مقدمة : 

قال المسيح بشكل واضح تعلموا منى
نتعلم منه في كل شيء ولكن هنركز النهارده على ان نتعلم منه ان نكون معلمين ، احنا كمسيحيين او كخدام بنعلم طوال الوقت بنعلم ناس حوالينا في المدرسه او صحاب وكخدام بنعلم مخدومين في منهم قريب جدا من ربنا وفي منهم ناس بعيد جدا وما يعرفوش فلازم نقدر نعلم كل دول زي ما المسيح قدر يوصل لكل دول عشان كده هنركز على المسيح كمعلم 

في إنجيل لوقا بيتقال 

"وَرَجَعَ يَسُوعُ بِقُوَّةِ الرُّوحِ إِلَى الْجَلِيلِ، وَخَرَجَ خَبَرٌ عَنْهُ فِي جَمِيعِ الْكُورَةِ الْمُحِيطَةِ وَكَانَ يُعَلِّمُ " (لو ٤: ١٤- ١٥)

دايما الصفه الملازمه للمسيح هي المعلم ، لان كان كل اللي بيعمله هو تعليم 

حتى ما كانش بيطلب من التلاميذ ان هم يدونوا التعليم دي في الاناجيل هو كان عايزهم يعيشوا التعليم لانه ده الاهم وتدون بعدين عادي المعجزات كانت حاجات بتيجي على الماشي كده مش دايما ولكن الاساس ان ه  بيجمع الناس حواليه ويعلمهم 

رغم ان المعجزات كانت هي اللي بتعمل صدى كبير وبتلم الناس ولكن هو كان عار  ان اللمه دي في الاخر اللي هيقول ان ده شيطان وهو بيستخدمه واللي هيقول اصل ممكن يكون في خدعه فكان الاهم ان الناس تصدق بالكلام

فهنبدأ نتكلم عن النقط اللي ممكن نتعلمها: 

١. بدون مثل لم يكن يكلمهم

كلنا ممكن نقول كلام كبير اوى ومجعلص اوى ويبين قد ايه احنا مثقفين وقرينا كتب كثير ولكن المسيح لما كان بيعلم وهو اعلم مننا بكثير ما كانش بيتكلم غير بالامثال 

يشبه ملكوت السماوات خميره صغيره يشبه العشر عذاره مثل زارع ومثل وزنات حكايات كتيير يوصل بيها لكل الناس 

تفتكروا ليه بيحب ده؟
جرب كده تحضر وعظه من اللي هي كلها كلام مرسل وتاملات ممكن تلاقي الناس نامت ، بس اول ما ابونا يقول يلا نحكي حكايه تلاقي الناس بدات تتعدل  فالمسيح كان عارف ان الناس تحب الحكايات وكان عايز يوصل للعقول البسيطه وكمان حكاياته كانت بتبقى قصيره لان الحكايات الطويله في ناس بتزهق منها 

فكان دايما بيقول امثال ويحاول يخليها قصيره و كلها شبههم هما و عايشينها 

وايه مميزات الطريقة دى؟
المثل يبسط المعنى ويحفظك الحقيقه يعني مثلا ممكن تتكلم عن ان الملكوت ممكن يغير انسان وتقول ان هى فكره صغيره هتتزرع في دماغه وفي قلبه وبعد كده هتمتد وتنتشر ، ولكن لو قلت هي بذره هتترمي في الارض تبدا تطلع جذور و تطلع شجره ده يتفهم ويتحفظ كمان 
و كمان بتراجع 

مثلا وهم على الجبل وشافوا عصفوره وقال لهم شايفين العصافير دي انا بعرف اعتني بيها وهعتني بيكم بس انتم ما تهتموش بالارضيات بعد كده اي حد هيشوف عصفوره هيفتكر الكلام ده

٢. يعلق على المواقف لا يعظ او تعليم على الماشى

ثاني طريقه في الوعظ هي التعليق على المواقف ده بيتوصف كده بان هو تعليم على الماشي ، زي ايه مثلا عايز يعلمهم ان ما تحاولش تسعى لمجد عشان ده هيقلل منك 

ملمش الناس وقال لهم انا عندي وعظه وجهز موضوع وراح قاله ، كان في عزومه ولقى الناس بتتسابق عشان تاخد كرسي وتقعد قدامه فقام قالهم لما تتعزم لو قعدت قدام ممكن صاحب البيت يجي يحرجك ويقول لك ده مش مكانك ولكن لو قعدت ورا هتلاقي الناس بيقول لك يا ابني انت قاعد ورا ليه اتفضل قدام بقى بكده بقى ليك قيمه اكبر عشان ما ساعدش انك تكون انت اللي قدام 

دي تاني طريقه في التعليم عشان المواقف تثبت 

تشوف مخدومينك في موقف وتعلق عليه في ساعتها يثبت في دماغهم اكثر من 100 درس محضره احسن تحضير 

٣. تصحيح المفاهيم 

لو سألناكم ايه اكثر حاجه بتكرهوها في المدارس هتقولوا انهم بيحشوا دماغنا معلومات عشان في الاخر نكبها في الامتحان ، فالمسيح ما كانش بيعمل كده يعني ما جاش للناس دول يقول لهم على فكره لازم تعملوا كذا وكذا وكذا 

شاور لهم على حاجات غلط ممكن يكونوا فاهمينها ويقول لهم ايه الصح بتاعها

ايه امثلة الموضوع ده؟
يعني مثلا لما جم اليهود ولقوا التلاميذ ماسكين القمح وقالوا له تلاميذك بيكسروا السبت ما بصيتش للتلاميذ وقال لهم عيب كده يا ولاد ولا بصوا دول قال لهم انتم متعصبين ومش بتفهموا انما بدا يحكي لهم ويدخل في المفهوم ، هو السبت اتعمل ليه ... وارجع لهم لقصه داوود لما دخل المسبح واكل من خبز التقدمة ومحدش اعتبرها خطيه

٤. مبدأ الحوار 

المسيح كان لازم ياخد ويدي مع اللي قدامه اللي بيسمع يسال والمسيح يسال عشان يفهم اللي قدامه وبيفكر في ايه فيفهم هو محتاج ايه 

ايه رايكم .. مش ممكن الموضوع ده يشتتنا و ياخدنا لحتت مش عايزينها؟ 

مستحيل افهم انت ايه اسئلتك او ايه اللي مش فاهمه لو انت قاعد ساكت وانت لو فضلت قاعد ساكت اللي جواك ده مش هيتحل ابدا

والحوار ده هيخليني انا وانت مش ناسيين اللي اتقال ، لان ياما قعدنا قدام ناس وقعدوا يتكلموا ويحكوا وما افتكرناش هم قالوا ايه ،بس لو انا دخلت مع اللي قدامي ده في جدال هفتكر الحوار كويس اوى

٥. يتكلم عن كل حاجه فى الحياه 

مش بس السماويات و لكن ناقش كل حاجة

مش انا خادم في الكنيسة .. ليه مهم أتكلم عن حاجات تانية؟ 
لو احنا مزرعناش الأفكار الصح في التعامل في المواقف المختلفة هناخد الأفكار دي من العالم ، و العالم مبدع اليومين دول في الأفكار الغلط اللي عمال يزرعها و يدعمها فعشان كدة المسيح اكدلنا ان لازم نتكلم في النقط دي
فتلاقيه أتكلم عن الجواز و العلاقات والصداقة و مثلا موضوع قيصر لما ادوه العملات و قالهم دول بتوع قيصر 

٦. يعمل و يعلم 

يبدا سفر اعمال الرسل بالآية  

"اَلْكَلاَمُ الأَوَّلُ أَنْشَأْتُهُ يَا ثَاوُفِيلُسُ، عَنْ جَمِيعِ مَا ابْتَدَأَ يَسُوعُ يَفْعَلُهُ وَيُعَلِّمُ بِهِ" (أع ١: ١)

ليه لازم؟ وهل المسيح طلب ان اللي يتكلم لازم يكون مثالي؟ 

"فَقَالَ: «وَوَيْلٌ لَكُمْ أَنْتُمْ أَيُّهَا النَّامُوسِيُّونَ! لأَنَّكُمْ تُحَمِّلُونَ النَّاسَ أَحْمَالًا عَسِرَةَ الْحَمْلِ وَأَنْتُمْ لاَ تَمَسُّونَ الأَحْمَالَ بِإِحْدَى أَصَابِعِكُمْ." (لو ١١: ٤٦)

على الأقل أحاول اعيشه 

٧. التشجيع دائما 

طوباكم ايها المساكين فى الروح .... صيغة تخاطب 

كان بيقولها لناس مبتدئين فى الحياه الروحية ، , لكن ده اللى حسسهم ان فيه امل 

مش قالهم اوعوا تعملوا و اوعوا و بحذركم

ليه الناس كانوا بيسيبوا الهيكل عشان يمشوا وراه؟ 

كان في المقابل ده الكلام اللي بيتقال جوه الهيكل الناموسيين كانوا مطلعينهم ما بيعملوش ولا حاجه صح ولكن كانوا يروحوا للمسيح يلاقيه بيقول لهم ده انتوا تعبكم ده انا مقدره ، ده اقل مساعده هتساعدها لحد انا مقدرها فده كان كلامي يشجعهم فعلا انهم يعيشوا حياه روحيه، انما التانيين دول يطلعوا من عندهم طب ما انا كده كده بايظ ما جتش يعني على دي 

ما ينفعش تيجي الواحد بيحاول يتغير ومعلوماته ممكن تكون مش قد كده وتقول له ايه ده هو انت مش عارف كذا وكذا ازاي يا ابني هو انت مش عارف القصه الفلانيه يعني ايه ده كله ممكن يحسس اللي قدامك انه طب خلاص انا بعيد اوى احاول ليه

٨. لا يخل من التحذير و التخويف 

كلام متناقض جدا !! ... ايه رأيكوا ؟

الشخص اللي يحسس اللي قدامه ان هو ضامن ملكوت السماء دايما ده غشاش حتى الانسان لو حس ان حياته كويسه مش هيقدم توبه عشان كده المسيح في خدمته كان متوازن 

زي ما قلنا النقطة اللي فاتت بيشجعهم جدا ولكن في نفس الوقت بيحذرهم اني حاسبوا من كذا ومن كذا 

يعني في مره قال لهم ان المجيء الثاني ده عامل زي طوفان نوح، طب ايه اللي يخوف في كده؟

إن ساعة طوفان نوح ما دخلش الفلك غير كام فرد بس الباقيين كلهم هلكوا، هو كان بيخوفهم انه مش هيبقى فيه تحذير الموضوع هيكون فجأة وان ساعتها مش هيبقوا كتير اللي مستعدين 

٩. الحياه الأبدية 

اكتر حاجه المسيح أتكلم عنها هي الحياة الأبدية وهي دي هدف كل خادم اللي لازم يوصله للمخدومين 

ليه دي اهم نقطة واتكلم عنها كتير؟ 

كل الكلام اللي فات ده بيتقال عشان احنا واللي بنخدمهم يكون في الاخر مكاننا الملكوت

وكان بيتكلم كتير وقال عليها أمثال كتير زي مثل الشبكة والصيادين وانهم بعد كده بيختاروا ايه السمك الكويس وايه السمك اللي هيرجع تاني 

وبيحكي لهم عن شكله وايه اللي هيحصل في اليوم ده عشان كلنا كمسيحيين هو ده الهدف من حياتنا

مصادر اخرى: 

سلسلة وعظات لابونا داود لمعى 

السيد المسيح المعلم الأعظم

كتاب لمحات سريعة في إنجيل كاروزنا | إنجيل معلمنا مرقس - الراهب القمص بطرس البراموسي فصل 12- المسيح المُعَلِّم

المسيح المعلم الانبا رفائيل