AI敢會曉聽台語？廖元甫教授破解台語科技的未來

臺灣夜市Taiwan Yes, 2026-07-27

專訪：國立陽明交通大學教授 廖元甫

https://www.rti.org.tw/programnews?uid=4&pid=107403

《臺灣夜市 Taiwan Yes!》這集邀請廖元甫教授，對電腦、語料庫佮大型語言模型出發，開破科技按怎成為台語復振的新工具。

台語教育面對兩項大困難，一个是老師無夠，一个是學生離開教室了後，欠缺會當練習的語境。廖教授的團隊希望開發會曉聽台語、講台語的大型語言模型，予電腦成為老師的助教，協助準備教材；嘛會當成為學生的練習伴，予in轉去厝裡，猶會當繼續用台語問問題、學智識。

欲予AI學會台語，資料就是上重要的基礎。團隊透過教育部計畫，整理公共媒體、網路影音佮會議錄音，建立語音佮文字會當對應的語料。對人工校正的高品質資料，到電腦自動掠的大量素材，攏是訓練模型袂當欠缺的養分。未來，台語聽寫、會議紀錄、字幕、摘要佮關鍵字整理，攏會使透過AI完成。

廖教授嘛提醒，AI時代真正重要的，毋是人會曉寫偌濟程式，顛倒是敢會曉清楚表達問題、組織想法佮提出判斷。台語、客語、原住民族語，攏面對資料無夠的挑戰。語言科技的發展毋是相搶資源，是愛共享經驗、做伙建立臺灣家己的AI能力。敬請收聽《臺灣夜市 Taiwan Yes!》。