Ушанаванне памяці Максіма Багдановіча ў Мінскай абласной бібліятэцы імя 

А. С. Пушкіна

У верасні-кастрычніку 2022 г. у Мінскай абласной бібліятэцы імя А. С. Пушкіна экспанавалася перасоўная выстава “Паэзія, якая яднае. Максім Багдановіч – прыклад самаадданага служэння Радзіме”, арганізаваная сумесна з Літаратурным музеем Максіма Багдановіча.

22 верасня прайшла першая прэзентацыя выставы, якая паклала пачатак дзейнасці абласнога праекта “Пісьменнікі-ўраджэнцы роднага краю” ў бібліятэцы, загадчыкам Літаратурнага музея Максіма Багдановіча Міхаілам Бараноўскім. У рамках праекта пачалася праца па папулярызацыі творчасці класіка беларускай літаратуры – Максіма Багдановіча.

Падчас мерапрыемства даследчык расказаў пра пісьменніка і яго сям’ю, звярнуў ўвагу на цікавыя звесткі з дзіцячых і юнацкіх гадоў Максіма, распавёў пра літаратурную творчасць беларускага паэта. Бібліятэка падрыхтавала да прэзентацыі кніжную выставу, дзе можна было пазнаёміцца з выданнямі, прысвечанымі асобе пісьменніка, пазнаёміцца з апошняй кнігай, якая выйшла да 130-годдзя з дня нараджэння Максіма Багдановіча (1891–1917) – “Максім Багдановіч” (2021). Асаблівую цікавасць у слухачоў выклікала інфармацыя пра бібліятэку Адама Багдановіча, бацькі пісьменніка, якая захоўваецца ў фондах Цэнтральнай навуковай бібліятэкі імя Якуба Коласа НАН Беларусі.

 З 1 снежня па 20 снежня 2022 года ў Мінскай абласной бібліятэцы прайшоў Міжнародны анлайн-конкурс чытальнікаў “Пад Зоркай Венеры”.

Конкурс чытальнікаў “Пад зоркай Венеры” праводзіўся з 1 па 20 снежня 2022 года, да ўдзелу запрашаліся ўдзельнікі да 18 гадоў. З мэтай далучэння дзяцей да літаратурнай творчасці, пошуку неардынарных, крэатыўных форм выступленняў было задумана правесці гэты конкурс у рамках абласнога праекта, каб не толькі ўшанаваць памяць вялікага паэта Максіма Багдановіча, але і прыцягнуць увагу шырокай аўдыторыі да чытання і вывучэння беларускай літаратуры, а таксама стымуляваць творчую актыўнасць вучняў школьных і пазашкольных устаноў. 

Арганізатарам конкурсу выступіла Мінская абласная бібліятэка імя А. С. Пушкіна сумесна з партнёрамі: Дзяржаўным музеем гісторыі беларускай літаратуры, Літаратурным музеем Максіма Багдановіча, Выдавецкім домам “Звязда” (газетай “Літаратура і мастацтва”), Мінскім абласным аддзяленнем Саюза пісьменнікаў Беларусі, Беларускім дзяржаўным акадэмічным тэатрам юнага гледача, Каналам “Культура” Беларускага радыё, Прадстаўніцтвам Рассупрацоўніцтва ў Рэспубліцы Беларусь.

На адрас конкурсу адразу з першых дзён яго пачатку паступала вельмі шмат творчых прац. Усяго налічвалася каля 1800 удзельнікаў з Беларусі і бліжэйшага замежжа, таму конкурс і набыў статус міжнароднага.

 У сувязі з вялікай колькасцю творчых прац было прынята рашэнне правесці два туры адбору сярод удзельнікаў. Першы тур конкурсу праходзіў 20 студзеня – 19 лютага 2023 года, падчас якога экспертнае журы праглядзела ўсе працы. Трэба адзначыць гэтую складаную працу вызначэння з такой колькасці выдатных прац найлепшых. Сярод усіх удзельнікаў былі выбраны каля 200 лепшых чытальнікаў, якія прайшлі на наступны, фінальны этап конкурсу. 

Пасяджэнне сяброў журы і аргамітэта адбылося 27 лютага 2023 года, на якім з фіналістаў былі адзначаны 40 пераможцаў: ва ўмовах такой высокай канкурэнцыі іх працы вылучаліся большай арыгінальнасцю задумкі і выканання, дзякуючы чаму заслужана занялі свае прызавыя месцы. 27 лютага 2023 года на сайце бібліятэкі і ў сацсетках былі агучаны пераможцы конкурсу. 

Прапануем пазнаёміцца з асобнымі працамі ўдзельнікаў конкурсу:

 31 сакавіка 2023 года Мінская абласная бібліятэка імя А. С. Пушкіна сустрэла пераможцаў анлайн-конкурсу чытальнікаў “Пад зоркай Венеры”, якія прыехалі на ўрачыстае ўзнагароджанне ў суправаджэнні бацькоў, настаўнікаў і бібліятэкараў школ з розных куткоў Беларусі. Замежныя пераможцы Анастасія Еніна, Эвеліна Капітонава і Дар’я Конавалава разам з загадчыцай філіяла “Цэнтр беларускай культуры «Музей М. Багдановіча»” ў Яраслаўлі Наталляй Прохаравай далучыліся да мерапрыемства праз анлайн-эфір і пажадалі далейшых поспехаў пераможцам конкурсу. 

Падчас цырымоніі пераможцы атрымалі ганаровыя дыпломы і “зорку пераможцы”, а таксама білеты на самыя папулярныя спектаклі Беларускага дзяржаўнага акадэмічнага тэатра юнага гледача. Былі ўручаны прызы спецыяльным лаўрэатам ад партнёраў і членаў журы конкурсу, сярод якіх кіраўнік прадстаўніцтва Рассупрацоўніцтва ў Рэспубліцы Беларусь Юрый Макушын, кіраўнік Літаратурнага музея Максіма Багдановіча Міхаіл Бараноўскі, намеснік старшыні Мінскага абласнога аддзялення Саюза пісьменнікаў Беларусі Рагнед Малахоўскі, рэжысёры і кіраўнікі народнага літаратурнага тэатра “Жывое слова” Алесь Мойскі і Алеся Сівохіна, журналіст газеты “Літаратура і мастацтва” Яна Будовіч.

 Яркімі акцэнтамі святочнага мерапрыемства сталі выступленні прафесійных музыкаў і актораў: аркестра Заслужанага калектыва Рэспублікі Беларусь “Музычная капэла «Санорус»” пад кіраўніцтвам галоўнага дырыжора Вячаслава Ларына; салістаў, лаўрэатаў міжнародных конкурсаў Уладзіслава Даніловіча і Ганны Янкоўскай Беларускай дзяржаўнай філармоніі, якія выконвалі рамансы на вершы Максіма Багдановіча. Сваім арыгінальным чытаннем творчасці беларускага паэта падзяліліся ўдзельнікі народнага літаратурнага тэатра “Жывое слова” пад кіраўніцтвам Алеся Мойскага і Алесі Сівохінай. Зразумела, што святочная праграма не магла абысціся без выступленняў саміх лаўрэатаў конкурсу – вершы Максіма Багдановіча прачыталі ўдзельніца ўзорнага дзіцячага тэатра “Вясёлка” Палаца культуры г. Барань Аршанскага раёна Віцебскай вобласці Арына Рубановіч і навучэнец сярэдняй школы № 3 г. Оршы ім. У. Караткевіча Максім Голубеў.

Больш падрабязна пра ход конкурсу чытайце тут:

1. Лаўрык, Т. “Пад зоркай Венеры” : старонкі міжнароднага літаратурнага анлайн-конкурсу чытальнікаў / Т. Лаўрык // Бібліятэка прапануе. - 2023. — № 7. – С. 2–4.

2. Лаўрык, Т. Пад нязгаснай зоркай паэта / Т. Лаўрык // Літаратура і мастацтва. – 2023. – 21 крас. – С. 4.

3. Лаўрык, Т. Па шляхах літаратурных анлайн-конкурсаў / Т. Лаўрык // Краязнаўчая газета. — 2023. — № 15 (крас.). — С. 4.

4. Шпакоўская, Т. Любоў у юных сэрцах / Т. Шпакоўская // Літаратура і мастацтва. – 2023. – 7 крас. – С. 3.

 Ад партнёраў Літаратурнага музея Максіма Багдановіча на мерапрыемства прыехалі загадчык філіяла Міхаіл Бараноўскі і вядучы навуковы супрацоўнік Ірына Мышкавец, таксама прысутнічалі супрацоўнікі Беларускага дзяржаўнага архіва-музея літаратуры і мастацтва. Прыемным падарункам для бібліятэкі сталі зборнікі дакладаў па актуальных пытаннях багдановічазнаўства, перададзеныя музеем Максіма Багдановіча ў фонды ўстановы. Загадчык аддзела бібліятэказнаўства Таццяна Лаўрык паведаміла пра вынікі абласнога конкурсу на стварэнне лепшага віртуальнага рэсурсу пра пісьменніка-земляка на сайце бібліятэкі і распавяла пра карпатлівую працу па стварэнні віртуальнага музея Максіма Багдановіча. Яркімі акцэнтамі святочнага мерапрыемства сталі выступленні майстроў жывога слова: Аляксея Дубоўскага, прызёра Рэспубліканскага творчага конкурсу юных чытальнікаў “Жывая класіка”, навучэнца ўзорнага тэатра юнацкай творчасці пры Нацыянальным цэнтры мастацкай творчасці дзяцей і моладзі, і Ганны Маркавай, вучаніцы Магілёўскага дзяржаўнага абласнога ліцэя № 1, фіналісткі і пераможцы ў 2021–2022 гадах Рэспубліканскага творчага конкурсу юных чытальнікаў “Жывая класіка”, – у выкананні якіх прагучалі творы Максіма Багдановіча.

Больш падрабязна пра падвядзенне вынікаў абласнога праекта “Пісьменнікі – ураджэнцы роднага краю” і прэзентацыю віртуальнага музея Максіма Багдановіча чытайце тут:

1. Лаўрык, Т. “Пісьменнікі – ураджэнцы роднага краю” : вынікі праекта / Таццяна Лаўрык // Краязнаўчая газета. – 2023. – № 48 (снеж.). – С. 6.

2. Лаўрык, Т. Імідж ствараюць землякі : [Падвядзенне вынікаў абласнога літаратурна-краязнаўчага праекту “Пісьменнікі — ураджэнцы роднага краю”] / Таццяна Лаўрык // Літаратура і мастацтва. — 2024. — 9 лют. — С. 4.

3. Лаўрык,Т. Падвядзенне вынікаў абласнога праекта “Пісьменнікі — ураджэнцы роднага краю” / Таццяна Лаўрык // Бібліятэка прапануе. – 2024. – № 3. – С. 38–40 + 1 вокл.