ഒരു പൂവിൻറെ കഥ
ഗായകൻ : പത്മശ്രീ ഹരിഹരൻ
സംഗീതം : ബിജീഷ് കൃഷ്ണ
രാഗം : മധുവന്തി
രചന : ഭാസ്കര ഗുപ്ത
Song Lyrics
അരുണാദൃതം ശോണിതാഭമായണഞ്ഞു നീ-
യരുളിയിളം ചൂടെൻ കൂമ്പിയ ഹൃദന്തത്തിൽ
മെല്ലെ ഞാൻ വിടരുന്നു നിൻ ലാളനാനന്ദം നുകർ-
ന്നല്ലലൊട്ടകന്നിതാ കണ്ടതീ ലോകം മുന്നിൽ
ഞാനൊരു ചെറു പൈതലെന്നെന്നെത്തലോടുവാൻ
ഗാനതുന്ദിലനൊരു മന്ദമാരുതനെത്തി
മഞ്ഞിന്റെ നറുബിന്ദു നിന്റെ പുഞ്ചിരിയോടെ
മഞ്ജുളമുത്തായ്‌ മാറി മാലകോർത്തെന്നിൽ നീ
വളർന്നു വീണ്ടും നിന്റെ തൊട്ടിലിലനിലന്റെ
വാത്സല്യം നുകർന്നും ചിരിതൂകിയും വിടർന്നൂ ഞാൻ
യൗവ്വനം, രാഗം തുളുമ്പും യൗവനം ലോകത്തിൻ
കൈതവ മറിയാത്ത യൗവനം വികാരാർദ്രം
അരുണാദൃതം - ഉദയ സൂര്യൻ (അരുണ - ചെമന്ന, ഇളംചുവപ്പുള്ള, പുതിയ : അരുണൻ - സൂര്യൻ (പുതിയ, ചുവന്ന) : ആദൃതം - ബഹുമാനിതമായ, ആദരിക്കപ്പെട്ട)
ശോണിതാഭ - രക്തവർണം
ഗാനതുന്ദിലനൊരു മന്ദമാരുതനെത്തി - ഗാനപൂരിതനായ ഇളം കാറ്റ് വന്നെത്തി (തുന്ദി - വയറ്, ഉന്തിനില്‍ക്കുന്ന, തുന്ദിലൻ - ഗണപതി, ഗാനതുന്ദിലൻ - ആഹ്ലാദ ചിത്തനായ)
അനിലൻ - കാറ്റ്
കൈതവ മറിയാത്ത - നിഷ്കളങ്കമായത് (കൈതവം - വഞ്ചന, ചതി)
മഞ്ജുളമുത്തായ്‌ - മനോഹരമായ മുത്ത്‌
Poem Full Lyrics
അരുണാദൃതം ശോണിതാഭമായണഞ്ഞു നീ-
യരുളിയിളം ചൂടെൻ കൂമ്പിയ ഹൃദന്തത്തിൽ
മെല്ലെ ഞാൻ വിടരുന്നു നിൻ ലാളനാനന്ദം നുകർ-
ന്നല്ലലൊട്ടകന്നിതാ കണ്ടതീ ലോകം മുന്നിൽ
ഞാനൊരു ചെറു പൈതലെന്നെന്നെത്തലോടുവാൻ
ഗാനതുന്ദിലനൊരു മന്ദമാരുതനെത്തി
മഞ്ഞിന്റെ നറുബിന്ദു നിന്റെ പുഞ്ചിരിയോടെ
മഞ്ജുളമുത്തായ്‌ മാറി മാലകോർത്തെന്നിൽ നീ
വളർന്നു വീണ്ടും നിന്റെ തൊട്ടിലിലനിലന്റെ
വാത്സല്യം നുകർന്നും ചിരിതൂകിയും വിടർന്നൂ ഞാൻ
യൗവ്വനം, രാഗം തുളുമ്പും യൗവനം ലോകത്തിൻ
കൈതവ മറിയാത്ത യൗവനം വികാരാർദ്രം
ചുറ്റുപാടുകൾ വന്നു കണ്‍ തുറിക്കട്ടെസൂര്യ-
നറ്റു വീഴട്ടെ മുന്നോട്ടാണതിൻ ഗതി സൂക്ഷ്മം
---
എന്മനസ്സങ്കേതത്തിലുറക്കും തേന്മോന്തുവാൻ
എത്തിയാൽ പൂമ്പാറ്റകൾ താവകമെന്തേ നഷ്ടം?
ആഗതനവനേകീ സൗരഭസന്ദേശത്താൽ
സ്വാഗതമതോ ചൊല്ലുകെൻപേരിലപരാധം
കണ്ണുരുട്ടിയും വടികാണിച്ചും പേടിപ്പിച്ചി-
പ്പെണ്ണിനെയടക്കീടാമെന്നു നീയോർത്തോ? കഷ്ടം
---
സന്ധ്യതൻ കവിളതാചോത്തുപോയ്‌സുമത്തിന്റെ
ചെന്നിണം നുകർന്നതുകട്ടച്ചുനിന്നീടുന്നു
പത്മ ശ്രീ ഹരിഹരൻ ...
ജീവിതത്തിലെ അവിസ്മരണീയ ദിനമായിരുന്നു ഡിസംബർ 3. എന്റെ മകളുടെ രണ്ടാം ജൻമദിന ആഘോഷം അന്നായിരുന്നു. അന്ന് വൈകീട്ട് 6 മണിയോടു കൂടി എനിക്ക് ഒരു സന്ദേശം ലഭിച്ചു . മുംബൈ നഗരത്തിലെ വിഖ്യാത സൗണ്ട് എഞ്ചിനീയർ ആയ Saibu ചേട്ടന്റെ സന്ദേ ശമായിരുന്നു അത്.
"ബിജീഷ് എത്രയും പെട്ടെന്ന് മെയിൽ നോക്കൂ ... ഞാൻ പാട്ട് അയച്ചിട്ടുണ്ട്". സന്തോഷം കൊണ്ട് എന്റെ ഹൃദയം പൊട്ടുമോ എന്നെനിക്ക് തോന്നിപ്പോയി!
എന്റെ കുട്ടിക്കാലം മുതൽ ഞാൻ കേട്ട് കേട്ട് വളർന്ന ... പിന്നീടങ്ങോട്ടുള്ള സംഗീത ജീവിതയാത്രയിൽ ദിനംതോറും ആ മാധുര്യമുള്ള ശബ്ദം എന്റെ കൂടെ തന്നെയുണ്ട്. ആ ശബ്ദത്തിൽ ഒരു പാട്ടെങ്കിലും കേൾക്കാത്ത ദിവസങ്ങൾ വളരെ കുറവാണ് എന്നു തന്നെ പറയാം ...
അദ്ദേഹത്തിന്റെ പാട്ടുകൾ ... എന്നാൽ കഴിയുന്ന തരത്തിൽ പാടിയ സുഹുത്തുക്കളോടൊപ്പമുള്ള സംഗീത രാവുകൾ ...
അദ്ദേഹം ഒരു ലോക വിസ്മയം തന്നെയാണ് ... പകരം വെയ്ക്കാനില്ലാത്ത സംഗീത വിസ്മയം. Horizon , Vishal, Hasir,paigam, Jashn, Sukoon, Ghazal ka Mozam, halka Nasha, kaash അങ്ങനെ തുടങ്ങി colonial Cousins ലൂടെ world മുഴുവൻ ഹിറ്റായ ... AR Rahman എന്ന പ്രതിഭാധനനായ സംഗീത മാന്ത്രികന്റെ സംഗീതത്തിൽ സ്വന്തം ശബ്ദം കൊണ്ട് യുവത്വത്തെ പ്രണയിപ്പിച്ച ആഹ്ളാദിപ്പിച്ച ... മഹാനായ ഗായകൻ
Bijeesh Krishna
ആ ഹരിജി ഈയുള്ളവന്റെ ഒരു ചെറിയ പാട്ട് എനിയ്ക്ക് പാടിതന്നു. ആ മഹാ ദിവസം ആയിരുന്നു ഡിസംബർ 3.
"അരുണാദൃതം ശോണിതാഭമായണഞ്ഞു നീ" ... ശ്രീ വടക്കേപ്പാട്ട് ഭാസ്ക്കരഗുപ്തൻ അവർകൾ എഴുതിയ ഭാവ സുന്ദര വരികൾ മധുവന്തി രാഗത്തിൽ ഞാൻ ചിട്ടപ്പെടുത്തിയ സംഗീതം ... സിത്താറും തബലയും ബാംസുരിയും പശ്ചാത്തലത്തിൽ പ്രിയ സുഹൃത്തും എന്നോടൊപ്പം എപ്പോഴും കൂടെ പ്രവർത്തിക്കുന്ന അനിലേട്ടന്റെ അതി ഗംഭീര കീ ബോർഡ് പ്രോഗ്രാമിങ്ങ് കൂടിയായപ്പോൾ ഗാനത്തിന് സൗന്ദര്യം കൂടി ...
ഈ സൃഷ്ടിയുമായി ബന്ധപ്പെട്ട എല്ലാ എന്റെ പ്രിയപ്പെട്ടവരോടും എന്റെ ഹൃദയത്തിൽ നിന്നും നിറഞ്ഞ സ്നേഹം അറിയിക്കുന്നു.
(എന്നെ ഹിന്ദുസ്ഥാനി സംഗീതത്തിന്റേയും ഗസലുകളുടേയും ലോകത്തിനെ പരിചയപ്പെടുത്തിയ ... ഹരിജിയെ പരിചയപ്പെടുത്തിയ ... എന്റെ പ്രിയപ്പെട്ട അമ്മാവൻമാരേയും വൃന്ദേച്ചിയേയും പ്രിയപ്പെട്ട ഫിലിപ്പ് ചേട്ടനേയും സ്നേഹപൂർവ്വം ഓർക്കുന്നു).
കാത്തിരിക്കുകയാണ് പുതുവത്സരം ...
PC: Sangeeth Raj - Sangeeth photography.
© Vyaasa Chitra Productions, 2016-17