Старонкі гісторыі малой радзімы
Прыйшоў час кожнаму ўспомніць аб сваіх каранях, аб месцы, дзе засталася часцінка душы і аддаць абавязак гэтаму кутку зямлі.
Указ Презіэднта Рэспублікі Беларусь №247 ад 20.06.2018 г. "Аб правядзенні Года малой радзімы"
Дарагія сябры!
Запрашаем вас у вандроўку па жырмунскім краі! Спадзяемся, што вы разам з намі прыадчыніце нязведаныя старонкі гісторыі нашай малой радзімы!
У пісьмовых крыніцах Жырмуны ўпершыню ўпамінаюцца ў XV ст. як маёнтак роду Бутрымаў. Каля 1437 году баярын Войцех Кучук заснаваў тут касцёл. У канцы XV — пачатку XVI стагоддзяў маёнтак знаходзіўся ва ўладанні Мантоўтавічаў.
У 1513 годзе Жырмуны перайшлі да Юрыя Радзівіла. Згодна з адміністрацыйна-тэрытарыяльнай рэформай 1565—1566 гг. яны ўвайшлі ў склад Лідскага павету Віленскага ваяводзтва. У 1613 г. Жырмуны значацца як мястэчка. У XVII ст. мястэчка перайшло ва ўладанні Завішаў. У 1624 годзе Ян Завіша збудаваў тут новы касцёл.
У пачатку XVIII ст. Жырмуны зноў перайшлі да Радзівілаў. У 1724 годзе кароль і вялікі князь Аўгуст Моцны надаў мястэчку Магдэбурскае права. У 2-й палове XVIII ст. тут існавалі школа і шпіталь. На 1777 г. у Жырмунах быў 31 двор. У 1788 г. Караліна Радзівіл заснавала ў мястэчку касцёл Святога Крыжа.
Касцёл Адшукання Святога Крыжа ў аг. Жырмуны - помнік драўлянага дойлідства ХVІІІ ст.
Драўляная званіца ХVІІІ ст. ля касцёла Адшукання Святога Крыжа
Палацава-паркавы комплекс Радзівілаў
У другой палове XVIII ст. Станіслаў Радзівіл вырашыў пабудаваць у фальварку Жырмункi, які знаходзіўся недалёка ад яго маёнтка, палацава-паркавы комплекс. Ім былі пабудаваны прыгожая ўязная брама, два бакавыя двухпавярховыя афіцыны ў стылі класіцызму, прычым паўднёва-ўсходнюю афіцыну з багатым афармленнем унутраных інтэр’ераў, займалі самі Радзівілы; у паўночна-заходняй афіцыне жыла прыслуга. Былі пабудаваны таксама гаспадарчыя пабудовы, пасаджаны вялікі і прыгожы парк. Будаўніцтва самога палаца з-за смерці князя ў 1787 годзе не было распачата. У 1915 і 1939 гадах сядзіба была разрабавана. Апошнія ўладальнікі Жырмунскага Радзівілаўскага палаца выехалі адсюль у 1939 г. Комплекс не унесены ў спіс гісторыка-культурнай спадчыны Беларусі. Цяпер Раздівілаўскі комплекс — паўразбураны.