Cebu Bus Classics > 2026 Compilations

Usa sa gikahinaman sa mga estudyante kaniadto ang pag-atang sa bus sa Barino Transit. Matud pa sa nakasakay na niining bus liner, usa ka dakong tabang ang pag-biyahe niining bus ilabi na sa mga estudyante nga short na sa budget ug sa mga wala nay ikaplete pauli sa tagsa-tagsa ka destinasyon. Gani, sa matag higayon nga ang maong bus mopadulong na sa garahean gikan sa Siyudad sa Sugbo, ang mga estudyante mag-iyahay kini sila og saka sa bus para lang makalibre og sakay.

Mao ni ang nabansagan nga Student-friendly nga bus liner sa Cebu South.

Pero unsay kasaysayan sa maong bus liner?

Atong balikon ang panahon nga ang Barino Transit makita pa nato sa kadalanan sa Cebu South sauna. Sa mga hulagway nga makita ninyo karon, ingon-ani ang mga itsura sa mga units sa Barino Transit. White ug blue ang color sa livery ani ug adunay one red line taliwala sa puti nga kulay.

Nagsugod ang operasyon niini niadtong mga tuig 1980's ubos sa pamalakad ni Mr. Prudencio V. Barino Jr. Ang maong bus liner adunay mga ubay-ubay na mga buses sa ilahang kompanya, kasagaran mga open-air. Aduna silay franchise route nga mogikan sa Cebu South Bus Terminal ngadto na sa Lungsod sa Moalboal via Carcar City.

Base sa mga impormasyon nga nakalap, ang Barino Transit usa kini ka bus liner nga gipanag-iya kaniadto sa mga Villanueva. Gani sa impormasyon nga atong nakuha, ang maong tag-iya nga si Mrs. Bulak Villanueva nakasal kay Mr. Prudencio V. Barino Jr., ug siya na ang mao'y nagpalambo sa maong bus company.

Ang Barino Transit nagsilbi sa mga pasahero sa 3 ka dekada, hangtud sa katapusang biyahe niini niadtong tuig 2002.

Same unit number, same bus company, pero managlahi ug kapanahunan. Mao ni ang hulagway sa duha ka sakyanan diin ang karaan nga Cebu Autobus ug ang modernong Island Autobus parehong nigamit sa unit number 1002.

Feature sa hulagway ang Cebu Autobus nga usa ka minibus, ug adunay body number 1002. Sa maong pagpakisusi, ang maong unit usa kini ka Mercedes-Benz nga brand kay makita niini ang logo sa ibabaw sa bumper niini. Ordinary non-aircon kini nga minibus ug adunay roof rack para sa mga packages, mga sobre ug uban pa nga mga essential goods kay ang maong bus company ang official contractor sa Bureau of Posts. Ang maong hulagway napitikan niadtong 1962 sa usa ka advertisement sa Cebu Trade Directory.

Samtang sa pikas bahin, ang modernong Island Autobus 1002 nga ubos sa Metro Cebu Autobus Corporation usa ka airconditioned unit, ug ginama sa Del Monte Motor Works. Dili sama sa karaan nga Cebu Autobus 1002, ang mga karga niini iplastar sa mga compartments sa ubos nga bahin sa bus. Mas daghan pa nga pasahero ang maakomodar sa maong unit ug mas pinanindot pa ang travelling experience niini kay adunay mga safety features ang maong unit.

-

Tinubdan:

● 1962 Cebu Trade Directory from Ben Chua collection / MyCebu.ph / Colorized using an AI-generated platform

● JeaneL1218

AJS / CBS

Ania ang usa ka talagsaong hulagway nga nagpakita sa mga nagkahilerang bus sa Cebu San Sebastian, usa sa mga iladong provincial bus operators nga nagsilbi sa amihanang bahin sa Sugbo niadtong dekada '90.

Makita sa kilid sa usa sa mga unit ang ilang franchise route kani-adto nga Cebu City – Daanbantayan via Kawit ug vice versa.

Kini nga ruta usa sa mga importanteng koneksyon tali sa siyudad ug sa mga lungsod sa amihanang Sugbo kani-adto.

Usa sa mga unique nga detalye niini mao ang pangalan nga "Kate" nga makita sa atubangan sa mga unit. Sa kultura sa transportasyon sa Sugbo, sagad sa mga bus nga naay pangalan sa atubangan sa maong mga units nagrepresentar sa tag-iya, pamilya, o usa ka espesyal nga pagkatawo sa maong unit.

Apan mas makapa-interes pa niining parteha ang mga nakaimprenta sa windshield sa matag bus.

Ang ilang mga unit giangga-an ni ug mga pangalan sa mga sikat nga NBA Basketball Teams nga usa ka timailhan sa dakong impluwensya sa basketball sa kultura sa Pilipinas niadtong dekada 1990.

Sa unang tulo ka bus gikan sa wala nga bahin sa litrato, maklaro sa windshield ang mga signages nga:

• Charlotte Hornets

• Chicago Bulls

• Miami Heat

Dugang nga impormasyon nga ang duha niini nga naa sa pinakatumoy na nga parte sa hulagway mao ang units sa Boston Celtics ug Los Angeles Lakers.

Kini nga hulagway dili lamang usa ka larawan sa mga karaang bus sa Sugbo, apan usa usab ka pagpamalandong sa kultura sa maong panahon, diin ang transportasyon ug ang kahilig sa basketball naghi-usa sa paghimo og talagsaong pagkatawo sa matag unit nga nagdagan sa atong kadalanan.

Sa panahon nga wala pay LED signboards ug fleet numbers nga maoy unang mabantayan, ang mga buses sa Sugbo nailhan pinaagi sa ilang mga ngalan ug personalidad. Ang matag unit adunay kaugalingong pag-ila nga dali mailhan sa mga pasahero ug mga spotters, nga nahimong bahin sa daghang panumduman sa pagbiyahe sa mga kadalanan sa Sugbo.

Kinsa sa atong mga kauban ang nakaabot pa sa Cebu San Sebastian? Nakasakay ba mo ani nga mga unit paingon sa amihanang Sugbo? Ipaambit ang inyong mga panumduman ug istorya sa comment section.

Kuha gikan ni Mr. Arphel Dejito ug mapasalamaton kami nga gitagaan kami ug permiso nga mapost ang kuha sa amoang official FB page. Amping kanunay sa biyahe aydol!

AJS / CBS

Gipadangat sa atoa ni Mr. Rogelio Alviola ang usa sa mga talag-saong hulagway sa usa sa bus nga kanhi nagbiyahe sa Toledo City niadtong dekada '80s.

Ang hulagway, usa ka hamtong nga lalaki nga nagsandig sa usa sa mga units sa Juliet Express, ang Jul-Cris sa pinakanindot nga stickers sa gimontar nga unit.

Sumala pa sa mga tinubdan, ang Jul-Cris ang usa sa 7 ka mga units sa Juliet Express nga gipanag-iya ni Mr. Cerilo Borgonia, ug magruta ni gikan sa Cebu South Bus Terminal padulong sa Toledo City, Cebu.

Gawas sa Jul-Cris, ang Juliet Express nag operate usab sa mga bus units sama sa Jul Joe, Jul Cil, Jicemer, Mark, Cer Mar ug Jul Jun.

SI Mr. Rogelio Alviola ang usa sa mga beterano nga sticker designer ug naghatag ug kinabuhi sa mga sakyanan sa south pinaagi sa mga nindot nga kulay ug design, ug usa na ang Juliet Express.

AJS / CBS