þegar tímavakinn hefur talið þann tíma sem kennarinn setur þá stoppar hver og einn þar sem hann er staddur og getur síðan byrjað aftur á sama stað inn á sínum aðgangi í næstu kennslustund.

Við bendum á skemmtilega og frumlega tímavaka inn á classroomscreen

Bekkur: Skólahópur - 3.bekkur

Námsgrein: Íslenska - málfræði

Tímafjöldi: 2-4 kennslustundir

Undirbúningur

Kennari gerir aðgang fyrir sig inn á my.playosmo.com því næst gerir hann aðgang fyrir hvern nemanda. Kennarinn þarf að sækja Osmo word inn í hverja spjaldtölvu og einnig albúmið 1-3 bekkur inn í hverja spjaldtölvu eða leiðbeina nemendum í fyrsta tímanum hvernig þau sækja forritið og albúmið inn í library, það getur verið gert með því að varpa af spjaldtölvunni upp á skjá og láta alla fylgja eftir í sínum spjaldtölvum á sama tíma.

Kennsluhættir

Kennsluaðferðir sem eru að mestu einstaklingsmiðaðar og reyna á skilning, samvinnu, einstaklingsvinnu og gagnrýna hugsun. Eftir innlögn og útskýringar kennara vinna nemendur sjálfstætt (eða náið en þó hvert með sitt tæki og sinn aðgang) að verkefnum sínum. Unnið er með innlögn stafa, hljóð þeirra og er málfræði samtvinnuð inn í verkefnið. Mikilvægt er að börn viti hverju þau stefna að, hver tilgangurinn er og hvenær verkefninu sé lokið.

Námsmat

Námsmat hvers og eins birtist inn á aðgangi kennarans og þar geta kennarar séð hvernig hverjum og einum gengur.

Námsefnið hentar fyrir skólahóp í leikskóla og 1-3. bekk.