Embedded Files
張貼日期：2016/10/17 上午 02:31:31
海墘的師生十分幸福，我們的閩南語老師是擁有專業與熱情的張逸嫻老師。
逸嫻老師持續在閩南語創作與教學上展現優異的才華，指導學生獲獎無數，自己也是參賽高手，並投入創作行列，作品貼近生活，連連獲獎，備受好評。
分享老師的創作，與大家共享臺語之美。
01思念火金蛄
張逸嫻
每一个人佇一生當中，攏有家己難忘的記持。這件代誌可能是歡喜、受氣、悲傷、艱苦、感動……等等各種的心情。佇我的記持中，予我上難忘的代誌，就是舊年，阮規家伙仔，參加一个叫做「走揣火金蛄」的活動。
我對火金蛄會佇烏暗中發光，尾溜爍咧爍咧感覺足好奇。知影有這个活動，我就抱著真歡喜的心情，期待佮火金蛄第一擺的相會。
四月油桐花當咧大開，所以遊客足濟。這陣日時有白色浪漫的油桐花通好欣賞，暗時閣會使佇火金蛄的「閃爍樹林」，觀賞完全無仝款的景致。這个時陣來遮，會使講「一空掠雙隻」，趁著矣！
因為交通真利便，這工阮食飽晝才對大甲出發，差不多一點鐘就到東勢。欲到位的時，遠遠就看著規大片白色的油桐花。
一到位阮就沿路行，沿路看油桐花若像咧落雪，落甲規塗跤攏是油桐花。我佮小妹攏感覺油桐花真媠，真毋甘共踏著，阮就彎來斡去，跳來跳去，親像咧跳舞仝款，實在有夠心適。
天欲暗進前，阮趕緊食暗。因為愛冗早來去樹林，等下昏暗的主角「火金蛄」！解說人員那行那共阮解說：每冬的四、五月是火金蛄開始飛出來活動的季節。公的佮母的火金蛄攏會發光，猶毋過母的的光度較無遐光。無仝款的火金蛄，爍咧爍咧的節奏嘛無仝款，按呢佇暗眠摸的草仔埔，就知影互相的身份。佇暗暝飛出來爍咧爍咧的大部份是公的，母的就歇佇葉仔頂，發出較無遐光的訊號；若是公的發現仝種的母的所發出來的訊號，就會飛過去。
阮順溝仔墘行，四箍輾轉的火金蛄，有的遠，有的近，飛來飛去，閃閃爍爍，親像跳舞的鼓仔燈仝款，浮浮沉沉。我心內真憢疑，人講的燁燁爍，敢是按呢？這時陣，目一𥍉，雄雄千千萬萬的火金蛄，浮出來佇阮的目睭前，予人想袂到，予人掣一趒，遮爾予人歡喜，遮爾予人感動！我的目睭毋知當時煞澹糊糊。真好運，真幸福，看著這个場面，感覺就像咧眠夢仝款。
又閣是火金蛄颺颺飛的季節，這場盛會，今年我欲哪會使綴無著陣咧！
103 年度全國語文競賽-閩南語朗讀文章（國中組）
02洗手保健康 張逸嫻
人講:「好額毋值得會食，好命毋值得勇健」。郭台銘先生雖然真好額，嘛無法度予伊的某佮伊的小弟，好好仔活佇這个世間。健康是咱性命的源頭，無論你想欲做啥代誌，攏一定愛有健康的身體，才有法度去實現。
俗語講:「按怎掖種，就按怎收成」，愛欲健康，有人食腥，有人食菜；有人祈禱，有人拜拜，各人有各人的步數，有人藥補，有人食補，真濟人開錢試各種提高免疫力的秘方，煞無注意著簡單、有效閣會當自保的良方--洗手。
「手洗洗，果子安心提來嚙；手洗洗，細菌就袂四界穢」。若傳染病當咧流行的季節，無論行到佗位，咱四箍輾轉就會有真濟病菌，隨時都有可能去穢著。若準無佇平常時就養成真好的衛生習慣，就有可能予咱的雙手去穢著A型肝炎、做痢、皮膚病、紅目睭、黴菌、傷寒、腸病毒，甚至SARS等傳染病病菌，若閣食落去咱的腹肚內，按呢代誌就大條囉。
咱的雙手是萬能的，做啥物代誌攏愛用著手，所以手嘛會使講是萬病之源，干焦靠注預防射是無法度阻擋病菌的傳染，所以定定正確洗手就真重要。
咱無論是食物件進前、去便所了後、咳嗽、拍咳啾、處理食物進前、摸寵物了後、處理過排泄物抑是呼吸道分泌物了後、對外口入來的時、以及手垃圾的時，攏愛緊洗手。一工上好愛洗十擺以上，來保持清氣衛生，才會當避免病菌對咱的威脅。定定洗手，會當減少倚著病毒佮穢涗著病毒的機會，會減輕咱破病的危險性佮嚴重的程度，所以咱上簡單，閣上有效的方法就是定定洗手。
衛生教育人員攏有教咱:濕、鑢、沖、捧、拭，這五个順序。頭先用水共手沖予澹，才提茶箍來抹手，鑢鑢予工夫，才閣用水沖予清氣，紲落捧一捧水，沖水道頭，上尾仔才共咱的手拭予焦，講起來躼躼長，其實做起來真簡單，做予慣勢，對咱是有好無bái的啦！
洗手是提高個人衛生，預防傳染病上簡單、上有效的方法。捷洗手，病菌溜，逐家就袂面憂憂；正手鑢鑢，倒手鑢鑢，較好咧掛保身符。祝福逐家身體康健食百二。
03 燒酒落喉，人全齣頭
張逸嫻¹
「有緣，無緣，逐家來做伙，燒酒啉一杯，予焦啦！予焦啦！……」、「我無醉我無醉無醉，請你毋免同情我，酒若落喉疼入心肝……」這兩條歌，歌詞內底唱出咱臺灣人誠特殊的啉酒佮拚酒文化。
現代人便若請人客，就會鼓吹逐家啉燒酒來熱場，而且欲啉一定愛展氣魄，酒杯捀咧，乾杯啉予焦，在場算我上勇跤，袂使予人看做是腌里腌臢！
佇新聞報導當中，予我印象上深的，就是啉燒酒駛車，發生事故的現場。受害者的家屬，佇遐喝天喝地，哭甲規身軀軟膏膏，向望伊的親人會當緊活起來。毋過彼个啉燒酒駛車的人，雖然已經對別人的家庭，造成無法度彌補的傷害，猶閣gín戇gín戇、馬西馬西，攏毋知影家己舞的是啥物齣頭。
政府一直咧宣導「啉酒毋通駛車，駛車毋通啉酒」，毋過猶是有真濟人攏無遵守。根據公路交通事故的統計，啉酒車禍佔所有車禍的八成半。特別愛提醒愛啉燒酒的朋友，啉酒駛車是無好結果的。欲啉酒一定愛想予清楚，才袂時到毋但害著家己，閣害著別人。
燒酒啉傷濟，頭殼會袂清楚，反應慢、跤手無法度控制，失去判斷能力，跤步徛袂在，目睭霧霧。有人會變甲誠厚話，毋過講著話是三講四重耽，甚至會佮人冤家相拍、攑刀相刣，齣頭百百款，有影是「燒酒啉落喉，痟人全齣頭」。
「啉酒蓋毋好」，啉燒酒除了會出車禍以外，毋好的所在猶閣誠濟，上毋好的就是會傷害咱的身體健康。人咧講:「有啉傷肝，無啉傷心。」根據醫學統計，啉燒酒對咱人的肝臟、心臟、胃腸、嚨喉、血管會造成負擔，著癌的機會比無啉燒酒的人加真懸。
「啉少顧肝，啉濟顧山」，啉燒酒有遮爾濟毋好的所在，奉勸興啉燒酒的人，燒酒小濕一下，啉淡薄仔來鼻芳，按呢對身體上好，閣會當啉出燒酒的甘甜佮清芳。若磕袂著酒捀來就欲乾杯，閣較好的物件，嘛感受袂著伊的珍貴，閣會拍歹咱的身體，仙算嘛算袂和。
Page updated
Report abuse