Ika-49 Pambansang Kumperensiya sa Sikolohiyang Pilipino
at Ika-3 Pambansang Kumperensiya sa Ginhawa
Nobyembre 27–29, 2025
Unibersidad ng Pilipinas Diliman
Inihahandog ng Pambansang Samahan sa Sikolohiyang Pilipino, Unibersidad ng Pilipinas Diliman Departamento ng Sikolohiya, at UP Diliman Psychosocial Services (UPD PsycServ)
Nobyembre 27–29, 2025
Unibersidad ng Pilipinas Diliman, Lungsod Quezon
Taon-taon, nagtataguyod ng Pambansang Kumperensiya ang Pambansang Samahan sa Sikolohiyang Pilipino (PSSP), isang panlipunan at propesyonal na organisasyong itinatag noong 1975 na may misyong palaganapin ang Sikolohiyang Pilipino (SP) sa iba’t ibang sektor ng lipunan bilang isang interdisiplinaryo at maka-Pilipinong pananaw at pamamaraan.
Kasama ang Unibersidad ng Pilipinas Diliman Departamento ng Sikolohiya at UP Diliman Psychological Services (UPD PsycServ), inaanyayahan namin ang lahat ng mga iskolar, mag-aaral, at tagapagtaguyod ng Sikolohiyang Pilipino mula sa Sikolohiya at mga kaalyadong disiplina sa pinagsamang Ika-49 Pambansang Kumperensiya sa Sikolohiyang Pilipino at Ikatlong Pambansang Kumperensiya sa Ginhawa. Natatangi ang magiging Pambansang Kumperensiya ngayong taon dahil sa tatlong dahilan: una, ito ang ikatlong pagkakataon kung kailan isasagawa ang pinagsamang Pambansang Kumperensiya sa Sikolohiyang Pilipino at Pambansang Kumperensiya sa Ginhawa; ikalawa, matapos ang limang taon ay muling idaraos ang pisikal na kumperensiya; at ikatlo, ipinagdiriwang ngayong taon ang ikalimampung anibersaryo ng pagkakatatag sa Sikolohiyang Pilipino bilang isang siyentipikong disiplina at makataong protesta.
Layunin ng kumperensiya ang sumusunod:
Masuri at mabalangkas ang mga tagumpay at hamon ng Sikolohiyang Pilipino bilang isang kritikal na disiplina na nagtataguyod ng isang Sikolohiyang Malaya at Mapagpalaya;
Masuri at mabalangkas ang ambag ng Sikolohiyang Pilipino sa pagtataguyod ng isang lipunang maginhawa at mapagkalinga; at
Magbahagi ng mga kaalaman at kasanayan sa ikauunlad ng Sikolohiyang Pilipino bilang malaya at mapagpalayang sikolohiya at sa pagtataguyod ng isang lipunang maginhawa at mapagkalinga.
Maalab na pagbati sa lahat ng kalahok, tagapagpataguyod, at katuwang na institusyon ng Pambansang Samahan sa Sikolohiyang Pilipino (PSSP)!
Ang ating ika-49 Pambansang Kumperensiya at ika-3 Pambansang Kumperensiya sa Ginhawa ay mga makasaysayang pagtitipon, hindi lamang dahil ipinagdiriwang natin ang ika-50 anibersaryo ng PSSP, kundi dahil ito rin ang unang pagkakataon na tayo ay muling nagtitipon nang harapan matapos ang mga taon ng pandemya. Ang pagsama-sama natin ngayon ay sagisag ng ating pagbangon, pag-asa, at patuloy na pagnanais na itaguyod ang Sikolohiyang Pilipino (SP) bilang isang buháy at lumalakas na disiplina at kilusan.
Sa temang “Sikolohiyang Malaya’t Mapagpalaya, Lipunang Mapagkalinga,” pinagtitibay natin ang adhikain ng SP bilang isang sikolohiyang nakaugat sa karanasan, kultura, at pagpapahalagang Pilipino, isang sikolohiyang naglalayong magpalaya ng kaisipan, magtaguyod ng dignidad, at magsulong ng makataong ugnayan sa lipunan.
Ipinagpapasalamat natin ang masikhay na pakikipagtulungan ng Departamento ng Sikolohiya ng Unibersidad ng Pilipinas Diliman at UP Diliman PsycServ, na naging katuwang ng PSSP sa pagsasakatuparan ng kumperensiyang ito. Ang kanilang pakikiisa ay patunay na nananatiling matatag ang ating komunidad sa pagsusulong ng maka-Kapwang kaisipan at nakagiginhawang praktikang pansikolohiya.
Taos-puso rin ang ating pasasalamat sa ating mga sponsor, kabilang ang Optum at Center for Educational Measurement (CEM). Ang kanilang walang sawang suporta ay nagpapalakas sa ating kakayahang makapaghatid ng isang makabuluhan, de-kalidad, at inklusibong kumperensiya para sa lahat.
Sa ating mga kalahok – mga propesyonal, guro, mananaliksik, estudyante, at mga tagapagtaguyod ng SP – maraming salamat sa inyong presensiya at pakikiisa. Nawa’y patuloy kayong maging katuwang sa pagsusulong ng isang sikolohiyang tunay na nagsisilbi at nagbibigay ng kapangyarihan sa sambayanang Pilipino.
Mabuhay ang PSSP sa ika-50 taon! Mabuhay ang Sikolohiyang Pilipino!
Jholyan Francis S. Fornillos, RPsy
Pangulo, Pambansang Samahan sa Sikolohiyang Pilipino
Sa ngalan ng Departamento ng Sikolohiya ng Unibersidad ng Pilipinas Diliman, malugod naming ipinapaabot ang aming pagbati at taos-pusong pasasalamat sa lahat ng kalahok ng Ika-49 Pambansang Kumperensiya sa Sikolohiyang Pilipino at Ika-3 Pambansang Kumperensiya sa Ginhawa na may temang “Sikolohiyang Malaya at Mapagpalaya Tungo sa Lipunang Maginhawa at Mapagkalinga.”
Alinsunod sa aming adhikain, patuloy naming isinusulong ang Sikolohiyang Pilipino bilang isang disiplinang nakaugat sa ating kultura, kasaysayan, at karanasan. Ipinagmamalaki ng aming Departamento ang mahalagang papel nito sa simulain ng SP, sapagkat dito nagmula ang mga tagapagtatag at tagapagtaguyod, tulad ni Dr. Virgilio G. Enriquez, na naglatag ng pundasyon ng disiplina at kilusan. Ang kanilang mga ambag ay patuloy na nagbibigay-inspirasyon sa mga bagong henerasyon ng guro, mananaliksik, at mag-aaral upang ipagpatuloy ang adhikaing mapagpalaya, makatao, at makabayan.
Kaya naman buong-loob naming hinarap ang hamon ng pag-oorganisa ng kauna-unahang face-to-face na pagtitipon mula nang pandemya, bilang pagdiriwang at paggunita sa ika-50 taon ng Sikolohiyang Pilipino. Ang pagbabalik na ito sa pisikal na espasyo ng talakayan ay hindi lamang tanda ng muling pagkikita-kita ng ating pamayanan, kundi isang makasaysayang pagkakataon upang sariwain ang ating pinagmulan, palalimin ang ating kasalukuyang mga diskurso, at itaguyod ang mga bagong landas tungo sa hinaharap ng disiplinang tunay na nakaugat sa bayan.
Kasabay nito, nais naming magbigay ng espesyal na pasasalamat sa lahat ng tumulong sa pag-organisa ng kumperensiya. Lubos naming kinikilala ang suporta ng aming mga katuwang: ang Pambansang Samahan sa Sikolohiyang Pilipino (PSSP), UPD PsycServ, Optum Philippines, at ang Center for Educational Measurement (CEM). Ang kanilang pakikiisa at ambag ay naging mahalaga upang maisakatuparan ang kumperensiyang ito, at upang higit pang mapalakas ang ating sama-samang adhikain para sa isang lipunang maginhawa at mapagkalinga.
Nawa’y magsilbing gabay ang kumperensiyang ito sa higit pang pagpapalalim ng ating pag-unawa sa papel ng Sikolohiyang Pilipino sa pagsusulong ng pakikipagkapwa-tao bilang haligi ng isang lipunang makatarungan, mapagkalinga, at maginhawa. Maraming salamat sa inyong pakikiisa, sa inyong patuloy na pagtataguyod ng Sikolohiyang Pilipino, at sa inyong walang sawang pakikibaka para sa isang lipunang tunay na malaya at mapagpalaya.
Mabuhay ang Sikolohiyang Pilipino!
Kaw. Prop. Jay A. Yacat, MA, RPsy
Tagapangulo, Unibersidad ng Pilipinas Diliman Departamento ng Sikolohiya
Convener, Ika-49 Pambansang Kumperensiya sa Sikolohiyang Pilipino
Nakagiginhawang pagbati mula sa UPD PsycServ!
Malugod naming tinatanggap ang mga kalahok sa ating Ikatlong Pambansang Kumperensya sa Ginhawa, na sa taong ito ay katambal ng Ika-49 Pambansang Kumperensya sa Sikolohiyang Pilipino. Makasaysayan ang kumperensya sa taong ito dahil pinagdiriwang natin ang ika-50 anibersaryo ng Sikolohiyang Pilipino, ang patuloy na sama-samang pagkilos para sa isang malaya at mapagpalayang sikolohiya na nagbibigay halaga sa kalinga at ginhawa.
Apat na taon na ang nakalipas simula nang makasaysayang pagtitipon-tipon ng mga mananaliksik, tagapagbigay, at tagapagtaguyod ng ginhawa para sa unang pambansang kumperensya. Masasabing ang atensyon ng unang kumperensya ay nararapat lang na ibinaling sa mismong pagdalumat sa ginhawa. Sa pangalawang pambansang kumperensya naman, minarapat na pagtuunan ng pansin ang mga landasin kung paanong ang ginhawa ay magiging isang realidad na naisasabuhay.
Ngayon, sa Ikatlong Pambansang Kumperensya sa Ginhawa, hinihikayat tayong pagbulayan ang usapin ng dekolonisasyon. May saysay ba ang pagsiyasat sa impluwensyang kolonyal ng kanya-kanya nating mga disiplina’t propesyon bilang tagapagkalinga? Ano ang itsura ng tunay na malayang disiplina at propesyon? Ano ang ugnayan ng kalayaan, kapangyarihan, at hustisya sa kalinga at ginhawa? Ilan lang ang mga ito sa mga tanong na inaasahan nating makakapagpalalim ng ating pag-unawa at pagpapahalaga.
Sa tahaking ito, muling magkaakibat ang UPD PsycServ at PSSP. Para sa ikatlong kumperensya, kaakibat sa gawain ang Departamento ng Sikolohiya sa UP Diliman, at pati ang ating mga sponsors tulad ng Optum at CEM. Inaasahan natin na ang tatlong araw ng magkatambal na kumperensya sa Sikolohiyang Pilipino at sa Ginhawa ay hitik sa mga pagkakataong makaranas ng sigla ng pagkatuto, paggaan ng mga dalahin, pag-igting ng gana, at paglalim ng ligaya sa buhay.
Muli nating damahin ang biyaya ng nakagiginhawang kumperensya!
Prop. Divine Love A. Salvador, PhD, RPsy
Director, UP Diliman Psychosocial Services (UPD PsycServ)
Convener, Ika-3 na Pambansang Kumperensiya sa Ginhawa
Prop. Emeritus Violeta V. Bautista, PhD, RPsy, RGC
Founding Director at Clinical Supervisor, UP Diliman Psychosocial Services (UPD PsycServ)
Convener, Ika-3 na Pambansang Kumperensiya sa Ginhawa
Hangarin ng Pambansang Samahan ng Sikolohiyang Pilipino, Unibersidad ng Pilipinas Diliman Departamento ng Sikolohiya, at UP Diliman Psychosocial Services (UPD PsycServ) ang pagbuo ng safe space na inklusibo at nagbibigay-karangalan sa lahat. Naniniwala kami na ang mga kalahok ng PKSP 49 x Ginhawa 3 ay dapat makaramdam ng kaligtasan, ginhawa, at pagiging kabilang sa espasyo upang ganap na makalahok sa kumperensiya.
Ipinapatupad namin ang zero tolerance laban sa anumang anyo ng harassment, diskriminasyon, at pang-aabuso maging ito ay sekswal, berbal, o pisikal, at maging ito ay sa personal o online. Kabilang rito ang anumang salita o kilos na hindi kanais-nais o hindi karapat-dapat, lalo na sa mga pangkat minorya, at iba pang mga salita o kilos na lumalabag sa pagiging safe space ng kumperensiya. Ang sinumang lalabag o hindi sumasang-ayon sa ating kolektibong hangarin para sa inklusyon, kaligtasan, at ginhawa ay maaaring paalisin sa kumperensiya. Haharap sa proseso ng UP Anti-Harassment Code at iba pang mga umiiral na batas ang sinumang lalabag ng mga ito.
Kung ikaw ay nakaranas o nakasaksi ng harassment (kabilang ang sexual harassment), diskriminasyon, pang-aabuso, o iba pang paglabag ng Code of Conduct at Anti-Sexual Harassment Code, maaaring i-report ito sa Sekretaryat (pssponline@gmail.com) o sa ating Safety Officers: Epoy Alforque (acalforque@up.edu.ph; +63 920 989 7070 [SMS]) at James Montilla (jmontilladoble@up.edu.ph; +63 977 323 2134 [SMS]). Lahat ng report ay kompidensyal at sensitibo. Mahalaga para sa amin ang iyong kaligtasan at kapanakan.