Sikolohiyang Malaya at Mapagpalaya,
Lipunang Maginhawa at Mapagkalinga

Ika-49 Pambansang Kumperensiya sa Sikolohiyang Pilipino
at Ika-3 Pambansang Kumperensiya sa Ginhawa

Nobyembre 27–29, 2025
Unibersidad ng Pilipinas Diliman

Sesyon 3C: Symposium

Ginhawa at Pagkakaisa: Mahalagang Konsepto sa Pang-Komunidad na Programa para sa Pagtalikod sa Droga, Pag-usbong ng Ginhawa

Nob. 29, 2025, PH 120-122 (1/F Gusaling Palma), 1:00-2:30 n.h.

Convener: Violeta V. Bautista, PhD, RPsy, RGC

Abstrak

Ang apat na paglalahad sa symposium na ito ay galing sa pananaliksik at pagbubuo ng isang pang-komunidad na programa para sa pagbabagong buhay mula sa probelatikong paggamit ng droga gamit ang lapit na kontekstuwal, mapagsanib, at nakatuon sa ginhawa. Isinagawa ang “Pagtalikod sa Droga, Pag-usbong ng Ginhawa” (PDPG) sa isang rural na komunidad sa mga taong 2018 hanggang 2022. Layunin ng programang PDPG ang suportahan ang komunidad na baguhin ang pananaw, mula sa pananaw na mapanghusga, mapangbukod, at nakatuon sa kriminalisasyon, tungo sa pananaw na mahabagin, nagbibigay kapangyarihan, at nakatuon sa pagpapaigting sa ginhawa ng mga gumagamit ng droga (sa Ingles, persons who use drugs o PWUD) at ng kanilang mga pamily na magbagong buhay.

Ilalarawan ng bawat paglalahad ang apat na bahagi ng programang PDPG. Ang una ay tungkol sa mga batayang kaisipan, konsepto, at pamamaraan sa community preparation o ang paghahanda sa komunidad tungo sa pag-angkin at pagmamay-ari ng programa. Ang pangalawang paglalahad ay tungkol sa pagsasanay sa mga likas na tagapangalaga ng komunidad na maging tagapagpadaloy ng programa. Ang pangatlong paglalahad ay tungkol sa mga katangian ng programa na may kinalaman sa positibong kuwento at karanasan ng pagbabago ng mga kalahok. Ang huling paglalahad ay tungkol sa pagsuporta sa mga pamilya sa kanilang pagbibigay kalinga sa kapamilyang nagbabagong buhay at kung paanong sila rin mismo ay makaranas ng ginhawa sa prosesong ito.

Ang Hamon ng Paghahanda sa Komunidad: Pagsusulong ng Pag-aangkin at at Pagkakaisa ng Isang Community-Based Addiction Recovery Program

Annabel M. Manalo, Unibersidad ng Pilipinas Diliman

Ang pagtugon sa masalimuot na suliranin ng paggamit ng droga ay nangangailangan ng malakas na pag-aangkin at suporta ng komunidad. Ipinapakita sa papel na ito ang yugto ng paghahanda ng komunidad sa programang PDPG, na naglalayong linangin ang tiwala, pagkakaisa, at kolektibong pananagutan sa pamamagitan ng dalawang pangunahing estratehiya: community profiling at community engagement. Isinagawa ang environmental scanning upang matukoy ang kaalaman, saloobin, at mga kaugalian ng komunidad hinggil sa paggamit ng droga at pagbawi mula rito. Ang datos na nakalap mula sa mga survey, focus group discussions kasama ang mga lider ng iba’t ibang sektor, at panayam sa mga taong gumagamit ng droga (PWUDs) at kanilang pamilya ay nagpakita ng napakanegatibong pananaw sa mga gumagamit ng droga. Ang mga natuklasang ito ang naging batayan ng sunod-sunod na aktibidad sa pakikipag-ugnayan, kabilang ang di-pormal na dayalogo, mga oryentasyon para sa bawat sektor, preaching clinic, patimpalak sa paggawa ng poster, at orihinal na komposisyon ng mga awit tungkol sa pagbawi. Lahat ng ito naglalayong mapalawak ang suporta para sa programa. Ang prosesong ito ay humantong sa mas mataas na kamalayan ng komunidad, pagbabago ng pananaw tungo sa mga PWUDs, at aktibong pakikilahok ng mga lokal na lider sa pagpaplano at pagpapatupad ng programa (Bautista, et.al., 2023). Ang tuluy-tuloy na pakikipag-ugnayan sa kabuuan ng programa ang nagpanatili ng interes ng komunidad na ipagpatuloy ang programa kahit nung tapos na ito.

Pagmomobilisa at Pagsasanay sa mga Likas na Tagapangalaga Para sa Gawain ng Pagpapadaloy ng Pangkomunidad na Programa sa Pagpapagaling Mula sa Adiksyon: Pokus sa Ginhawa at Potensya sa Gawain ng mga Tagapagpadaloy

Violeta V. Bautista, PhD, RPsy, RGC, Unibersidad ng Pilipinas Diliman

Ang pagtulong sa mga tao na may problema sa paggamit ng mga bawal na gamot sa Pilipinas ay matagal nang nakalagak sa kamay ng mga propesyonal sa larangan ng kalusugang pangkaisipan sa tulong ng mga dating gumagamit ng droga na gumaling na. Sa papel na ito, ilalarawan ang buong programa ng paghahanda sa mga boluntir sa komunidad na ipinapalagay na may likas na kakayahan sa pagtulong sa tao para sa gawain ng pagpapadaloy ng programa na sumusuporta sa mga taong may problema sa adiksyon. Ilalahad ang proseso ng paghahanda mula sa pagpili ng mga boluntir, pagsasanay sa mga ito at pagtatasa sa kinalabasan ng gawaing ito. Ilalahad sa papel na ito ang mga ebidensya na nagpapakita na ang mga likas na tagapangalaga kapag nabigyan ng sapat na pagsasanay at paghahanda ay pwedeng maging mahusay sa kanilang gawain ng pagtulong at makakaranas rin ng higit na tiwala sa kanilang kakayahan, paninindigan sa kanilang tinayuang trabaho at pakiramdam ng pagkakaisa sa kapwa mangggawa sa Programa at sa komunidad na dati’y nagtataboy sa mga taong may problema sa adiksyon.

Ano’ng Klaseng Programa ang Nakakatulong sa Pagbabagong Buhay ng mga Gumagamit ng Droga (PWUDs)? Isang Kwalitatibong Pagsusuri

Divine Love A. Salvador, PhD, RPsy, Unibersidad ng Pilipinas Diliman

Malaking hamon sa pagtukoy ng pagbabagong buhay ng mga gumagamit ng droga (sa Ingles, “persons who use drugs” o PWUD) ang pagsasagawa ng kwantitatibong pagsusuri dahil kadalasan, ang mga pamamaraan ng pagkalap ng kwantitatibong datos ay artipisyal at hindi akma sa daloy ng buhay at pakikipag-ugnayan sa komunidad. Kaya para sa aming programang PDPG, ang pagtukoy ng pagbabago at pagpapalalim sa pag-unawa ng mga katangian ng nakagiginhawang pang-komunidad na programa sa pagbabagong buhay mula sa problematikong paggamit ng droga ay nakasalalay sa kwalitatibong pagsusuri ng mga “kuwento ng pagbabago” ng mga kalahok. Ang mga kwalitatibong datos na sinuri gamit ang content at thematic analyses ay: mga kasulatan sa workbook ng mga PWUD na kalahok ng programa, mga progress notes ng mga likas na tagapangalaga (LTs) na silang nagpadaloy ng programa, at mga supervision notes ng mga tagasubaybay ng programa. Bukod dito, sinuri din gamit ang thematic analysis ang mga naratibo mula sa panayam at pakikipagkuwentuhan sa mga PWUD, LT, at tagasubaybay. Mula sa pagsusuring ito, tatlong (3) tema ng pagbabago ang nabuo: pamamahala sa sarili, paninindigan sa pagbabago, at pagdanas ng ginhawa. Ang mga katangian ng programa na maaaring may kinalaman sa mga positibong pagbabago ay: matatag na systemic-relational na tuon o lapit, riyalistiko at mahabaging pananaw sa pagkabaynat (relapse), prosesong nagbibigay pagkakataon sa pagdanas ng ligaya, prosesong nagpapalalim ng kamalayan at pag-unawa, pagpapakita ng mga LT ng tunay na pagmamalasakit at kalinga, paglambot ng paghusga ng komunidad, at pagtugon sa mga pangangailangang praktikal at pang-paglago.

Pagpapatibay ng Pagkakaisa Patungo sa Pagbabago ng mga Taong Gumagamit ng Droga: Ang Kahalagahan ng Terapi para sa Pamilya

Agnes R. Agbayani, Unibersidad ng Pilipinas Diliman

Sa mga pag-aaral patungkol sa pagrekober sa adiksyon, ang pamilya bilang isang sistema ay nagsisilbing isang mahalagang bahagi sa pag-impluwensya at pagsuporta tungo sa pagbabago ng mga taong gumagamit ng bawal na gamot/ droga. Ang papel na ito ay naglalahad ng mga ebidensya tungkol sa impluwensiya ng pamilya sa pagbabago ng pamumuhay ng kanilang mga kamag-anak na mga PWUDs. Ang mga datos na nakolekta mula sa mga tala sa progress notes, mga ulat sa mga case report, mga tala sa supervision notes, mga talatanungan at mga panayam sa mga kalahok (PWUDs) at kanilang mga tagapag-alaga ay nagsasaad na mayroong nakikitang pagbabago sa mga ugnayan sa pamilya, pagpapahalaga sa papel ng pamilya sa pagrekober sa adiksyon, at mga positibong pakikitungo ng mga myembro ng pamilya. Ang isang mahalagang tema na lumabas sa mga nakuhang datos ay nagsasaad na, “Nakikita at napaphalgahan ang pamilya na mahalagang mapagkukunan ng suporta at motibasyon patungo sa pagbabago". Ang kanilang pakikilahok sa pamumuhay ng kanilang mga kapamilya na PWUD ay isang malakas na puwersa na tumutulong sa mga PWUD na makaiwas sa tuksong muling gumamit ng droga.
Sa pangkalahatan, ang paglikha ng mga positibong karanasan sa buhay ng pamilya ay nagpalakas ng kanillang mga ugnayan, nagpaigting ng kanilang sipan na magbigay suporta sa isa't isa, na nagdulot ng diwa ng pagkakaisa bilang isang pamilya, kasama ang komunidad na kinabibilangan.

Page updated

Report abuse

Sikolohiyang Malaya at Mapagpalaya,Lipunang Maginhawa at Mapagkalinga