У кузні горача, дымна. У горане цэлы дзень гарыць агонь. І каб ён гарэў як мага мацней, падручны каваля паддзімае ў горан паветра скураным мехам.

Пасярэдзіне кузні стаіць тоўстая калода з жалезнай падстаўкай — кавадла. На кавадле каваль працуе з гарачым металам. Побач знаходзіцца карыта з вадой.

На сценах кузні паліцы. На паліцах прыспасобы, якія зрабіў сам майстар. Тут вялікія і малыя малаткі, абцугі. Для прабівання адтулін у нагрэтым метале — прабойнікі. Зубілы, якімі каваль сячэ метал. Для вырабу цвікоў — цвікарні.

Каля сцяны з акенцам стаіць спецыяльны стол — варштат. На варштаце прымацаваны ціскі. Побач ляжаць інструменты для заточкі і рамонту вырабаў.