1. PROIEKTUAREN JUSTIFIKAZIOA
Jakin badakigu gizarte guztietan hizkuntza oso garrantzitsua dela elkarrekin komunikatzeko eta geure beharrak, sentimenduak, nahiak eta iritziak adierazteko.
Bost urteko gelako ikasleekin jarriko dugu martxan proiektua gaztelania nagusi den inguru batean. Xede nagusia da ikasleek gustura parte hartzea; horretarako, mitologiako pertsonaia jakin batzuk abiapuntu izanik, jarduera dibertigarriak eta jostagarriak diseinatuko ditugu.
Hirugarren eremuan, batez ere, oinarrituko gara, hau da, Hizkuntza: komunikazio eta adierazpen eremuan.
Ikasleek euskaraz komunikatzeko –ondo ahoskatzeko ere– zailtasunak dituzte; izan ere, ikasleen arteko komunikazioa eta ahoskatzeko era eskasak dira.
Proiektu honen bidez, Haur Hezkuntzako ikasleei lagundu egingo diegu euskara gehiago eta hobeto erabiltzen eta, bide batez, ahozkotasuna lantzen, komunikazio-egoerak identifikatzen eta elkarrizketa egokiaren arauak ezagutzen eta erabiltzen. Jarrera baikorra eta motibazioa izango dira abiapuntu. Hori egiteko, ume kopuruak txikia izan beharko du; beraz, gela bikoiztuko dugu. Saioak ordu erdikoak izango dira, astean bitan.
Ipuinak, olerkiak, abestiak… erabiliko ditugu.
Komunikatzeko estrategiak ere –elkarri begiratu, txanda itxaron/zaindu, arretaz entzun, hitza ez jan…– landuko ditugu, oinarrizkoak baitira. Metodo eta baliabide erakargarriez baliatuko gara.
Azkenik, esan behar da herrialde bakoitzean Mari Teilatuko izen ezberdinez ezagutzen dela, esate baterako: Arratian, Mari Teilatuko; Mungian, Mari Teiletako... beraz, jardueretan modu batean edo bestean idatzita ikusiko duzue.