Ngayong Marso 8 ay ginugunita ang Pandaigdigang Araw ng Kababaihan– isang pagdiriwang ng mga tagumpay ng bawat babae, pagkilala sa kasaysayan ng araw na ito mula sa kilusan ng mga kababaihang manggagawa, at mariing pagkondena sa karahasan at diskriminasyon na patuloy na kinahaharap ng mga kababaihan.

Naitala ng World Economic Forum na bumaba sa ika-25 na puwesto ang Pilipinas sa 2024 Global Gender Gap Index kumpara noong 2023 na ito ay nasa ika-16 na puwesto. Sa kabilang banda ay una ang bansa sa parehas na ulat sa buong Asya. Kahit patuloy na nangunguna ang Pilipinas sa mga bansang Asyano, nararamdaman ba ang mataas na ranggo sa hanay ng masang kababaihan?

Halos isa sa limang babae ang nakakaranas ng pisikal, sekswal, o emosyonal na karahasan mula sa kanilang kasalukuyan o huling kinakasama (Philippine Statistics Authority at ICF, 2023). Samantala, nasa 13% ang mga kababaihang edad 15-49 ang nakakaranas ng pisikal na karahasan pagtungtong pa lamang ng labinlimang gulang.

Dagdag pa rito, dala ang mga tradisyonal na paniniwalang patriyarkal pati narin sa digital na larangan. Ayon sa isang ulat ng Philippine Institute for Development Studies, mas mababa ng 18.4% ang kita ng mga kababaihan kaysa sa mga kalalakihan. Minamaliit pa rin ang mga kababaihan at patuloy pa ring nakukulong sa mga hindi kumplikadong trabaho, katulad ng encoding na mas mababa ang sahod na kanilang nakukuha.

Kaisa ng hanay ng masang kababaihan ang UPLB Development Communicators’ Society sa paggunita ng Pandaigdigang Araw ng Kababaihan. Kasabay rin nito ang pagtambol sa boses ng mga kababaihan hindi lamang noon, kundi ngayon at sa malayang bukas para sa mas makatarungan at inklusibong lipunan. 

#InternationalWomensDay

#NationalWomensMonth

#AbanteBabae

𝗠𝗴𝗮 𝗦𝗮𝗻𝗴𝗴𝘂𝗻𝗶𝗮𝗻:

Pal, K., Piaget, K., Zahidi, S., & Baller, S. (2024, June 11). Global gender gap 2024. World Economic Forum. https://www.weforum.org/.../global-gender-gap.../digest/

Peña, P. & Yao V. (2022, August). DigitALL for Her: Futurecasting platform work

for women in rural Philippines. Philippine Institute for Development Studies. https://www.pids.gov.ph/.../gender-bias-women-digital...

Philippine Statistics Authority and ICF. (2023, June). 2022 Philippine National Demographic and Health Survey (NDHS): Final Report. https://dhsprogram.com/pubs/pdf/FR381/FR381.pdf