У дадзеным раздзеле прадстаўлены вынікі работы абласной творчай групы намеснікаў загадчыкаў па асноўнай дзейнасці па тэме
«Метадычнае суправаджэнне педагогаў па пытаннях арганізацыі адукацыйнага працэсу на беларускай мове»

Адной з галоўных прычын з’яўляецца тое, што сучасныя беларускія дзеці з самага нараджэння чуюць і вучацца размаўляць на рускай мове, маюць зносіны на ёй. А вось беларускую мову ў шырокім ужытку чуюць мала, таму і маюць бедны слоўнікавы запас. Такім чынам, вельмі важным з’яўляецца стварэнне камунікатыўнага асяроддзя якое б спрыяла ўзбагачэнню слоўніка дзяцей, давала магчымасць для элементарных зносін на беларускай мове, садзейнічала развіццю маўленчых навыкаў дашкольнікаў. Згадзіцеся, што ў вырашэнні дадзенай задачы вядучая роля належыць установе дашкольнай адукацыі. І тут узнікае супярэчнасць: выхавацелі павінны мець зносіны з выхаванцамі на беларускай мове, але не заўсёды могуць гэтага зрабіць, таму што самі не дасканала валодаюць ёю і не маюць магчымасці практычна развіваць ці ўдасканальваць свае маўленчыя навыкі.

Як жа вырашыць гэту праблему максімальна эфектыўна і практыка-арыентавана? Тут многае залежыць ад зацікаўленасці кіраўнікоў дашкольных устаноў у прапагандзе беларускай мовы і нацыянальнай культуры, жадання саміх педагагічных работнікаў авалодаць сродкамі роднай мовы. Папоўніць веды можна праз самаадукацыю і арганізацыю разнастайных форм метадычнай работы.

Менавіта на распрацоўку такіх метадычных мерапрыемстваў і была накіравана дзейнасць абласной творчай групы намеснікаў загадчыкаў па асноўнай дзейнасці ўстаноў дашкольнай адукацыі Мінскай вобласці ў 2019 годзе.