1. EZKUTAKETA JOLASA

NOLA JOLASTEN DA? Ezkutaketan jolastu behar duten pertsonen artetik bilatzailea (geratzen dena eta zenbatu behar duena) zotz eginez aukeratzen da. Bilatzaileak etxea izeneko pareta edo adosten den zerbaiti begira begiak itxita dituela zenbaki kopuru bat (30 adibidez) kontatu behar du ozenki (bat, bi, hiru, ...), beste guztiak etxean ezkutatzen diren bitartean. Kontua bukatzen denean, bilatzailea ezkutatu diren jolaskide guztiak bilatu behar ditu. Bilatzaileak ezkutatutakoren bat ikusten duenean, etxera joan behar du ikusitakoaren izena eta ezkutalekua ozenki esanez. Ikusitakoa bilatzailea baino lehenago iristen bada etxera, etxea ukitu eta "nigatik!" esanez libratu egiten da eta hurrengo txandan berriz ere ezkutatu ahal izango du. Bilatzaileak ezkutatutako guztiak aurkitzen dituenean berriro hasiko da jolasa lehena ikusitakoa geratuz.

ALDAERA: Etxe gisa pilota bat erabil daiteke eta orduan libratzeko pilota jo egin behar da. Bilatzailea lehenago iristen bada, hautemandako haurra harrapaturik geratzen da. Harrapatutako lehenengo haurrak jolastuko du hurrengo txandarako bilatzaile gisa. Jolasa gehiegi ez luzatzeagatik komeni da aurrez ezkutalekuen eremua eta ezkutatutakoak hautemateko gehienezko epe bat finkatzea.