(Recited by Mr. Bathusiba, Haochong village)
Na-aana thouchiang-thoucha misa-misei lungthou tanbi
Talei kapoppina lung suok ete
He talei kapoppina lungsuok
He Rangsa le Rangang lungsuok kamayete
Hageina Lousa le Mitarung suok –ete
Hageina Amang le Adaan suok-ete
Hageina Misa thou sui suok rwete
He Bariamrwanjo, he braam suok makka suok pida
He talei taki baangkhat han liam ong ngaak-ete
He Khumbarwanjo, he khat suok pei bakiak pei
He khat suok pei bakiak pei bida
He Khumbarwan bakhwan shabaga hagana yete
He Inkarwan thou sui suok rwete
He thou banui thou bida, he Inkarwan paajo
He ba-nga bi meithin kachat sen ong ngaak ete
Inkarwan ding rwanrin-rwanrai bajo hagana yete
Hageina he Kapo inkhaan kho khung tadarwe te
Heimiya misa lungsei lungla dabo
He Pukrangba Rikrwang khou ka ngai rwete
He Rikrwang khou ka ngai bida
He tuiten lamang, he senloi bataki tainu am ngaakne
He bataki, he kuthumnu, he bataki kundomnu
He bakamei lan bi bajin kabu kainu am ngaakne
Hading kalwang hungo diyete
He tuiten lamang senloi bake tainu
He bataki kuthumnu, he bataki kundomnu
He bakamei lanbi bajin kabu kainu ding kalwang hung luga
He bakekhok debup taluga
He inchang la hai, hai suokla pei sarwa
He inbeila hai, hai suokla pei sarwa
He heimiya misa lungsei lungla dabo
He Pukrangba khou ka ngai rwete
He Rikrwang khou ka ngai bida
He tuilen lamang sentak bake tainu am ngaakne
He bataki kuthumnu, bataki kundomu am ngaakne
He bakamei lanbi bajin kabu kainu am ngaakne
Hading hung kalwang tawo di te
He ba sentak bake tainu, bataki kuthumnu, he bataki kundomnu
He bakamei lanbi bajin kabu kainu ding kalwang ta luga
He bakekhok debup taluga
He inchangla hai, hai laamlaa
He inbeila hai, hai laamlaa thou rwete
Hageina batha lumik kho phing suok rwete
Aniya Batha lumikpe amrwe da, he ba mei maak
He misa lungsei lungla dabo
He Pukrangba Rikrwang khou ka ngai rwete
He Rikrwang khou ka ngai bida
He nang misa langbe
He nakia baakpi meithin kachat thang basianu we
He tuina lamang, he rwaswan
He mong kaneinu rwa bali tabaga tuluga
He mei kai, mei suok tam rwete
Hageina he tahaana, he mei lousuok kama kama lang
Misa toga lung rwe dirwete
Hageina misana he tamthit pai to rwete
He tahaana kakhutting pai torwete
He apaiyo nang khutro dibida
He tahaajo bapum sha pei luga
He kalap khuttung karwe te
He apaiyo khutro dibida
He tamthitna tahaa jang katin bi khut basop bida
Hading kabeng lamangna haba mei miktrwe te
He apaiyo khutlatro diga he misajo thou khut latrwe te
He kalap khuttung kabida
He apaiyo nang khutro dibida
He kakhutjo he mei ding kachiga
He jwang kapaangsem thou darwe te
He misana he ei mei lousuoknu peijwe
He ani misa tolang peijwe dibida
He tahaajo hageina kalaanlap thou darwe te
He aniya meibe amrwe da, he ba tui maak
He Rikrwang khou ka ngairwe te
He Rikrwang khou ka ngai da
He mannu tui thei jwe
He mannu ding tui pi jong rwe te
He mannu nang tui thei, tui jongro dibida
He ating tui jongo dibe, he bakuang-bakuang lamang
Eina pao-pao ga jongba dam lamang sui baaro dite
He mannu na he bakuang bakuang lamang
He pao-paoga jong sui baa da
He ba tui am ngaak rwete
He aniya, he meile amrwa, he tui le am rwa
He aniya, he nam som jo diga
He Inka senchan kasha kai luga
He banam thou ta thou somrwe te
He Ba-angkungjwan Kachaankungjwan banam thou som ludabe
Aniram Pantongrwan sarwan be
He kasa-kana to suok sanne
He ba Kachaankungjwan, he ba nam thou ta som ludabe
He bami lungking hung lungba dibiyo
He naanaa manpa sajo, he basa pat kariat thou pon rwete
He uitahui kariat thou bachun thou rwete
He aniya sebaajo diga, he thou sebaa rwete
He rammwan khat thou suok takanpei uitahui khat braanpei
Rammwan khat takan pei uitahui khat braan pei
He rammwan kariat suok takan bina
He uitahui kariat suok braan darwete
He thousui baada bangla kung pon’thum bi sui thang rwete
He thou batou kaada
He saang min bajin ong ngaak rwe te
He anao natumpa nang ka louro dibida
He ei ka lou tang lai, a-u patsopa nang ka louro diga
He a-u patsopa na he ka lou luga
Haba thakkara sa luga hungrwe te.
He bapaana he lungkhonbi suok han phaang luga
He asarwanno, he nani lamsek tato bo dibida
He apawo, he kaannaa ma-e
He rammwan khat thou suok takanpei uitahui khat braanpei
He rammwan khat thou suok takanpei uitahui khat braanpei luga
He rammwan kariat suok takan bina
He uitahui kariat suok braan darwe diga
He kaannaa lanrwe di hungrwe te
He anaorwan ding he kaa louro dibida
He kaa lou tang lai diga
He a-u patsopana ka lou luga
Haba thakkara saaluga chaangring hungdarwe dite
He sui balou latro diga
He bapaana he sui baa lou diga, he sui baada
He katwan hok thou dam ngaakrwe te
He thou sui baada
He Langmeijei tuilibi saang min bajin ong naakrwe te
He ani misa misei khut lou tangla dabo
He thaanbaswanno, he nang khutlouro dibada
He danina, he ating khut louwo dibe
He tamphaak lat siari khat kariat khat
He basui thango dite
He tamphaak lat siari khat kariat khat basui thang luga
He thaanbaswanna lou suok rwe te
He thaanbaswanno nang pa-am lou nwambo dibada
He danina he ating kriang dabe
He dani lou kombi louswan to thango dite
He nangna saga inja saanebo
He loumaa lamangna sa-in satango dibida
He bajuna saang saa baga haana yete
He ba tachiga, he ani Pantongrwan sarwanna
Haba tachi thou thangta lune
Ha tachi thou thangta ludabe
He tampok balat kaphaknu dan dibiyo
He bakamong thouta thou lune
He bakamong thouta thou ludabe
He takhu takei nga tia bup ta dibiyo
He bapho thou lou thou lune
He baran-balangpho tia cha suok dibiyo
He babrai thou brai lune
He thamruang rai tia dibiyo
He basuok thou suok thou lune
He sentak kamei bom tia cha suok dibiyo
He bakra thou kra lune
He ruitak kara dan, ruidan kara dan
He lungtasi kara basuok dibiyo
He balou thou aat thou lune
He balou thou aat thou ludabe
He baji lu khokathangnu dan
Baji kalaanu dan aat kajeila dibiyo
He bapangbut thou khon thou lune
He bapangbut thou khon thou ludabe
He lung karong dan khon suok dibiyo
He balou thou laak thou lune
He balou thou laak thou ludabe
He Langmeijei tuili kabao dan laak kajeila dibiyo
He ‘maak Khumbarwanpa rwanna
He ba thuikhun thou khwan thou lune
He ba tuikhun thou khwan thou ludabe
He Langmeijei tuili kabao dan laa kajeila dibiyo
He ba tapaan thou thang ta lune
He ba tapaan thou thang ta ludabe
He ba kathing thou thang ta lune
He aanmu batha tia chasuok dibiyo
He ba baan thou thang lune
He lukjang mai tia cha suok dibiyo
He ba baanra thou thang ta lune
He rampuang kebaja tia cha suok dibiyo
He ba baruksi thou thang ta lune
He babwa thou inbwa lune
He andep bwa dan dibiyo
He bakara thou kara thou lune
He bakara thou kara thou ludabe
He kano bakhai dan, baliam bakhai dan
He tabasen pek kala dan rai kajeila dibiyo
He ba laa thou thou ta lune
He babalam thou balam thou lune
He ba chanoi tuang kathangnu dan dibiyo
He bakara thou kara lune
He aanlung kara dan dibiyo
He bapaan thou paan thou lune
He insi kasuok dan, tambu kalonnu dan rai kajeila dibiyo
He aniram Patongrwan sarwanna
He ba phaa thou thang ta lune
He ba phaa thou thang ta ludabe
He bamik inmu sekhut dibiyo
He aniram Patongrwan sarwanna
He tuikang meimik ta lune
He ba karu thou thang ta ludabe
He ba nga thou thi thou suok ne
He tampaangpwak kapwaktan
He an-ngaak kaphunnu dan dibiyo
He aniram Patngrwan sarwanna
He ba karo thou karo thoulune
He ba khuang thou laak thou lune
He khwa bari kahit dan dibiyo
He katangrwan sarwanna
He ba sung thou barik thou lune
He khwa bathaak dan dibiyo
He rangaakrwan sarwanna
He ba kapum basi thou thang ta lune
He insi kasuok dan, tha kabaan dan dibiyo
He bakutren thou barik thou lune
He bakutren thou barik thou ludabe
He taneiriang kutren bariknu dan dibiyo
He aniram Patongrwan sarwan be
He ba senchan kasha kailuga
He na nam thou khut thou ludabe
He kasa-kana pi suok basanrwe
He ani bingna, he bami lungking hung lungking baaga
He ba-ui-ba-aan lungking hung lungking baaga
He ba lou chwan to hung tobaa saa baga
Balan-balan tung hung tung baaga pi ung dibiyo
He Khumpu Khumlaak le, he kana-kasa to makka
He pi ung dibiyo
He inakarao bing le, he kana kasa to makka
He kapun karou maakka, he jamraa makka ong dingro
He eile, he apu apa paanbi heipai ruiya
He choi jingjing choi baanbaan ga, he pi ongbiro
He apumbile kasa kana piswak sanrwe
He atinu jungrwe te
Heirwe.