PH4PH: Preconception Health Awareness Week

Ha-L.I.N.C.-ka na! Preconception Health para sa malusog na pangangatawan at planadong kinabukasan

Taon-taon, tinatayang aabot sa 15 milyon na sanggol ang ipinapanganak na preterm o “kulang sa buwan” habang 8 milyon naman ang mayroong birth defects sa buong mundo. Bukod sa dami, kasama ang napaagang panganganak at birth defects sa mga pangunahing dahilan ng pagkamatay ng mga sanggol. Maliban sa kamatayan, ang mga ito ay maaari din magdulot ng komplikasyong pangkalusugan at kapansanan na makakaapekto sa kakayahang pinansyal at pangkalusugan ng mga apektadong indibidwal, pamilya, at ng lipunan sa kabuuan. 

Gayunpaman, may mga hakbang na pwedeng gawin bilang paghahanda para mabawasan ang posibilidad ng napaagang panganganak at ilang uri ng birth defects na maaring maiwasan. Ang mga hakbang na ito ay nakapaloob sa preconception health. Ang preconception health ay ang kabuuang kalusugan ng isang indibidwal na nasa “reproductive age” o ang edad na may kakayahan ang isang babae o lalake na magka-anak. Kasama na din dito ang kalusugan bago at sa pagitan ng bawat pagbubuntis.

Sa pamamagitan ng kaaalaman ukol sa preconception health, maaari mo maprotektahan ang iyong magiging anak at ang iyong sarili mula sa iba’t ibang komplikasyon. Higit pa rito, hindi lamang para sa mga may planong magkaroon ng pamilya ang preconception health. Ito rin ay para sa lahat ng nasa reproductive age na nagnanais na makaiwas sa sakit, mabuhay nang masigla at may malusog na pangangatawan. 

Mahalaga ang pagpapaunlad ng kaalaman at pag-unawa sa preconception health. Ito ay makakatulong sa pagpapalakas ang ating katawan at kaisipan, pag-iwas sa impeksyon, pagkakaroon ng angkop na nutrisyon, at pagplaplano ng pamilya. Ang mga ito ay nakapaloob sa kaisipan o framework na tinatawag bilang “L.I.N.C.” (Health Lifestyle, Infection Prevention, Proper Nutrition, at Contraception and Planning the Family). 

Kaya ha-L.I.N.C.-ka na at sumama sa pagtuklas ng iba’t-ibang konsepto upang mas maunawan kung paano mo mas mapapangalagaan ang iyong sarili at ang iyong pamilya! Halina’t makibahagi sa ating kampanya para maipakilala ang preconception health sa bawat Pilipino.