Maialen eta Monika

Normalkuntzako arduradunekin hitz egin dugu eta hauxe azaldu digute:

- Zein da zuen egitekoa Normalkuntza alorrean?

M eta M: - Ikastetxean euskararen erabilera bultzatzea da gure helburu nagusia eta horretarako ekintza desberdinak antolatzen ditugu.  Irakasle zein ikasleen euskarazaletasuna bultzatu nahi dugu; ekintza kulturalak antolatu, euskal jaiak ospatu, hizkuntzaren erabilerari garrantzia eman, etab. Hizkuntzarekiko kontzientzia indartu nahi dugu, are gehiago Hondarribiako egoera kontutan hartuta. Izan ere, historikoki herri euskalduna izan da hau baina urteek aurrera egin ahal euskararen erabilera gutxituz joan da. Mantso-mantso herriaren sustraietara bueltatu eta ea euskararen erabilera zabaldu eta normalizatzen den. 

- Aurten bi lehiaketa antolatu dituzue. Hitz egiguzue hauei buruz.

M eta M: - Lehendabiziko ebaluazioan, literatura lehiaketa antolatu genuen. Urte dezente dira lehiaketa hau antolatzen dela eta normalean harrera ona izaten du. Bi kategoria desberdin banatzen ditugu; A kategoria (1, 2, 3. DBH) eta B kategoria (4.DBH eta batxilergoa).  Guk baldintza konkretu batzuk (luzera, gaia...) ematen ditugu eta ikasleek horri buruzko narrazio bana idatzi behar dute. Ondotik, epaimahai bat egoten da eta bi kategorietako lanik hoberenak saritzen dira. Aurten sari banaketa areto nagusian egin dugu.

Baina hau ez da izan egindako lehiaketa bakarra; hirugarren ebaluazioan booktrailer lehiaketa bat egin dugu. Kasu honetan ikasleek banaka, binaka edo hirunaka parte hartzeko aukera izan dute eta sariketa bakarra izan da denentzat. Gainera, booktrailerraren oinarrian zegoen liburua edozein hizkuntzatan egoten ahal zela zehaztu genien ikasleei baina hori bai, gero trailerrak euskaraz izan behar zuen. Sei booktrailer aurkeztu dira lehiaketara, zein baino zein hobeak!

- Zer da booktrailerra?

M eta M: - Booktrailerra liburu baten trailerra da. Pelikuletako trailerren antzekoa da; istorioaren nondik norakoak kontatu behar dira spoilerrik egin gabe. Modu oso desberdinetan egin daiteke; film baten gisa irudiak grabatuz, marrazkiekin muntaia eginez, irudiak eta letrak nahasiz...

- Zer harrera izan dute lehiaketek?

M eta M: - Harrera ona izan dute. Literatura lehiaketara 12 lan aurkeztu ziren eta booktrailer lehiaketara 6. Lehiaketa hauen helburua bikoitza da. Alde batetik, idaztea zein irakurtzea gustuko duten ikasleek arnasgune txiki bat izatea nahi dugu. Garrantzitsua da ikasle hauen lana baloratzea eta idazleta prozesuari plaza txiki bat ematea. Bertze aldetik, euskal literatura sustatu nahi dugu; idazle bikain ugari ditugu eta hauen lanak erakutsi eta zabaldu nahi ditugu. 

- Idaz zaletasunik ba al dute orokorrean ikasleek?

M eta M: - Badaude idazteko zaletasuna duten ikasleak baina askotan ariketa pertsonal eta pribatu bezala hartzen dute. Ikasle askok beraien barruak husteko erabiltzen dute idazketa eta hortaz, kostatu egiten zaie egiten duten hori lehiaketara aurkeztea. Hala ere, urtetik urtera gehiago dira aurrera pausoa ematen dutenak. Idazle bikainak ditugu gure artean; bultzada txiki bat baino ez dute behar beraien artelanak jendeari erakusteko!!!

Itziar eta Izaskun

Hezkidetza eta Bizikidetzako arduradunak dira eta bere lanari buruz hitz egin digute.

- Zein da zuen egitekoa Hezkidetza eta Bizikidetza alorrean?

I eta I: - Bizikidetza eta hezkidetza alorrean elkarbizitzarako konpetentzia lantzea dugu helburu, hau da, ikaslea elkarbizitza positiborako eta berdintasunean hezi nahi dugu, eta beraien artean sor litezkeen gatazkak konpontzeko tresnak ere eman nahi dizkiogu. Horretarako, ikasleekin bilerak egin ditugu, kanpotik etorritako adituen hitzaldiak zein tailerrak antolatu ditugu, geletan zenbait unetan hezkidetzari buruzko lanketak gauzatu dira, filmak ikusi ditugu…

- Zer jarduera mota eramaten dituzue aurrera?

I eta I: - Internetez modu digitalean eta doan dauden zenbait lan inprimitu eta  enkoadernatu ditugu liburutegian denon esku izateko. Gaur egun gure gizartean dauden askotariko gaiak lantzen dira betiere berdintasun eta aniztasun ikuspegitik jorratuak, esterako, emakumeen emigrazioa, bikoteen harremanak, indarkeria, trans edota lesbianen bizipenak…

- Ikasturte honetan “Científicas” izeneko komikia batxilergoan lantzeko proposamena ere luzatu zenuten. Zein zen honen helburua?

I eta I: - Otsailaren 11ko Emakume Zientzialariaren Nazioarteko eguna zela eta, hainbat jarduera antolatu ziren ikastetxean. Alde batetik, Fisika-Kimikako mintegiak joku bat prestatu zuen ikasle guztiekin egiteko. Bestetik, guk gure Hezkidetzako ikasle taldearen laguntzaz ikastetxea apaintzeaz gain, Científicas: pasado, presente y pasado komikia hiru hizkuntzetara ( euskarara, ingelesera eta frantsesera) itzultzea proposatu genien 4DBH eta Batxiko ikasleei. Dena den, lana bukatu gabe dago eta datorren ikasturtean lantxo honi berriz ere  helduko diogu. Bukatutakoan gure liburutegian denon eskura jarriko ditugu ikasleek itzulitako komikiak.

- Gainera liburutegirako hainbat komiki proposatu dizkiguzue. Zer eduki lantzen dira eta zer modutara?