Thâu-ia̍h

Sǹg-siàu ê hoat-tō͘ tek-khak m̄-nā 1-chióng. Hiàng-sî ū Pit-soàn ê chho͘-ha̍k hit-pún chheh, tō sī kà lâng kia̍h pit sǹg siàu ê hoat-tō͘. Kàu taⁿ pah-gōa tang kú, sî-tāi piàn-chhian, jîn-lūi jīn-bat ê sò͘-ha̍k iā chìn-pō͘, ū he kia̍h pit oh sǹg--ê, lī-iōng tiān-soàn-ki sǹg--i chiū khòai sǹg. Pí-lūn kóng, chū-lâi lâng teh ioh, kóng, beh ōe tē-tô͘ tú-tú kan-taⁿ iōng 4-chióng sek-chúi tō ū kàu-gia̍h, put-jî-kò bô khak-sı̍t ê chèng-kì. Lo̍h-bóe-chhiú tō sī lī-iōng tiān-soàn-ki lâi sǹg i, khoàⁿ chì-chió tō kúi-sek, kiat-kó tek-khak tō sī 4-sek.

Chóng--sī pit-soàn ê hoat-tō͘ kiâu tiān-soàn chám-jiân-á put-tông. Pit-soàn, tō kā gō͘-sek soàn-hoat liān-sı̍p kàu se̍k. Tiān-soàn, tō ài pun-thiah beh sǹg ê būn-tê, siat-kè soàn-hoat chhe-kah ke-khì lâi khang-khòe. Beh o̍h tiān-soàn ê hoat-tō͘, mā tō ùi chho͘-ha̍k khí. Tāi-seng tō ài jīn-bat tiān-soàn-ki ê pún-chit, ha̍k-sı̍p chu-liāu pâi-lia̍t ê hoat-tō͘, koh khe-khó sian-kak só͘ gián-kiù ê soàn-hoat, the̍h lâi lī-iōng.

Chit-pún chheh ê lōe-iông, pâi-lia̍t tī ē-bīn. Tha̍k chit-pún chheh iā m̄-sī ūi tio̍h beh chiâu-chiâu bêng-pe̍k tiān-soàn ê ha̍k-būn, tō sī thang lio̍h-lio̍h-á chai tiān-soàn ê ì-bī nā-tiāⁿ.

Tē-1-pō͘: Tiān-soàn-ki siáⁿ-sū ē-hiáu sǹg?

Nn̄g-chìn kì-sò͘-hoat

Bú-lìn tāi-sò͘

Lí-lō͘-mn̂g

Sǹg-siàu ê hôe-lō͘

Tiān-soàn-ki ê hē-thóng kiat-kò͘

Tē-2-pō͘: Tiān-soàn-ki án-choáⁿ kiò i sǹg?

Thêng-sek gí-giân

Khong-phái-lá

Choh-gia̍p hē-thóng

Tē-3-pō͘: Chu-liāu kò͘-chō

Ā-lé