Sikolohiyang Malaya at Mapagpalaya,
Lipunang Maginhawa at Mapagkalinga

Ika-49 Pambansang Kumperensiya sa Sikolohiyang Pilipino
at Ika-3 Pambansang Kumperensiya sa Ginhawa

Nobyembre 27–29, 2025
Unibersidad ng Pilipinas Diliman

Sesyon 2B: Kalusugang Pangkaisipan

Nob. 29, 2025, PH 112-114 (1/F Gusaling Palma), 10:30 n.u. - 12:00 n.t.

Tagapagpadaloy: Kathlyn T. Caragay, MStat

Paglikha at Pag-validate ng Filipino Received Social Support Scale

Johnrev Guilaran, PhD, Augil Marie Q. Robles, Aniceta Patricia T. Alingasa-Aguirre, & Bernice Vania L. Mamauag, PhD, Unibersidad ng Pilipinas Visayas

Ang social support ay isang social psychological factor na parating naiuugnay sa kagalingan, kaginhawaan, at iba pang positibong psychological outcomes. Ngunit ang mga epektong ito ng social support sa kagalingan at kaginhawaan ay hindi maihihiwalay sa kontekstong sosyal at kultural. Sa kasalukuyan, ang mga panukat ng social support ay hango sa kontekstong Western, Educated, Industrialized, Rich, and Democratic (WEIRD). Sa madaling salita, ang mga panukat ng social support na ginagamit sa mga Pilipino ay hindi nakabatay sa mga karanasan ng pagtanggap ng tulong at suporta ng mga Pilipino. Bukod pa dito, may tatlong tapyas ang social support ayon sa mga pag-aaral: received social support, perceived social support, at social embeddedness. Sa tatlong tapyas na ito, ang received social support ang pinakamahalaga sa larangan ng intervention, ngunit ito rin ang hindi masyadong pinag-aaralan. Dahil dito, nilayon ng pagsasaliksik na ito ang paggawa at pag-validate ng isang panukat ng received social support na nakabaon sa karanasang sosyal at kultural ng mga Pilipino. Labing apat at isang items ang nilikha hango sa mga dimensions ng Filipino received social support (Guilaran et al., 2025): (1) pagpapalakas ng loob, (2) pakikinig at pakikiramay, (3) pagsama at pakikiisa, (4) pagturo at paggabay, (5) pagbigay ng praktikal na tulong, at (6) pagsalo. Matapos maisagawa ang confirmatory factor analysis (CFA), ang panukat ay napaikli sa 19 na items (α=.934, ω = .970). Katanggap-tanggap din ang convergent validity ng panukat na ito. Tatalakayin sa papel na ito ang mga implikasyong teoretikal at praktikal, lalo na sa aspeto ng kagalingan at kaginhawaan.

Paghingi ng Tulong para sa Kalusugan ng Kaisipan ng mga Mag-aaral sa Kolehiyo sa Pilipinas—Isang Sistematikong Rebyu ng Literatura

Mary Jane Guba, Rizzi Anne B. Miñoza, Ronnalie Ann V. Barriesntos-Mamon, Renato Z. Dela Rosa, Jr., & Cieralene Anne Q. Ignacio, National University

Ang paghahanap ng tulong para sa kalusugan ng kaisipan ay may mahalagang papel sa pagpapalakas ng emosyonal na katatagan at kabuuang kagalingan ng mga estudyante, lalo na sa konteksto ng edukasyong tersiyaryo. Habang tumataas ang kamalayan sa mga isyung pangkaisipan sa hanay ng mga kolehiyo, mas nagiging mahalaga ang pag-unawa sa pakikipag-ugnayan ng mga mag-aaral sa propesyonal na serbisyong pangkalusugan ng isip.
Ang sistematikong rebyung ito ay sinusuri ang mga hadlang at salik na nagpapadali sa gawi ng mga Pilipinong mag-aaral sa kolehiyo sa paghahanap ng tulong para sa kanilang kalusugan ng kaisipan.
Sinasalamin ng pagsusuri ang mga natuklasan mula sa mga kuwantitibong pag-aaral na isinagawa mula 2020 hanggang 2025, na tumutok sa iniulat na antas ng paghahanap ng tulong, mga hadlang na kultural at sikolohikal, mga mekanismong institusyonal na nagbibigay-suporta, at mga demograpikong kaugnayan.
Ipinapakita ng resulta na nananatiling mababa ang antas ng paghahanap ng propesyonal na tulong, kung saan mas pinipili ang impormal na suporta mula sa mga kaibigan at pamilya. Kabilang sa pangunahing hadlang ang limitadong access sa serbisyo, problemang pinansyal, stigma, mga normang kultural tulad ng hiya at paniniwala sa sariling kakayahan, at kakulangan ng kaalaman. Sa kabilang banda, nakatutulong ang mga salik tulad ng pagkilala sa distress, suportang panlipunan, positibong karanasan, at pinahusay na tugon ng mga institusyon—lalo na matapos ang pandemya ng COVID-19—sa pagtaas ng pakikilahok sa mga serbisyong pangkaisipan.
Inilalarawan ng rebyu ang limang pangunahing tema: (1) paglaganap at pattern ng paghahanap ng tulong para sa kalusugan ng kaisipan; (2) mga estruktural at institusyonal na hadlang; (3) sikolohikal at kultural na hamon; (4) mga salik na nagpapadali at suportang panlipunan; at (5) epekto ng mga pambansang polisiya at mga programang pang-eskuwelahan. Tinalakay rin ang mga implikasyon para sa pananaliksik at paggawa ng polisiya sa hinaharap, na binibigyang-diin ang kahalagahan ng mga estratehiyang nagpapababa ng stigma at ng mga interbensyong sensitibo sa kultura na tumutugma sa konteksto ng edukasyon sa Pilipinas.

Isang Pag-aaral sa Relasyon ng Perfectionism, Compassion, Wellbeing, at Coping sa mga Pilipinong Mag-aaral sa Kolehiyo

Jeryl Shawn T. Tan, Unibersidad ng Pilipinas Diliman, York St. John University; Andrew P. Hill, York St. John University, University of Toronto; & Daniel J. Madigan, York St. John University

Ginagamit ng mga mananaliksik ang 2 × 2 model of perfectionism nina Gaudreau at Thompson (2010) upang suriin ang pagkakaiba ng mga perfectionism subtypes sa wellbeing at coping ng mga mag-aaral sa kolehiyo. Batay sa mga nakaraang pananaliksik gamit ang modelong ito, may mga subtypes na mas nauugnay sa mga problema sa wellbeing at coping kaysa sa iba. Upang matukoy ang mga baryabol na posibleng magpaliwanag sa pagkakaiba ng mga subtypes, sinuri ng pag-aaral na ito ang mga compassion-related variables bilang mga mediator sa relasyon ng perfectionism, wellbeing, at coping. Nakumpleto ng 701 Pilipinong mag-aaral sa kolehiyo (M = 21.22; SD = 1.94; 68% babae) ang mga iskalang sumusukat sa lahat ng mga baryabol. Batay sa resulta mula sa mga conditional process analysis, ang fear of compassion from others ay nagsilbing mediator sa pagitan ng mga perfectionism subtypes at wellbeing (negative affect), habang ang fear of self-compassion ay nagsilbing mediator sa pagitan ng mga perfectionism subtypes at coping (pagkarelihiyoso). Ang pag-aaral na ito ay sumusuporta sa kaisipan na ang mga mag-aaral na naniniwalang inaasahan o kinakailangan sila ng iba na maging perpekto ay maaaring makaranas ng mga problema sa kolehiyo dahil sa kahirapan sa paglago sa compassion.